କାଠମାଣ୍ଡୁ,୨୩ା୩(ପି.ଟି.): ହିନ୍ଦୁକୁଶ ହିମାଳୟରେ ଥିବା ଗ୍ଲେସିୟର ୨୦୦୦ରୁ ପୂର୍ବାପେକ୍ଷା ୨ ଗୁଣ ହାରରେ ତରଳୁଛି। ୧୯୯୦ରୁ ୨୦୨୦ ମଧ୍ୟରେ ୧୨ ପ୍ରତିଶତ ଅଞ୍ଚଳ ଗ୍ଲେସିୟର ହରାଇଲାଣି ବୋଲି ଆଇସିଆଇଏମ୍ଓଡି ( ଅନ୍ତର୍ଜାତୀୟ ସମନ୍ବିତ ପର୍ବତ ବିକାଶ କେନ୍ଦ୍ର) ଦ୍ୱାରା ପ୍ରସ୍ତୁତ ୨ଟି ରିପୋର୍ଟରେ କୁହାଯାଇଛି। ପ୍ରତିବର୍ଷ ମାର୍ଚ୍ଚ ୨୧ରେ ବିଶ୍ୱ ଗ୍ଲେସିୟର ଦିବସ ପାଳନ ହେଉଥିଲାବେଳେ କାଠମାଣ୍ଡୁସ୍ଥିତ ଆଇସିଆଇଏମ୍ଓଡି ମୁଖ୍ୟାଳୟ ଉକ୍ତ ରିପୋର୍ଟ ପ୍ରକାଶ କରିଛି, ଯେଉଁଥିରେ ଅଞ୍ଚଳର ଗ୍ଲେସିୟରରେ କିଭଳି ପରିବର୍ତ୍ତନ ହେଉଛି, ତାହାର ଏକ ବିସ୍ତୃତ ପ୍ରମାଣ ଦିଆଯାଇଛି। ୫୦ ବର୍ଷ ଧରି ହିମାଳୟ ଗ୍ଲେସିୟର ଉପରେ ଅନୁଧ୍ୟାନରୁ ଜଣାପଡ଼ିଛି ଯେ, ୧୯୭୫ରୁ ମୋଟ ୨୭ ମିଟର ବହଳର ଗ୍ଲେସିୟର ବରଫ ତରଳିଛି। ମେରୁ ଅଞ୍ଚଳକୁ ବାଦ୍ଦେଲେ ହିମାଳୟ ପର୍ବତମାଳାରେ ସର୍ବାଧିକ ବରଫ ରହିଥାଏ। ଏସିଆ ମହାଦେଶର ଅନୂ୍ୟନ ୧୦ ବୃହତ୍ ନଦୀକୁ ଏହା ଜଳ ଯୋଗାଇ ବହୁ କୋଟି ଲୋକଙ୍କୁ ଖାଦ୍ୟ, ଜଳ, ଶକ୍ତି ଓ ଜୀବିକା ଯୋଗାଇବାରେ ସହାୟକ ହୋଇଥାଏ ବୋଲି ରିପୋର୍ଟରେ କୁହାଯାଇଛି। ଗ୍ଲେସିୟର ଅଞ୍ଚଳର ପ୍ରାୟ ୭୮ ଭାଗ ସମୁଦ୍ର ପତ୍ତନଠାରୁ ୪,୫୦୦ରୁ ୬,୦୦୦ ମିଟର ଉଚ୍ଚତା ମଧ୍ୟରେ ଅବସ୍ଥିତ, ଯେଉଁଠି ଉଚ୍ଚତା ବଢ଼ିବା ସହ ତାପମାତ୍ରା ବୃଦ୍ଧିର ହାର ମଧ୍ୟ ଅଧିକ ହୋଇଥାଏ ବୋଲି ରିପୋର୍ଟରେ କୁହାଯାଇଛି।
