ଖଣ୍ଡପଡ଼ା,୧୯ା୧୦(ଅଜୟ କୁମାର ମହାରଣା)ଶବ୍ଦ ପ୍ରଦୂଷଣ ରୋକିବା ପାଇଁ କେନ୍ଦ୍ର ତଥା ରାଜ୍ୟ ସରକାର ଆଇନ ପ୍ରଣୟନ କରିଛନ୍ତି। ରାଜ୍ୟ ସରକାରଙ୍କ ପକ୍ଷରୁ ବିଭିନ୍ନ ପର୍ବ ପର୍ବାଣୀରେ ଡ଼ିଜେ ସାଉଣ୍ଡ ଉପରେ କଟକଣା ଜାରି କରାଯାଇଛି। ଡ଼ିଜେ ସାଉଣ୍ଡକୁ ସମ୍ପୂର୍ଣ୍ଣ ବନ୍ଦ କରାଯିବାକୁ ଘୋଷଣା କରାଯାଇଛି। ଏ ସମ୍ପର୍କୀତ ବିଜ୍ଞପ୍ତି ପ୍ରକାଶ ହୋଇଛି। ବିଶେଷ କରି ପୂଜା ପାର୍ବଣରେ ଡ଼ିଜେ, ଚାଙ୍ଗୁ ବାଜା ନ ବଜାଇବା ପାଇଁ ସ୍ବତନ୍ତ୍ର ପଦକ୍ଷେପ ଗ୍ରହଣ କରାଯାଇଛି। ଅନ୍ୟପକ୍ଷେ ରାତ୍ର ୧୦ରୁ ସକାଳ ୬ଟା ପର୍ଯ୍ୟନ୍ତ ମାଇକ ବଜାଇବା ଉପରେ କଟକଣା ଲାଗୁ କରାଯାଇଛି। ହେଲେ ଚଳିତ ବର୍ଷ ଗଣେଶ ପୂଜା ଓ ଖୁଦୁରୁକୁଣୀ ଭସାଣିରେ ଡ଼ିଜେ ସହିତ ଚାଙ୍ଗୁ ବାଜିଥିଲା। ପୋଲିସ ଉପସ୍ଥିତରେ ଶୋଭଯାତ୍ରାକାରୀମାନେ ଡ଼ିଜେ ବଜାଇ ନାଚିଥିଲେ। ଏହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇବା ସହ ପ୍ରଶାସନ କାର୍ଯ୍ୟଦକ୍ଷତା ପ୍ରତି ପ୍ରଶ୍ନବାଚୀ ସୃଷ୍ଟି କରିଛି। ଫଳରେ ଶଦ୍ଦ ପ୍ରଦୂଷଣ ଆଇନ କେବଳ କାଗଜ କଲମରେ ସୀମିତ ରହୁଛି ବୋଲି ସାଧାରଣରେ ମତ ପ୍ରକାଶ ପାଉଛି।
ଗତ ଗଣେଶ ପୂଜା ଭସାଣୀରେ ଖଣ୍ଡପଡ଼ା ନିର୍ବାଚନ ମଣ୍ଡଳୀ ଅଧୀନ ପ୍ରାୟ ସମସ୍ତ ଅଞ୍ଚଳରେ ଡ଼ିଜେ ବାଜିଥିଲା। ଫଳରେ ଶବ୍ଦ ପ୍ରଦୂଷଣ ସୃଷ୍ଟି ହୋଇଥିଲା। ଶୋଭାଯାତ୍ରା ସାହି ଦେଇ ଯାଉଥିବା ବେଳେଘର ଥରି ଉଠିଥିଲା। କାନଫଟା ଶଦ୍ଦରେ ଲୋକେ ଅତିଷ୍ଠ ହୋଇଥିଲେ। ରୋଗୀ, ଶିଶୁ ଓ ଗର୍ଭବତୀମାନେ ଏହି ଶବ୍ଦକୁ ସହ୍ୟ କରି ପାରି ନ ଥିଲେ। ପଶୁ,ପକ୍ଷୀମାନେ ଏପରି ଶବ୍ଦରେ ଅତିଷ୍ଠ ହୋଇଥିଲେ। ତଥାପି କେହି ପ୍ରତିବାଦ କରିବାକୁ ସାହାସ କରି ନ ଥିଲେ। ଆସନ୍ତା ୨୪ରୁ ଆରମ୍ଭ ହେବ ଦଶହରା। ଏହି ସମୟରେ ଶଦ୍ଦ ପ୍ରଦୂଷଣ ନିୟମକୁ କାଗଜ କଲମରେ ସୀମିତ ନ ରଖି ପ୍ରଶାସନ ପକ୍ଷରୁ କାର୍ଯ୍ୟାନୁଷ୍ଠାନ ଗ୍ରହଣ କରିବା ଦରକାର ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଉଛି।
ଏହି ପରିପ୍ରେକ୍ଷୀରେ ଏକ ସଚେତନତା କାର୍ଯ୍ୟକ୍ରମ କଣ୍ଟିଲୋ ଫାଣ୍ଡି ଅଧିକାରୀ ରମେଶ ଚନ୍ଦ୍ର ଜେନାଙ୍କ ଆବାହକତ୍ୱରେ ଅନୁଷ୍ଠିତ ହୋଇଥିଲା। ବିଭିନ୍ନ ପୂଜା କମିଟି କର୍ମକର୍ତ୍ତାଙ୍କୁ ଏକାଠି କରାଯାଇ ଶବ୍ଦ ପ୍ରଦୂଷଣ ରୋକିବାକୁ ପରାମର୍ଶ ଦିଆଯାଇଥିଲା। ଶଦ୍ଦ ପ୍ରଦୂଷଣ ରୋକିବା ନିମନ୍ତେ ଉଚ୍ଚ ନ୍ୟାୟାଳୟ ପକ୍ଷରୁ ଏକ ସ୍ବତନ୍ତ୍ର ଆଇନ ପ୍ରଣୟନ କରାଯାଇଥିଲା। ବିଶେଷକରି କୋର୍ଟ କଚେରୀ, ଡାକ୍ତରଖାନା, ବିଭିନ୍ନ ଶିକ୍ଷାନୁଷ୍ଠାନ ଓ ସରକାରୀ କାର୍ଯ୍ୟାଳୟ ଆଦି ଶାନ୍ତିପୂର୍ଣ୍ଣ ଅଞ୍ଚଳରେ ଶବ୍ଦ ପ୍ରଦୂଷଣ ପ୍ରତି ସମସ୍ତେ ସଚେତନ ରହିବା ଉଚିତ ବୋଲି ନିୟମ ରହିଛି। କେନ୍ଦ୍ର ସରକାର ଶଦ୍ଦ ପ୍ରଦୂଷଣ ନିୟମ-୨୦୧୦ ନିୟମକୁ ଆଧାରକରି ପ୍ରଦୂଷଣକୁ ରୋକିବା ଲକ୍ଷ୍ୟରେ ରାଜ୍ୟ ସରକାର ସମସ୍ତ ବ୍ୟବସ୍ଥା ଗ୍ରହଣ କରିବାକୁ ନିର୍ଦ୍ଦେଶ ଦେଇଛନ୍ତି। ରାତି ୧୦ଟାରୁ ସକାଳ ୬ଟା ପର୍ଯ୍ୟନ୍ତ କୌଣସି ବ୍ୟକ୍ତି କିମ୍ବା ସଙ୍ଗଠନ ଶଦ୍ଦ ପ୍ରଦୂଷଣ କରିପାରିବେ ନାହିଁ ବୋଲି ସରକାରଙ୍କ ପକ୍ଷରୁ ନିର୍ଦ୍ଦେଶ ଜାରି ହୋଇଛି। ଚଳିତ ପୂଜା ପାର୍ବଣ ସମୟରେ ଏହି ଶବ୍ଦ ପ୍ରଦୂଷଣକୁ ନିୟନ୍ତ୍ରଣାଧୀନ କରିବା ଲକ୍ଷ୍ୟରେ ଜିଲା ପ୍ରଶାସନ ପକ୍ଷରୁ ପଦକ୍ଷେପ ଗ୍ରହଣ କରାଯାଇଥିବା ବେଳେ ଡ଼ିଜେ, ଡ଼ାକବାଜି ଯନ୍ତ୍ର ବ୍ୟବହାର କରିବା ପୂର୍ବରୁ ଉପଜିଲାପାଳଙ୍କଠାରୁ ଅନୁମତି ନେବା ଜରୁରୀ ଏବଂ ଯାହା ନୀତି ନିୟମ ରହିଛି ତାହାକୁ ଆଧାର କରି ଡ଼ାକବାଜି ଯନ୍ତ୍ର ବ୍ୟବହାର କରି ପାରିବେ ବୋଲି ବ୍ୟବସ୍ଥା ରହିଛି। ଅନ୍ୟଥା ସେମାନଙ୍କୁ ଆଇନ ଅନୁଯାୟୀ ଦଣ୍ଡ ବିଧାନ କରାଯିବ ବୋଲି ଖଣ୍ଡପଡ଼ା ଥାନା ଆଇଆଇସି ଜ୍ୟୋତି ପ୍ରକାଶ ସ୍ବାଇଁ କହିଛନ୍ତି। ଶବ୍ଦ ପ୍ରଦୂଷଣ ଆଇନକୁ ଉଲ୍ଲଂଘନ କରୁଥାଏ ବ୍ୟକ୍ତିଙ୍କ ସମ୍ପର୍କରେ ପୋଲିସକୁ ସୂଚନା ଦେଲେ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି। ଏହାଛଡା ଆଗାମୀ ଦଶହରା ଉତ୍ସବ ପୂର୍ବରୁ ସମସ୍ତ ପୂଜା କମିଟି କର୍ମକର୍ତ୍ତାଙ୍କୁ ଡକାଇ ଏସମ୍ପର୍କରେ ଅବଗତ କରାଯିବ ବୋଲି ସେ ସୂଚନା ଦେଇଛନ୍ତି।
