ଭଞ୍ଜନଗର,୨୫।୧୨(ବାବୁଲା ପ୍ରଧାନ)- ଦୀର୍ଘ ୧୭ ବର୍ଷ ପରେ ପୁଣି ଚର୍ଚ୍ଚାକୁ ଆସିଛି ଗସମା ଜଙ୍ଗଲ । ୨୦୦୮ ମସିହା ଫେବୃୟାରୀ ମାସ ୧୫ ତାରିଖ ରାତିରେ ମାଓବାଦୀ ମାନେ ନୟାଗଡ଼ ପୋଲିସ ଅସ୍ତ୍ରାଗାରକୁ ଲୁଟି ନେଇ ଗଞ୍ଜାମ ଜିଲା ତାରସିଂ ଥାନା ଅନ୍ତର୍ଗତ ଗାଲେରୀ ଫାଣ୍ଡି ଅଭିମୁଖେ ଚାଲିଆସିଥିଲେ। ୧୬ ତାରିଖ ପ୍ରତ୍ୟୁଷରେ ମାଓବାଦୀ ମାନେ ଗାଲେରୀ ଫାଣ୍ଡିକୁ ବୋମା ମାଡ କରି ଉଡ଼ାଇ ଦେଇଥିଲେ। ଏହାପରେ ସେମାନେ ଗଞ୍ଜାମ କନ୍ଧମାଳ ଜିଲ୍ଲା ସୀମାରେ ଥିବା ଗସମା ଜଙ୍ଗଲ ଭିତରକୁ ଚାଲିଯାଇଥିଲେ। ଏହା ପୁର୍ବରୁ ସେମାନେ ୧୫ ତାରିଖ ରାତିରେ କମଳାବାରି ତୋଟା, ଢୋଲପିଠା ଛକ ସମେତ ଅନେକ ସ୍ଥାନରେ ରାସ୍ତା ଉପରେ ଗଛ ପକାଇ ଅବରୋଧ କରିବା ସହ ଲ୍ୟାଣ୍ଡ ମାଇନ ବିଛାଇଥିଲେ। ଏହାପରେ ଓଡ଼ିଶା ପୋଲିସ ଏବଂ କେନ୍ଦ୍ରୀୟ ଅର୍ଦ୍ଧସାମରିକ ବାହିନୀ ପକ୍ଷରୁ ଗସମା ଜଙ୍ଗଲରେ ୧୬ ତାରିଖରେ ହିଁ ଜୋରଦାର କମ୍ବିଁ ଅପରେସନ ହୋଇଥିଲା। ସେ ସମୟରେ ପୋଲିସ ୩ ଜଣ ମାଓବାଦୀଙ୍କୁ ଜୀବନ୍ତ ଗିରଫ କରିବା ସହ ଏକାଧିକ ମାଓବାଦୀଙ୍କୁ ମାରିଥିବା ପୋଲିସ ପକ୍ଷରୁ ଦାବି ହୋଇଥିଲା। ମାଓବାଦୀଙ୍କ ପାଲଟା ଗୁଳିରେ ଜଣେ ଅଫିସର୍ ସମେତ ଦୁଇଜଣ କନେଷ୍ଟବଳ ସେ ସମୟରେ ଶହୀଦ ହୋଇଥିଲେ । ପୋଲିସ ଲୁଟ ଅସ୍ତ୍ରସସ୍ତ୍ର ମଧ୍ୟରୁ ଅଧିକାଂଶ ଉଦ୍ଧାର କରିବାରେ ସକ୍ଷମ ହୋଇଥିଲା। କିନ୍ତୁ ପୋଲିସ ସେ ସମୟରେ ଏକାଧିକ ମାଓବାଦୀଙ୍କୁ ହତ୍ୟା କରିଥିବା ଦାବି କରିଥିଲେ ମଧ୍ୟ ଜଣେ ବି ମାଓବାଦୀଙ୍କ ମୃତଦେହକୁ ଉଦ୍ଧାର କରି ପାରି ନ ଥିଲେ। ଏହାପରେ ଦୀର୍ଘ ବର୍ଷ ପର୍ଯ୍ୟନ୍ତ ସଂପୃକ୍ତ ଜଙ୍ଗଲରେ ମାଓବାଦୀ ଗତିବିଧି ବୃଦ୍ଧି ପାଇଥିଲା। ପୋଲିସ ଅନେକ ସମୟରେ ସେଠାରେ କମ୍ବି ଅପରେସନ କରୁଥିଲା। କିନ୍ତୁ ମାଓବାଦୀ ଓ ପୋଲିସ ମୁହାଁମୁହିଁ ହୋଇ ମୃତାହତ ହେବାର ଖବର ନ ଥିଲା।
ବିଗତ କିଛି ବର୍ଷ ହେବ ଗସମା ଜଙ୍ଗଲରେ ମାଓବାଦୀ ଗତିବିଧି ପ୍ରାୟ ବନ୍ଦ ହୋଇଯାଇଥିଲା । ଏହିଭଳି ପରିସ୍ଥିତିରେ କେନ୍ଦ୍ର ସରକାର ୨୦୨୬ ମାର୍ଚ୍ଚ ମାସ ସୁଦ୍ଧା ଦେଶରୁ ମାଓବାଦୀ ଲୋପ କରିବା ପାଇଁ ଆହ୍ବାନ ଦେଇଛନ୍ତି। ତେଣୁ ବିଭିନ୍ନ ରାଜ୍ୟରେ ମାଓବାଦୀ ଦମନ ପ୍ରକ୍ରିୟା ଜୋରଦାର ଚାଲିଛି। ତେଣୁ ପଡୋଶୀ ରାଜ୍ୟରୁ ମାଓବାଦୀ ମାନେ ଓଡ଼ିଶାକୁ ଆସି ବିଗତ କିଛି ମାସ ହେବ ଗସମା ଜଙ୍ଗଲରେ ଡେରା ପକାଇଥିଲେ। ଏନେଇ ଗୁଇନ୍ଦା ବିଭାଗ ସୂଚନା ପାଇବା ପରେ ପୁଣି ଉକ୍ତ ଜଙ୍ଗଲରେ ଏକ ବଡ ଧରଣର ବଡ ଧରଣର ଚଢାଉ ପାଇଁ ପ୍ରସ୍ତୁତି ହୋଇଥିଲା। ତେଣୁ ବିଗତ କିଛିଦିନ ହେବ ଉକ୍ତ ଜଙ୍ଗଲରେ ଚଢାଉ ଜୋରଦାର ହୋଇଥିଲା। ଗୁରୁବାର ସକାଳେ ପୋଲିସ ଓ ମାଓବାଦୀ ମଧ୍ୟରେ ଗସମା ଜଙ୍ଗଲଠାରୁ କିଛି ଦୂର କନ୍ଧମାଳ ଜିଲା ଜଙ୍ଗଲରେ ପ୍ରବଳ ଗୁଳିବିନିମୟ ହୋଇଥିଲା। ଦୀର୍ଘ ସମୟ ପର୍ଯ୍ୟନ୍ତ ଯବାନ ଓ ମାଓବାଦୀ ମଧ୍ୟରେ ଗୁଳି ବିନିମୟ ହୋଇଥିଲା। ଏଥିରେ ୪ ଜଣ ମାଓବାଦୀ ମୃତ୍ୟୁବରଣ କରିଥିବା ଜଣାପଡିଛି । ଏଥିସହ ବୁଧବାର କନ୍ଧମାଳ ଜିଲାର ଅନ୍ୟ ଏକ ଜଙ୍ଗଲରେ ଆଉ ଦୁଇଜଣ ମାଓବାଦୀ ମୃତ୍ୟୁବରଣ କରିଛନ୍ତି। ସଂଗଠନର ଜଣେ ମୁଖ୍ୟ କମାଣ୍ଡର ନିହତ ହୋଇଛନ୍ତି । ଏହି ଚଢ଼ାଉରେ ମାଓବାଦୀ ସଂଗଠନକୁ ବଡ ଧକ୍କା ଲାଗିଛି। ଅନ୍ୟପଟେ ଦୀର୍ଘ ୧୭ ବର୍ଷ ପରେ ଗସମା ଜଙ୍ଗଲ ପୁଣି ଚର୍ଚ୍ଚାର ବିଷୟ ପାଲଟିଛି। ଗୁଳିବିନିମୟ ସମୟରେ ସଂମ୍ପୃକ୍ତ ଅଞ୍ଚଳବାସି ଆତଙ୍କିତ ଅବସ୍ଥାରେ ଥିଲେ। ଅପରପକ୍ଷେ ଆଜି ଅପରାହ୍ନରେ ପୋଲିସ ଫୋର୍ସ ଏକାଧିକ ଗାଡ଼ିରେ ଗାଲେରୀ ଅଞ୍ଚଳରେ ଚଳପ୍ରଚଳ କରୁଥିବା ଜଣାପଡିଛି । ଏବେବି କମ୍ବିଂ ଅପରେସନ ଚାଲିଥିବା ଯୋଗୁ ମୃତାହତ ସଂଖ୍ୟା ବଢିବା ସମ୍ଭାବନା ରହିଛି।
