ଶ୍ରୀନଗର,୭ା୩: ପ୍ଲାଷ୍ଟିକ୍ର ବ୍ୟବହାର ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଏହାଦ୍ୱାରା ପରିବେଶ ଏବଂ ଜୀବଜଗତ ପ୍ରଭାବିତ ହେବାରେ ଲାଗିଛନ୍ତି। ପ୍ରାଣୀଜଗତ ସୁରକ୍ଷାକୁ ଦୃଷ୍ଟିରେ ରଖି ପ୍ଲାଷ୍ଟିକ୍କୁ ସମ୍ପୂର୍ଣ୍ଣ ଭାବେ ବର୍ଜନ କରିବା ଆବଶ୍ୟକ ହୋଇପଡ଼ିଥିବାବେଳେ କିନ୍ତୁ ଏହା ସମ୍ଭବପର ହୋଇନାହିଁ। ତେବେ ନିଜ ଗ୍ରାମକୁ ପ୍ଲାଷ୍ଟିକ୍ ଫ୍ରି କରିବା ସକାଶେ ଅଣ୍ଟା ଭିଡ଼ିଛନ୍ତି ଜମ୍ମୁ-କଶ୍ମୀର ସାଦିଓ୍ବାରା ଗଁା ସରପଞ୍ଚ ଫାରୁକ୍ ଅହମଦ ଗନାଇ। ‘ପ୍ଲାଷ୍ଟିକ୍ ଦିଅ ଏବଂ ସୁନା ନିଅ’ ଭଳି ଏକ ନିଆରା ଅଭିଯାନ ସେ ଆରମ୍ଭ କରିଛନ୍ତି। ଫାରୁକ୍ଙ୍କ ମୂଳ ଉଦ୍ଦେଶ୍ୟ ପ୍ରଦେଶକୁ ପ୍ଲାଷ୍ଟିକ୍ ମୁକ୍ତ କରିବା।
ଫାରୁକ ପେସାରେ ଜଣେ ଆଇନଜୀବୀ। ଅଭିଯାନକୁ ମାତ୍ର କିଛି ସପ୍ତାହ ବିତିଥିବାବେଳେ ଗତ ଜାନୁୟାରୀ ୭ରେ ଡେପୁଟି କମିଶନର ସାଦିଓ୍ବାରା ଗଁାକୁ ପ୍ଲାଷ୍ଟିକ୍ ଫ୍ରି’ ଭାବେ ଘୋଷଣା କରିଛନ୍ତି। ତେବେ ଯେଉଁ ବ୍ୟକ୍ତି ଏକକାଳୀନ ୨ କୁଇଣ୍ଟାଲ ପ୍ଲାଷ୍ଟିକ୍ ଦେବେ ତାଙ୍କୁ ଗୋଟିଏ ସୁନା ମୁଦ୍ରା ମିଳିବ। କେବଳ ସାଦିଓ୍ବାରା ଗାଁରେ ନୁହେଁ ବରଂ ଜମ୍ମୁ-କଶ୍ମୀରକୁ ସମ୍ପୂର୍ଣ୍ଣ ଭାବେ ପ୍ଲାଷ୍ଟିକ୍ ଫ୍ରି କରିବା ତାଙ୍କ ଉଦ୍ଦେଶ୍ୟ ବୋଲି ଫାରୁକ ଗଣମାଧ୍ୟମକୁ ପ୍ରତିକ୍ରିୟାରେ କହିଛନ୍ତି। ଫାରୁକ୍ଙ୍କ ଏହି ଅଭିଯାନରେ ଗ୍ରାମବାସୀ ତାଙ୍କୁ ପୂର୍ଣ୍ଣ ସହଯୋଗ ପ୍ରଦାନ କରିଥିବାବେଳେ ସ୍ଥାନୀୟ ଯୁବଗୋଷ୍ଠୀ ମଧ୍ୟ ‘ପ୍ଲାଷ୍ଟିକ୍ ଦିଅ ଏବଂ ସୁନା ନିଅ’ ଅଭିଯାନରେ ନିଜକୁ ସାମିଲ କରିଛନ୍ତି। ଫାରୁକ୍ ଜଣେ ଉତ୍ତମ ନେତା। ପ୍ରଦେଶକୁ ପ୍ଲାଷ୍ଟିକ୍ ମୁକ୍ତ କରିବା ପାଇଁ ତାଙ୍କ ପଦକ୍ଷେପକୁ ପ୍ରତ୍ୟେକ ଗ୍ରାମବାସୀ ସ୍ବାଗତ ଜଣାଇଛନ୍ତି। ସବୁଠାରୁ ଅଶ୍ଚର୍ଯ୍ୟକର କଥା ଏହି ନିଆରା ଅଭିଯାନ ଆରମ୍ଭର ମାତ୍ର ୨ ସପ୍ତାହ ମଧ୍ୟରେ ସିଦିଓ୍ବାରାକୁ ପ୍ଲାଷ୍ଟିକ୍ ମୁକ୍ତ ଗାଁ ଭାବେ ବିବେଚନା କରାଯାଇଥିବା ଯୁବଗୋଷ୍ଠୀ ନେତା ଶକିଲ ଓ୍ବାନି କହିଛନ୍ତି। ତେବେ ସ୍ଥାନୀୟ ସରକାର ଏ ପ୍ରକାର ଅଭିଯାନ ସମ୍ପୂର୍ଣ୍ଣ ପ୍ରଦେଶରେ ଲାଗୁ କରିବାକୁ ନିଷ୍ପତ୍ତି ନେଇଥିବା ଜଣାପଡ଼ିଛି।
