ବେତନଟୀ,୧।୧୦(ସ୍ବ.ପ୍ର.)-ଅନେକ ସଚେତନା ପରେ ବି କିଛି ଲୋକ ସୁଧୁରୁ ନାହାନ୍ତି। ବିଲୁପ୍ତ ପ୍ରଜାତିର ପକ୍ଷୀମାନଙ୍କୁ ସେମାନେ ଶିକାର କରୁଛନ୍ତି। ବନବିଭାଗ କର୍ମଚାରୀଙ୍କୁ ଚକ୍ମା ଦେଇ ଶିକାରୀମାନେ ଦିନକୁ ଦିନ ନିଜର ପଞ୍ଝା ମେଲାଇ ଚାଲିଛନ୍ତି। ମୟୂରଭଞ୍ଜ ଜିଲା ବୈଶିଙ୍ଗା ଥାନା ଅଧୀନ ଅଁଳା ପଞ୍ଚାୟତରେ ଏପରି ଶିକାରୀମାନେ ସଂରକ୍ଷିତ ପ୍ରଜାତିର ଗେଣ୍ଡାଳିଆ, ବଗ ଏବଂ ପାଣିକୁଆ ସବୁକୁ ଅବାଧରେ ଶିକାର କରୁଛନ୍ତି।
ମୁଖ୍ୟତଃ ଗେଣ୍ଡାଳିଆ (ଏସିଆନ ଓପେନ ବିଲ୍ ଷ୍ଟର୍କ ) ଏକ ବଗ ପ୍ରଜାତିର ପକ୍ଷୀ ଅଟେ। ଯାହାର ଲମ୍ବା ଗୋଡ଼ ଓ ଥଣ୍ଟ ଥାଏ। ମୌସୁମୀ ବର୍ଷା ପୂର୍ବରୁ ଗେଣ୍ଡାଳିଆ କାଠିକୁଟା, ନଡ଼ାପାଳ ଏବଂ ବିଭିନ୍ନ ପ୍ରକାର ପତ୍ର ବ୍ୟବହାର କରି ନିଜର ବସା ସୁଦୃଢ କରି ବାନ୍ଧିଥାନ୍ତି। ସୂଚନା ଅନୁଯାୟୀ, ବର୍ଷାର ଆଗମନ ତଥା ଖରିଫ ଚାଷ ଆରମ୍ଭରେ ଅଁଳା ପଞ୍ଚାୟତ ତେନ୍ତୁଳିଗାଁ ଗ୍ରାମ ନିକଟରେ ଥିବା ବଡ଼ ତେନ୍ତୁଳି ବୃକ୍ଷ ଓ ଆମ୍ବଗଛଗୁଡ଼ିକରେ ଗ୍ରାମ ପାଖାପାଖି ଜଙ୍ଗଲରୁ ହଜାର ହଜାର ସଂଖ୍ୟାରେ ଗେଣ୍ଡାଳିଆ ଓ ବଗ ଆସି ବସା ବାନ୍ଧି ବାସ କରନ୍ତି। ଗତ ୫ବର୍ଷ ହେଲା ଏମାନେ ପ୍ରାୟତଃ ଜୁନ୍ ମାସରେ ଆସିଥାନ୍ତି ଓ ପୁଣି ନଭେମ୍ବର ମାସରେ ଶୀତ ଋତୁ ଆରମ୍ଭ ହେଲେ ନିଜନିଜ ଅଞ୍ଚଳକୁ ଫେରିଯାଇଥାନ୍ତି। ହେଲେ ଏହାର ସୁଯୋଗ ନେଇ ପ୍ରାୟତଃ ସା ସମୟରେ କେତେକ ଅମାନିଆ ଶିକାରୀ ବାଟୁଳି ସାହାଯ୍ୟରେ ପକ୍ଷୀ ଶିକାର କରୁଥିବା ଦେଖିବାକୁ ମିଳୁଛି।
ଶିକାରୀମାନେ ଏହି ପକ୍ଷୀଗୁଡ଼ିିକୁ ମାରି ଗାଁ ଗହଳିରେ ଚଢ଼ା ଦରରେ ବିକ୍ରି କରୁଛନ୍ତି। ଏନେଇ ଉକ୍ତ ଗ୍ରାମର ବାସିନ୍ଦା ବଳଭଦ୍ର ଦଳାଇ, ହେମନ୍ତ ପଣ୍ଡା, ଅଶୋକ କୁମାର ଦଳାଇ ପ୍ରମୁଖ ଶତାଧିକ ଗ୍ରାମବାସୀ ଅସନ୍ତୋଷ ପ୍ରକାଶ କରିଛନ୍ତି। ଦିନ ଦ୍ବିପ୍ରହରରେ ପକ୍ଷୀ ଶିକାର ହେଉଥିଲେ ମଧ୍ୟ ବନ ବିଭାଗ କୋଣସି ପଦକ୍ଷେପ ଗ୍ରହଣ କରୁ ନ ଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ପରିବେଶ ସନ୍ତୁଳନରେ ଏହି ପକ୍ଷୀଗୁଡ଼ିକର ଭୂମିକା ରହିଛି। ଅବାଧ ଶିକାର ଯୋଗୁ ଏମାନଙ୍କ ବଂଶ କ୍ରମଶଃ ଲୋପ ପାଇବାକୁ ବସିଲାଣି। ବନବିଭାଗ ଧରପଗଡ଼ କରି ଶିକାର ବନ୍ଦ କରିବାକୁ ପରିବେଶବିତ୍ମାନେ ଦାବି କରିଛନ୍ତି।
