ନୟାଗଡ଼,୯।୭ (ଲୋକନାଥ ମିଶ୍ର)ନୟାଗଡ଼ ଜିଲାରେ ନିର୍ମାଣ ଶ୍ରମିକ କଲ୍ୟାଣ ଯୋଜନାର ଅନୁଦାନ ରାଶି ଖର୍ଚ୍ଚ କରିବାରେ ଜିଲା ଶ୍ରମ ଅଧିକାରୀ(ଡିଏଲଓ) ଓ ଜିଲାପାଳଙ୍କ କାର୍ଯ୍ୟାଳୟ ଅସଫଳ ହୋଇଛି। ଶ୍ରମ ଆୟୁକ୍ତ ଓଡ଼ିଶାଙ୍କ ପତ୍ରାଙ୍କ ସଂଖ୍ୟା ୮୪୭/ତା ୨୮।୬।୨୦୨୩କୁ ଅନୁଧ୍ୟାନ କଲେ ଜିଲାପାଳ ଓ ଜିଲା ଶ୍ରମ ଅଧିକାରୀଙ୍କ ଅସହଯୋଗ ସ୍ପଷ୍ଟ ବାରି ହୋଇ ପଡୁଛି । ଜିଲାପାଳ ଓ ଜିଲା ଶ୍ରମ ଅଧିକାରୀଙ୍କ କାର୍ଯ୍ୟାଳୟରେ ୨୮୪୦ ଶ୍ରମିକଙ୍କ ପ୍ରାୟ ୧୪ କୋଟି ଟଙ୍କାର ଫାଇଲ ଘୁଞ୍ଚୁ ନ ଥିବାରୁ ଜିଲାରେ ଶ୍ରମିକମାନେ ଅଭିଶପ୍ତ ଜୀବନଯାପନ କରୁଛନ୍ତି । ଏଭଳି ସ୍ଥଳେ ସହାୟତା ରାଶି ତୁରନ୍ତ ବଣ୍ଟନ କରିବାକୁ ଶ୍ରମ ଆୟୁକ୍ତ ଏନ. ଥିରୁମାଲା ନାଏକ ନିର୍ଦ୍ଦେଶ ଦେଇଛନ୍ତି । ଅନ୍ୟପକ୍ଷେ ଜୁଲାଇ ୨୦ରେ ନୟାଗଡ଼ ଜିଲାକୁ ୫-ଟି ସଚିବଙ୍କ ଗସ୍ତ ଥିବାବେଳେ ସରକାରୀ ଅନୁଦାନକୁ ତୁରନ୍ତ ବଣ୍ଟନ କରିବାକୁ ଅଲିଖିତ ନିର୍ଦ୍ଦେଶନାମା ଆସିଥିବା ଜଣାପଡିଛି । ହେଲେ ଶ୍ରମ ବିଭାଗ ଏହାକୁ ଅଣଦେଖା କରୁଥିବା ଅଭିଯୋଗ ଉଠିଛି ।
ସୂଚନା ଅନୁଯାୟୀ, ଜିଲା ଶ୍ରମ କାର୍ଯ୍ୟାଳୟରେ ୨ ହଜାର ୫୯୭ ଶ୍ରମିକଙ୍କ ୧୨ କୋଟି ୮୩ ଲକ୍ଷ ୬ ହଜାର ସରକାରୀ ସହାୟତା ପଡି ରହିଛି । ସେହିପରି ଜିଲାପାଳଙ୍କ କାର୍ଯ୍ୟାଳୟରେ ୨୯୭ ଶ୍ରମିକଙ୍କ ୧ କୋଟି ୯୯ ଲକ୍ଷ ୬୭ ହଜାର ୨୦୦ ସରକାରୀ ସହାୟତା ଅନୁରୂପ ଭାବେ ପଡି ରହିଛି । ପୁଣି ଅକାଉଣ୍ଟରେ ସମସ୍ୟା କାରଣରୁ ଡିବିଟି ମୋଡରେ ୬ଜଣ ଶ୍ରମିକଙ୍କର ୬ ଲକ୍ଷ ସହାୟତା ରାଶି ବ୍ୟାଙ୍କ ବାତିଲ କରି ଦେଇଛି । ଅନ୍ୟପକ୍ଷେ ୧୪୫ ଜଣ ଶ୍ରମିକଙ୍କର କାଗଜପତ୍ର ଠିକ୍ ନ ଥିବା ଦର୍ଶାଯାଇ ଯାଞ୍ଚ ମୋଡରେ ରଖାଯାଇଛି। ଜିଲାରେ ନିର୍ମାଣ ଶ୍ରମିକ ବିବାହ, ଶିକ୍ଷା, ମୃତ୍ୟୁକାଳୀନ, ପ୍ରସୂତିକାଳୀନ ସହାୟତା ପାଉ ନାହାନ୍ତି । ପୁଣି ଅନଲାଇନରେ ପ୍ରାୟ ୧୫ ହଜାର ନିର୍ମାଣ ଶ୍ରମିକ ଆବେଦନ କରିଥିଲେ ହେଁ ସେମାନଙ୍କୁ ପଞ୍ଜୀକରଣ କରାଯାଉ ନାହିଁ। ଏପରି କି ଜିଲା ଶ୍ରମ ବିଭାଗ ପକ୍ଷରୁ ସେମାନଙ୍କ ଆବେଦନର ଫାଇଲକୁ କମ୍ପ୍ୟୁଟରରେ ଖୋଲା ଯାଉ ନ ଥିବାର ଅଭିଯୋଗ ରହିଛି।
୫-ଟି ସଚିବଙ୍କୁ ଫେରାଦ୍ : ନୟାଗଡ଼ ଜିଲାରେ ମୃତ୍ୟୁକାଳୀନ ସହାୟତା, ବିବାହ ସହାୟତା, ଶିକ୍ଷା ଓ ପ୍ରସୂତିକାଳୀନ ସହାୟତା ରାଶି ଜିଲାପାଳଙ୍କ କାର୍ଯ୍ୟାଳୟରେ ପଡି ରହିଛି । ଜିଲାପାଳ ସମ୍ପୃକ୍ତ ଫାଇଲକୁ ଆପ୍ରୁଭାଲ କରୁ ନ ଥିବାରୁ ସରକାରୀ ସହାୟତା ଶ୍ରମିକ ପାଇ ପାରୁ ନାହାନ୍ତି । ଏନେଇ ଇଙ୍ଗିଲି ଦେଇ, ରଶ୍ମିତା କଅଁର, ବିଜୁଳି ମହାନ୍ତି, ନିରୁପମା ଲେଙ୍କା ପ୍ରମୁଖ ଶ୍ରମିକ ଜିଲାପାଳଙ୍କ ଅବହେଳା ନେଇ ୫-ଟି ସଚିବଙ୍କୁ ଅବଗତ କରାଇଛନ୍ତି। ୫-ଟିଙ୍କ ଗସ୍ତ ନୟାଗଡ଼ ଜିଲା ଥିବାରୁ ଅଭିଯୋଗର ଗୁରୁତ୍ୱ ବଢ଼ିଛି ।
ଅଢ଼େଇ ହଜାର ଦେଲେ ମିଳୁଛି ପରିଚୟପତ୍ର:ଜିଲା ଶ୍ରମ ଅଧିକାରୀଙ୍କ କାର୍ଯ୍ୟାଳୟରେ ଅଢ଼େଇ ହଜାର ଟଙ୍କା ଲାଞ୍ଚ ଦେଲେ ନିର୍ମାଣ ଶ୍ରମିକଙ୍କ ପଞ୍ଜୀକରଣ କରାଯାଇ ପରିଚୟ ପତ୍ର ମିଳୁଥିବାର ଅଭିଯୋଗ ହୋଇ ଆସୁଛି । ଜିଲା ଶ୍ରମ ଅଧିକାରୀଙ୍କ କାର୍ଯ୍ୟାଳୟର ୨ଜଣ କର୍ମଚାରୀ କେତେଜଣ ମଧ୍ୟସ୍ଥଙ୍କୁ ନିୟୋଜିତ କରାଇ ୨ମାସ ହେଲା ରୋଜଗାରରେ ଲାଗି ପଡିଛନ୍ତି । ଏପଟେ କାର୍ଡ ବଢ଼ିବ ସେପଟେ ରୋଜଗାର ହେବା ଲକ୍ଷ୍ୟରେ ନୂଆ ମିଶନ ଚାଲୁ ରହିଛି । ତେବେ ଭିଜିଲାନ୍ସ ବିଭାଗ ଏହାକୁ ନଜରରେ ରଖିଥିବାରୁ ଅନୁଗତ ଲୋକମାନଙ୍କୁ କେବଳ ସୁବିଧା ପ୍ରଦାନ କରିଚାଲିଛି ବୋଲି ଅଭିଯୋଗ ରହିଛି।
