ମୁମ୍ବାଇ: ବଲିଉଡ୍ ଅଭିନେତା ତଥା ଗରିବଙ୍କ ଦେବଦୂତ ସାଜିଥିବା ସୋନୁ ସୁଦ ପୁଣିଥରେ ଚର୍ଚ୍ଚାକୁ ଆସିଛନ୍ତି । ନିକଟରେ ସେ ସୋସିଆଲ ମିଡିଆରେ ଏକ ଭିଡିଓ ଶେୟାର କରିଛନ୍ତି ଯାହାକୁ ଦେଖିବା ପରେ ସ୍ପଷ୍ଟ ଭାବେ ବାରି ହୋଇ ପଡୁଛି ଯେ ସୋନୁ ପୁଣିଥରେ ଗରିବଙ୍କ ଦେବଦୂତ ପାଲଟି ଯାଇଛନ୍ତି । ଭିଡିଓରେ ଦେଖିବାକୁ ମିଳିଛି ସୋନୁ ବିମାନ ବନ୍ଦରରୁ ବାହାରିବା ପରେ ତାଙ୍କର ଗୋଟିଏ ଝଲକ ପାଇବା ପାଇଁ ବାହାରେ ପ୍ରବଳ ଭିଡ ଲାଗିଛି । ସେଠାରେ ସେ ତାଙ୍କ କାରରେ ବସି ବାହାରିବା ବେଳେ ସୁରକ୍ଷାକର୍ମୀଙ୍କ ସୁରକ୍ଷା ଭିତରେ ବି ଅନେକ ଲୋକ କିଏ କାର୍ରେ ତ ପୁଣି କିଏ ବାଇକରେ ସୋନୁଙ୍କ ସହ ରାଲିରେ ଯିବା ଭଳି ମନେ ହେଉଛି । ଏହି ସମୟରେ ସେ ତାଙ୍କ କାରର ରୁଫ୍ ଅନ୍ କରି ସମସ୍ତଙ୍କୁ ହାତ ହଲାଇ ଧନ୍ୟବାଦ ଜଣାଉଛନ୍ତି । ଏହି ସମୟରେ ମଝି ରାସ୍ତାରେ ଗୋଟିଏ ପରିବାର ହାତରେ ଏକ ବ୍ୟାନର ଧରି ଠିଆ ହୋଇଛନ୍ତି । ମାତା ପିତାଙ୍କ ସହ ଦୁଇଟି କୁନିକୁନି ପିଲାବି ନଜର ଆସୁଛନ୍ତି । ଉକ୍ତ ବ୍ୟାନରରେ ଭୁଲ ଇଂରାଜୀ ହେଉପଛେ ଲେଖାଯାଇଛି, ‘ହେଲ୍ପ ମି ସୋନୁ ସାର୍’ । ଆଉ ଏହାକୁ ଦେଖିବା ପରେ ସୋନୁ ଗାଡିରୁ ଓହ୍ଲାଇ ଆସି ସେମାନଙ୍କ ପାଖକୁ ଯାଉଥିବା ବେଳେ ପରିବାରର ମହିଳା ଜଣକ ଆସି ସୋନୁଙ୍କ ଗୋଡ ଧରିପକାଉଥିବା ଦେଖାଯାଇଛି । ଏହା ଦେଖି ସୋନୁ ସାମାନ୍ୟ ବିଚଳିତ ହୋଇଗଲା ଭଳି ମନେ ହେଉଛି । ହେଲେ ତାଙ୍କ କଥା କିଛି ଶୁଭୁ ନ ଥିବା ବେଳେ ଭିଡିଓରେ ଯାହା ଅନୁମାନ କରାଯାଉଛି ସୋନୁ ନିଶ୍ଚିତ ଭାବେ ଏହି ପରିବାରକୁ ସାହାଯ୍ୟ କରିବାକୁ କଥା ଦେଇଥିବେ ।
