ନୂଆଦିଲ୍ଲୀ,୧।୧୨ : ଭାରତରେ କର୍କଟ ଭଳି ମାରାତ୍ମକ ରୋଗର ଯାଞ୍ଚ୍ କ୍ଷେତ୍ରରେ ଲିଙ୍ଗଗତ ଭେଦଭାବ ମଧ୍ୟ ଘଟୁଛି ବୋଲି ନୂତନ ଲାନସେଟ ଅଙ୍କୋଲୋଜି ରିପୋର୍ଟରେ ଦାବି କରାଯାଇଛି। ଏହି ଅନୁଯାୟୀ, ପୁଅମାନଙ୍କର ଅଧିକ ଯାଞ୍ଚ୍ କରାଯାଉଥିବାରୁ ପୁଅମାନଙ୍କଠାରେ ଅଧିକ କର୍କଟ ରୋଗ ଦେଖିବାକୁ ମିଳୁଛି। ମାତ୍ର ଝିଅଙ୍କ କ୍ଷେତ୍ରରେ ଯାଞ୍ଚ୍ କମ୍ ରହିଛି। ଫଳରେ ଝିଅଙ୍କଠାରେ କର୍କଟ ସମସ୍ୟା ଥିବା ଜଣାପଡ଼ିପାରୁ ନାହିଁ। ୨୦୦୫ ରୁ ୨୦୧୯ ପର୍ଯ୍ୟନ୍ତ ୧୯ ବର୍ଷ ବୟସର ପିଲାମାନଙ୍କ ମଧ୍ୟରେ ପ୍ରମୁଖ ଡାକ୍ତରଖାନା ଏବଂ ଜନଗଣନା ଭିତ୍ତିକ କର୍କଟ ରେଜିଷ୍ଟ୍ରି (ପିବିସିଆର) ରେ ଚିହ୍ନଟ ହୋଇଥିବା କର୍କଟ ରୋଗର ବିଶ୍ଳେଷଣ କରାଯାଇଥିବା ରିପୋର୍ଟରୁ ଏହା ଜଣାପଡ଼ିଛି।
ଏହି ରିପୋର୍ଟରେ, ଦିଲ୍ଲୀ ଏମ୍ସ ଏବଂ ଚେନ୍ନାଇର କର୍କଟ ପ୍ରତିଷ୍ଠାନର ଅନୁସନ୍ଧାନକାରୀମାନେ ଲିଙ୍ଗ ଅନୁପାତ ଏବଂ କର୍କଟ ରୋଗୀଙ୍କ ଅନ୍ୟାନ୍ୟ ତଥ୍ୟ ଗଣନା କରିଛନ୍ତି। ଦିଲ୍ଲୀ ଏମ୍ସର ମେଡିକାଲ ଅଙ୍କୋଲୋଜି ବିଭାଗର ପ୍ରଫେସର ସମୀର ବକ୍ସି କହିଛନ୍ତି ଯେ ପିବିସିରେ ପଞ୍ଜୀକୃତ ହୋଇଥିବା ୧୧ ହଜାର କର୍କଟ ରୋଗୀଙ୍କ ମଧ୍ୟରେ ପୁଅଙ୍କ ସଂଖ୍ୟା ଅଧିକ ରହିଛି। ଡାକ୍ତରଖାନାରେ ଚିକିତ୍ସା କରାଯାଉଥିବା ୨୨ ହଜାର କର୍କଟ ରୋଗୀଙ୍କ ମଧ୍ୟରେ ଅଧିକ ପୁଅ ଅଛନ୍ତି।
ଏହା ଦର୍ଶାଉଛି ଯେ କମ ଝିଅମାନଙ୍କୁ କର୍କଟ ରୋଗର ଲକ୍ଷଣ ଥିଲେ ସ୍କ୍ରିନିଂ ପାଇଁ ଅଣାଯାଉଛି। ବିଶେଷକରି ଉତ୍ତର ଭାରତରେ, ଯେଉଁଠାରେ ସମାଜ ଅଧିକ ପିତୃପ୍ରାଧାନ୍ୟ ସେଠାର ଏଭଳି ଘଟଣା ଅଧିକ ଘଟୁଛି। ରିପୋର୍ଟ ଅନୁଯାୟୀ, ଆମକୁ ସ୍ବୀକାର କରିବାକୁ ହେବ ଯେ କର୍କଟ ରୋଗ ନିର୍ଣ୍ଣୟ ଏବଂ ଚିକିତ୍ସାରେ ଲିଙ୍ଗଗତ ଭେଦଭାବ ରହିଛି। ଏହାକୁ ଦୂର କରିବା ପାଇଁ ଲୋକଙ୍କୁ ଜଣାଇବାକୁ ପଡିବ ଯେ ସମୟ ପୂର୍ବରୁ ଚିହ୍ନଟ ହେଲେ କର୍କଟ ରୋଗର ଭଲ ଚିକିତ୍ସା କରାଯାଇପାରିବ। ଚିକିତ୍ସା ଖର୍ଚ୍ଚ ମଧ୍ୟ ହ୍ରାସ ହୋଇ ପାରିବ। ଝିଅମାନଙ୍କ ଚିକିତ୍ସା ପାଇଁ ସ୍ବତନ୍ତ୍ର ଯୋଜନା ଅଣାଗଲେ ସୁଫଳ ମିଳିବ। ଯଦି ସେମାନେ ମାଗଣା ଚିକିତ୍ସା ପାଆନ୍ତି, ଏହା ଭେଦଭାବ ହ୍ରାସ କରିବାରେ ସାହାଯ୍ୟ କରିବ।
ଦକ୍ଷିଣ ଭାରତ ତୁଳନାରେ ଉତ୍ତର ଭାରତରେ କର୍କଟ ଚିକିତ୍ସାରେ ଚିକିତ୍ସିତ ହେଉଥିବା ଝିଅଙ୍କ ସଂଖ୍ୟା କମ।
ସହର ଅପେକ୍ଷା ଗ୍ରାମାଞ୍ଚଳର ରୋଗୀଙ୍କ ମଧ୍ୟରେ ଲିଙ୍ଗଗତ ଭେଦଭାବ ଅଧିକ।
ଡାକ୍ତରଖାନା ୧୦୦ କିଲୋମିଟରରୁ ଅଧିକ ହୋଇଥିଲେ ମଧ୍ୟ ଚିକିତ୍ସା ଚାହୁଁଥିବା ଝିଅଙ୍କ ସଂଖ୍ୟା କମିଯାଇଥାଏ।
ଘରୋଇ ଏବଂ ମହଙ୍ଗା ଅନୁଷ୍ଠାନରେ ଚିକିତ୍ସା କ୍ଷେତ୍ରରେ ମଧ୍ୟ ଝିଅଙ୍କ ସଂଖ୍ୟା କମିଯାଉଛି ବୋଲି ରିପୋର୍ଟରେ ପ୍ରକାଶ ପାଇଛି।
