କାଶୀନଗର,୧୯।୪: ଗଜପତି ଜିଲାର ଏକମାତ୍ର ଏନ୍ଏସି କାଶୀନଗର। ଏହାକୁ ସବୁଜ ସୁନ୍ଦର କରି ଗଢି ତୋଳିବାର ଆବଶ୍ୟକତା ଥିବା ବେଳେ ସେଥିପ୍ରତି ଏନ୍ଏସି ପକ୍ଷରୁ ଗୁରୁତ୍ୱ ଦିଆଯାଉନଥିବା ଅଭିଯୋଗ ହୋଇଛି। ୧୧, ୧୨, ୧୩ ୱାର୍ଡର ଜନବସତି ନିକଟସ୍ଥ ଲେବଲ କ୍ରସିଂ ନିକଟରେ ଜମିରହିଛି କୁଢ଼ କୁଢ଼ ଆବର୍ଜନା। ଫଳରେ ବାୟୁ ଓ ଜଳ ପ୍ରଦୂଷିତ ହେଉଛି। ଦୁର୍ଗନ୍ଧ ଯୋଗୁ ଘର ବାହାରେ ଖୋଲାରେ ଟିକିଏ ବସି ହେଉନାହିଁ। ଏନ୍ଏସି ପକ୍ଷରୁ ଉକ୍ତ ସ୍ଥାନରେ ଆବର୍ଜନା ପକାଯାଉଛି। ବର୍ଷା ହେଲେ ସେଠାରୁ ଦୂଷିତ ଓ ଦୁର୍ଗନ୍ଧଯୁକ୍ତ ପାଣି ଆସି ରାସ୍ତାରେ ଓ ଜନବସତି ଅଞ୍ଚଳରେ ପଶି ଲୋକଙ୍କ ପାଇଁ ଏକ ସଙ୍କଟଜନକ ପରିସ୍ଥିତି ସୃଷ୍ଟି କରୁଛି । ଏ ସମ୍ପର୍କରେ ଖବର ପ୍ରକାଶ ପାଇଥିଲେ ମଧ୍ୟ ଏନ୍ଏସି କର୍ତ୍ତୃପକ୍ଷ ସମସ୍ୟା ସମାଧାନ ନ କରିବା ଦୁର୍ଭାଗ୍ୟଜନକ ବୋଲି ବୁଦ୍ଧିଜୀବୀମାନେ କହିଛନ୍ତି। ସହର ଠାରୁ ଦୂରରେ ଅନ୍ୟତ୍ର କେଉଁଠି ଆବର୍ଜନା ପକାଇବା ପାଇଁ ସ୍ଥାନ ନିରୂପଣ ସହ ତୁରନ୍ତ ଲେବଲ କ୍ରସିଂ ନିକଟସ୍ଥ ଜାଗାରୁ ଆବର୍ଜନା ହଟାଇବା ପାଇଁ ଦାବି ହୋଇଛି।
