ବେଜିଂ,୧୭।୯:ବିଶ୍ୱ ବ୍ୟାଙ୍କର ଡୁଇଙ୍ଗ ବିଜନେସ ରିପୋର୍ଟର ବିଶ୍ୱସନୀୟତା ଉପରେ ବଡ଼ ପ୍ରଶ୍ନ ଉଠିଛି। ଅନୁସନ୍ଧାନରୁ ଜଣାପଡିଛି ଯେ, ଚାଇନାର ଚାପ ଯୋଗୁ ବିଶ୍ୱ ବ୍ୟାଙ୍କ ଦ୍ୱାରା ପ୍ରସ୍ତୁତ ୨୦୧୮ ରିପୋର୍ଟକୁ ହେରଫେର କରାଯାଇଛି। ବିଶ୍ୱ ବ୍ୟାଙ୍କର ବ୍ୟବସାୟ ରିପୋର୍ଟରେ ଅନିୟମିତତାକୁ ନେଇ ବିବାଦ ଗଭୀର ହେବାରେ ଲାଗିଛି। ଏଥିରେ ଅନ୍ତର୍ଜାତୀୟ ମୁଦ୍ରା ପାଣ୍ଠି (ଆଇଏମଏଫ)ର ପରିଚାଳନା ନିର୍ଦ୍ଦେଶକ କ୍ରିଷ୍ଟାଲିନା ଜର୍ଜିଭାଙ୍କ ନାମ ମଧ୍ୟ ପ୍ରକାଶ ପାଇଛି। ରିପୋର୍ଟ ଅନୁଯାୟୀ, ଚାଇନା ଯେପରି ଅସନ୍ତୋଷ ନ ହୁଏ ସେଥିପାଇଁ ବିଶ୍ୱ ବ୍ୟାଙ୍କରେ ରହିବା ସମୟରେ ଏକ ରିପୋର୍ଟରେ ପରିବର୍ତ୍ତନ ଆଣିବାକୁ ଜର୍ଜିଭା କର୍ମଚାରୀଙ୍କୁ ଚାପ ପକାଇଥିଲେ। ତେବେ ଜର୍ଜିଭା ଏଥିରେ ଏକମତ ନୁହଁନ୍ତି। ବ୍ୟାଙ୍କର ନୈତିକ କମିଟିର ନିର୍ଦ୍ଦେଶରେ ଆଇନ ସଂସ୍ଥା ୱିଲ୍ମର୍ହେଲ୍ ଏହି ରିପୋର୍ଟ ପ୍ରସ୍ତୁତ କରିଛନ୍ତି। ଏଥିରେ ଚାଇନାର ବିଶ୍ୱ ବ୍ୟାଙ୍କ ଉପରେ ହେଉଥିବା ଚାପକୁ ନେଇ ଚିନ୍ତା ପ୍ରକଟ କରାଯାଇଛି। ରିପୋର୍ଟରେ କୁହାଯାଇଛି ଯେ, ଚାଇନାର ମାନ୍ୟତାରେ ଉନ୍ନତି ଆଣିବା ପାଇଁ କ୍ରିଷ୍ଟାଲିନା କର୍ମଚାରୀଙ୍କ ଉପରେ ଚାପ ପକାଇଛନ୍ତି। ଏହା ସହିତ ତତ୍କାଳୀନ ଆଇଏମଏଫ ରାଷ୍ଟ୍ରପତି ଜିମ ୟୋଙ୍ଗ କିମଙ୍କ ଉପରେ ଚାଇନାର ଚାପ ବିଷୟରେ ମଧ୍ୟ ଆଲୋଚନା ହୋଇଛି। ଏଥିସହିତ ଜର୍ଜିଭା ତଦନ୍ତ ରିପୋର୍ଟକୁ ପ୍ରତ୍ୟାଖ୍ୟାନ କରି କହିଛନ୍ତି ଯେ ସେ ଏଥିରେ ସହମତ ନୁହଁନ୍ତି ଏବଂ ଆଇଏମଏଫ କାର୍ଯ୍ୟନିର୍ବାହୀ ବୋର୍ଡ ସମ୍ମୁଖରେ ତାଙ୍କ ପକ୍ଷ ଉପସ୍ଥାପନ କରିଛନ୍ତି।
ସୂଚନାଯୋଗ୍ୟ,ବିଶ୍ୱ ବ୍ୟାଙ୍କ ପୁଞ୍ଜି ପାଇଁ ଚାଇନାଠାରୁ ସାହାଯ୍ୟ ଲୋଡିଥିଲା। ତେଣୁ ଏହା ବଦଳରେ ଚାଇନା ଏହି ରିପୋର୍ଟରେ ସୁଯୋଗ ଦେବା ପାଇଁ ଚେଷ୍ଟା କରାଯାଇଛି ବୋଲି ଅନୁମାନ କରାଯାଉଛି। ‘ଡୁଇଙ୍ଗ ବିଜିନେସ ୨୦୧୮’ ରିପୋର୍ଟରେ ସାତୋଟି ସ୍ଥାନ ବୃଦ୍ଧି କରି ଚାଇନା ୭୮ତମ ସ୍ଥାନରେ ରହିଛି।
