କେନ୍ଦୁଝର, ୧୯ା୨(ସ୍ବ.ପ୍ର.)-ପାହାଡ ଜଙ୍ଗଲ ଘେରା କେନ୍ଦୁଝର ଜିଲାର ଅନେକ ଅଗମ୍ୟ ଅଞ୍ଚଳରେ ଲୋକଙ୍କୁ ବିଶୁଦ୍ଧ ପାନୀୟ ଜଳ ଯୋଗାଣ ସୁବିଧା ନ ଥିଲେ ହେଁ ପ୍ରଶାସନର ଉଦ୍ୟମରେ କେତେକ ଅଞ୍ଚଳରେ ପାଇପ ଦ୍ୱାରା ପାନୀୟ ଜଳ ଯୋଗାଇବା ପାଇଁ ପଦକ୍ଷେପ ନିଆଯାଇଛି। ମାଲାଙ୍ଗଟୋଲୀ ପାହାଡ ଉପରେ ଅବହେଳିତ ହୋଇ ରହିଥିବା ପିଢପୋଖରୀ ଗ୍ରାମର ବନବାସୀଙ୍କ ଘରେ ପିଇବା ପାଣି ପହଞ୍ଚିଛି। ଜିଲା ପ୍ରଶାସନ ପକ୍ଷରୁ ସେମାନଙ୍କୁ ପାଇପ ଜଳ ଯୋଗାଣ ପ୍ରକଳ୍ପରେ ପିଇବା ପାଣି ଯୋଗାଇଦେଇଛନ୍ତି। ବଣପାହାଡ ଅଞ୍ଚଳ ହୋଇଥିବାରୁ ଯଦିଓ ଏହା ପ୍ରଶାସନ ପାଇଁ ଚ୍ୟାଲେଞ୍ଜ ହୋଇଥିଲେ ହେଁ ଗ୍ରାମ୍ୟ ଜଳ ଯୋଗାଣ ଓ ପରିମଳ ବିଭାଗ ଦ୍ୱାରା ଏହି ପ୍ରକଳ୍ପ ନିର୍ମାଣ କରି ପିଇବା ପାଣି ପହଞ୍ଚାଯାଇଛି।
ପ୍ରକାଶ ଯେ ଉକ୍ତ ଗ୍ରାମରେ ପାଖାପାଖି ୨୦୦ ଆଦିବାସୀ ପରିବାର ବସବାସ କରୁଛନ୍ତି। ପାନୀୟ ଜଳ ଅଭାବରୁ ଆଗରୁ ଦୂରରୁ ଝରଣା ପାଣି ବ୍ୟବହାର କରୁଥିଲେ। ପରବର୍ତ୍ତୀ ସମୟରେ ସେମାନଙ୍କୁ ଟ୍ୟାଙ୍କର ଜରିଆରେ ଜଳ ଯୋଗାଣ ହେଉଥିଲେ ହେଁ ତାହା ପର୍ଯ୍ୟାପ୍ତ ନ ଥିଲା ଏବଂ ସେମାନଙ୍କ ଆବଶ୍ୟକତା ପୂରଣ ହୋଇ ପାରୁନଥିଲା। ଏଣୁ ଜିଲାପାଳ ଆଶୀଷ କୁମାର ଠାକରେ ସେମାନଙ୍କୁ ପାଇପ ଦ୍ୱାରା ପାନୀୟ ଜଳ ଯୋଗାଣ ପାଇଁ ପଦକ୍ଷେପ ନେଇଥିଲେ ା ୨୦୧୮ ମସିହାରେ ଜିଲା ଖଣିଜ ପ୍ରତିଷ୍ଠାନ ପାଣ୍ଠିରୁ ପ୍ରାୟ ୨.୬୩ କୋଟି ଟଙ୍କା ବ୍ୟୟରେ ଏହି ପ୍ରକଳ୍ପ ନିର୍ମାଣ କାମ ହୋଇଥିଲା। ପାଖ ଝରଣା ଜଳକୁ ପ୍ରାୟ ୩୦୦ ଫୁଟ ଉପରକୁ ଉଚ୍ଚ କ୍ଷମତା ସମ୍ପନ୍ନ ମୋଟର ପମ୍ପ ଦ୍ୱାରା ଓଭରହେଡ ଟାଙ୍କିକୁ ଉଠାଯାଉଛି। ସେଠାରୁ ପାଇପ ଦ୍ୱାରା ସମସ୍ତ ଘରକୁ ପିଇବା ପାଣି ଯୋଗାଇ ଦିଆଯାଉଛି। ଏହାର ତଦାରଖ ଖୋଦ ଜିଲାପାଳ କରିଛନ୍ତି। ଏହା ଦ୍ୱାରା ସେମାନଙ୍କ ଜଳ ସମସ୍ୟା ଦୂର ହେବା ସହ ସେମାନଙ୍କ ବିକାଶରେ ସହାୟକ ହୋଇଛି ବୋଲି ଜିଲାପାଳ କହିଛନ୍ତି ା
