ଇଙ୍ଗଲଉଡ୍,୨୨ା୬: ଚଳିତ ଫିଫା ବିଶ୍ୱକପ୍ରେ ସୋମବାର ଶକ୍ତିଶାଳୀ ବେଲଜିୟମ ବିପକ୍ଷରେ ଖେଳାଯାଇଥିବା ମ୍ୟାଚ୍କୁ ୦-୦ ଗୋଲରେ ଇରାନ ଡ୍ର’ ରଖିଛି। ଏଥିସହିତ ଦଳ ନକ୍ଆଉଟ୍ ରାଉଣ୍ଡ ଅଭିମୁଖେ ଏକ ପାଦ ଆଗେଇଛି।
ଇରାନର ଗତ ମ୍ୟାଚ୍ ଭଳି ଏଥର ମଧ୍ୟ ଫିଲ୍ଡ ବାହାରେ ପ୍ରଶଂସକଙ୍କ ବ୍ୟବହାର ଚର୍ଚ୍ଚାର ବିଷୟ ପାଲଟିଥିଲା। ମ୍ୟାଚ୍ର ଶେଷ ସମୟରେ ପ୍ରି-ରିଭଲ୍ୟୁସନାରି ପତାକା ଶାର୍ଟ ପିନ୍ଧିଥିବା ଜଣେ ପ୍ରଶଂସକଙ୍କୁ ଫିଲ୍ଡ ମଧ୍ୟକୁ ପ୍ରବେଶ କଲା ବେଳେ ଗିରଫ କରାଯାଇଥିଲା। ଗତ ମ୍ୟାଚ୍ ଭଳି ଏଥର ମଧ୍ୟ ଷ୍ଟାଡିୟମ ବାହାରେ କିଛି ପ୍ରଶଂସକ ଇରାନ ଦଳର ଅଂଶଗ୍ରହଣତାକୁ ବିରୋଧ କରିଥିଲେ।
ଲୁକାକୁ, ଲିଆଣ୍ଡ୍ରୋ ଟ୍ରସାର୍ଡ, କେଭିନ ଡେ ବ୍ର୍ୟୁନ ଓ ଆଲେକ୍ସିସ ସେଲମେକର୍ସଙ୍କୁ ନେଇ ଗଠିତ ଓ୍ବାଲର୍ଡ ନଂ.୯ ବେଲଜିୟମ ଦଳ ମ୍ୟାଚ୍ରେ ସମ୍ପୂର୍ଣ୍ଣ ପ୍ରଧାନ୍ୟ ବିସ୍ତାର କରି ଖେଳିଥିଲେ। ଦଳ ପକ୍ଷରୁ ଗୋଲ ପାଇଁ ୨୨ ଥର ଉଦ୍ୟମ କରାଯାଇଥିଲା ଏବଂ ୭ ଥର ଟାର୍ଗେଟରେ ଥିଲା। ଏହାସତ୍ତ୍ୱେ କୌଣସି ଖେଳାଳି ଗୋଲ ସ୍କୋର କରିପାରି ନ ଥିଲେ।
ଇରାନ ପାଇଁ ଗୋଲକିପର ଅଲିରେଜା ବେଇରାନଭାଣ୍ଡ ଚମତ୍କାର ଗୋଲ କିପିଂ ପ୍ରଦର୍ଶନ କରି ୭ଟି ସେଭ କରିଥିଲେ। ଏଥିଯୋଗୁ ତାଙ୍କୁ ପ୍ଲେୟର ଅଫ୍ ଦି ମ୍ୟାଚ୍ ବିବେଚିତ କରାଯାଇଥିଲା।
