ଜେରୁଜେଲମ,୮।୧୧ : ପାଲେଷ୍ଟାଇନର ଗାଜା ଷ୍ଟ୍ରିପରେ ହମାସ ଏବଂ ଇସ୍ରାଏଲ ମଧ୍ୟରେ ଚାଲିଥିବା ଯୁଦ୍ଧର ସବୁଠାରୁ ଖରାପ ପ୍ରଭାବ ପିଲାମାନଙ୍କ ଉପରେ ପଡିଛି। ଏକ ମାସରୁ ଅଧିକ ଦିନ ଧରି ଚାଲିଆସୁଥିବା ଏହି ଯୁଦ୍ଧରେ ପିଲାମାନଙ୍କୁ ହତ୍ୟା କରାଯାଉଛି। ପ୍ରତ ୧୦ମିନିଟରେ ଜଣେ ଶିଶୁଙ୍କର ଏଠାରେ ମୃତ୍ୟୁ ଘଟୁଛି। ପ୍ରତି ୧୦ ମିନିଟରେ ଦୁଇ ଜଣ ପିଲା ଆହତ ହେଉଛନ୍ତି, ଅର୍ଥାତ ପ୍ରତି ଦଶ ମିନିଟରେ ୩ ଜଣ ପିଲାଙ୍କୁ ଆକ୍ରମଣ କରାଯାଉଛି।
ଯୁଦ୍ଧ ଆରମ୍ଭରୁ ପାଲେଷ୍ଟାଇନର ସ୍ବାସ୍ଥ୍ୟ ମନ୍ତ୍ରଣାଳୟ ମୃତ୍ୟୁ ସଂଖ୍ୟାର ରିପୋର୍ଟ ଦେଇଛି। ମନ୍ତ୍ରଣାଳୟ କହିଛି ଇସ୍ରାଏଲର ଏୟାର ଷ୍ଟ୍ରାଇକରେ ୯,୭୭୦ ପାଲେଷ୍ଟାଇନୀୟଙ୍କ ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ଅଧା ଅର୍ଥାତ ୪,୧୦୦ ହେଉଛନ୍ତି ପିଲା। ଗାଜାରେ ୮,୦୬୭ ନିରୀହ ଲୋକ ମଧ୍ୟ ଆହତ ହୋଇଛନ୍ତି, ସେମାନଙ୍କ ମଧ୍ୟରୁ ଅନେକଙ୍କ ଅବସ୍ଥା ଗୁରୁତର ରହିଛି। ୧,୨୫୦ ପିଲା ନିଖୋଜ ଥିବା ସ୍ବାସ୍ଥ୍ୟ ମନ୍ତ୍ରଣାଳୟ କହିଛି। ବିବୃତ୍ତିରେ ଏହା ମଧ୍ୟ କୁହାଯାଇଛି ଇସ୍ରାଏଲ ଆକ୍ରମଣରେ ମୃତ୍ୟୁ ଘଟିଥିବା ଲୋକଙ୍କ ମଧ୍ୟରୁ ୭୦ ପ୍ରତିଶତ ହେଉଛନ୍ତି ଶିଶୁ, ମହିଳା ଏବଂ ବୃଦ୍ଧାବୃଦ୍ଧ।
ଗାଜାରେ ପ୍ରାୟ ଏକ ମାସର ଯୁଦ୍ଧର ପରିସଂଖ୍ୟାନ କହୁଛି ଏଠାରେ ପ୍ରତିଦିନ ହାରାହାରି ୧୦୦ ରୁ ଅଧିକ ପିଲାଙ୍କୁ ହତ୍ୟା କରାଯାଉଛି। ସାମ୍ପ୍ରତିକ ବର୍ଷଗୁଡିକରେ, ଅନେକ ଦେଶରେ ଯୁଦ୍ଧ ହୋଇଛି, କିନ୍ତୁ ପିଲାମାନେ ଏହିପରି କେଉଁଠି ଶିକାର ହୋଇନାହାଁନ୍ତି। ଗାଜାରେ ପ୍ରତିଦିନ ହାରାହାରି ଶିଶୁ ମୃତ୍ୟୁ ସଂଖ୍ୟା ୧୩୬ ରହିଛି। ନିକଟ ଅତୀତରେ ଯୁଦ୍ଧର ସମ୍ମୁଖୀନ ହୋଇଥିବା ସିରିଆରେ ପ୍ରତିଦିନ ହାରାହାରି ଶିଶୁ ମୃତ୍ୟୁ ସଂଖ୍ୟା ୩ ଥିଲା। ସେହିପରି ଆଫଗାନିସ୍ତାନ ୨, ୟେମେନ ୧.୫, ୟୁକ୍ରେନ ୦.୭ ଏବଂ ଇରାକ ୦.୬ ଥିଲା।
ସିରିଆରେ ୨୦୧୧ ରୁ ୨୦୨୨ ପର୍ଯ୍ୟନ୍ତ ୧୧ ବର୍ଷରେ ୧୨ ହଜାର ଶିଶୁଙ୍କର ମୃତ୍ୟୁ ହୋଇଥିଲା। ଆଫଗାନିସ୍ତାନରେ ୨୦୦୯ରୁ ୨୦୨୦ ପର୍ଯ୍ୟନ୍ତ ୧୨ ବର୍ଷରେ ୮ ହଜାର ଶିଶୁଙ୍କର ମୃତ୍ୟୁ ହୋଇଥିଲା। ୟେମେନରେ, ୨୦୧୫ ରୁ ୨୦୨୨ ମଧ୍ୟରେ ୮ ବର୍ଷରେ ୩୭୦୦ ପିଲା, ଇରାକରେ, ୨୦୦୮ ରୁ ୨୦୨୨ ମଧ୍ୟରେ ୧୪ବର୍ଷରେ ୩୧୦୦ ଏବଂ ୟୁକ୍ରେନରେ ଗତ ଦୁଇ ବର୍ଷ ମଧ୍ୟରେ ୫୧୦ ଶିଶୁଙ୍କର ମୃତ୍ୟୁ ଘଟିଛି। ଗାଜାରେ, ମାତ୍ର ଗୋଟିଏ ମାସରେ ୪୧୦୦ ପିଲାଙ୍କ ମୃତ୍ୟୁ ଘଟିଛି। ଯାହା ଅତ୍ୟନ୍ତ ଚିନ୍ତାଜନକ।
