ଢେଙ୍କାନାଳ ଅଫିସ, ୨୬।୧୧: ଗଳିକନ୍ଦିରେ କୁଢ଼କୁଢ଼ ଆବର୍ଜନା। ଡଷ୍ଟବିନ୍ ଭର୍ତ୍ତି ହୋଇ ତଳେ ପଡୁଛି। ଦୁର୍ଗନ୍ଧରେ ନାକ ଫାଟୁଛି। ଦୁର୍ଗନ୍ଧମୟ ପରିବେଶ ସୌନ୍ଦର୍ଯ୍ୟ ବିଗାଡୁଛି। ଅଳିଆ ବୋଝରୁ ଆଦର୍ଶ ସହର ଢେଙ୍କାନାଳ ମୁଣ୍ଡ ଟେକି ପାରୁ ନ ଥିବାବେଳେ ପୌରସଂସ୍ଥାର ପରିମଳ ପରିଚାଳନା ଉପରେ ସହରବାସୀ ଉଠାଇଛନ୍ତି ପ୍ରଶ୍ନବାଚୀ।
ପ୍ରାକୃତିକ ପରିବେଶରେ ଭରପୂର ଢେଙ୍କାନାଳକୁ ମିଳିଛି ଆଦର୍ଶ ସହରର ମାନ୍ୟତା। ସହରର ପରିମଳ ବ୍ୟବସ୍ଥା ସଜାଡ଼ିବା, ସୌନ୍ଦର୍ଯ୍ୟକରଣ ବଢ଼ାଇବା ସହ ସହରବାସୀଙ୍କୁ ସ୍ବଚ୍ଛ ପରିବେଶରେ ଜୀବନଯାପନ ଲାଗି ସୁଯୋଗ ଦେବା ନିମନ୍ତେ ପୌରସଂସ୍ଥା ପକ୍ଷରୁୁ ବିଭିନ୍ନ ପ୍ରକଳ୍ପ ମାଧ୍ୟମରେ ଖର୍ଚ୍ଚ ହେଉଛି ଲକ୍ଷାଧିକ ଟଙ୍କା। ହେଲେ ଗଁା ପରିମଳ ଧୋବା ତୁଠରୁ ଭଳି ସହରକୁ ପ୍ରବେଶ କରୁ କରୁ ଆଖିରେ ପଡୁଛି ଦୟନୀୟ ପରିମଳ ପରିଚାଳନାର ଚିତ୍ର। ପ୍ରମୁଖ ରାସ୍ତା ପାର୍ଶ୍ୱ, ଗଳିକନ୍ଦି, ଐତିହ୍ୟ ସମ୍ପନ୍ନ ମନ୍ଦିର, ସରକାରୀ କାର୍ଯ୍ୟାଳୟ ସମ୍ମୁଖରେ ଜମୁଥିବା ଆବର୍ଜନା ଅସ୍ଥାୟୀ ଡମ୍ପିଂୟାର୍ଡର ଭ୍ରମ ସୃଷ୍ଟି କରୁଛି। ପୌରାଞ୍ଚଳର ଆବର୍ଜନା ସଫେଇ ଲାଗି ସ୍ବଚ୍ଛସାଥୀ ନିଯୁକ୍ତ ହୋଇଛନ୍ତି। ପ୍ରତି ଓ୍ବାର୍ଡରୁ ନିୟମିତ ଅଳିଆ ସଂଗ୍ରହ କରିବାକୁ ୨୦ ବ୍ୟାଟେରି ଚାଳିତ ଗାଡ଼ି ନିୟୋଜିତ ହୋଇଛି। ଏଥିସହ ଘରୁ ଆବର୍ଜନା ସଂଗ୍ରହ ଲାଗି ପୃଥକ୍ ଭାବେ ପୌର କର୍ମଚାରୀଙ୍କୁ ଦାୟିତ୍ୱ ଦିଆଯାଇଛି। ଏଥିରେ ଓ୍ବାର୍ଡ ପିଛା ପ୍ରତିମାସରେ ଖର୍ଚ୍ଚ ହେଉଛି ହାରାହାରି ୧ ଲକ୍ଷ ଟଙ୍କା। ଏସବୁ ସତ୍ତ୍ୱେ ୪-୫ ଦିନ ଧରି ଆବର୍ଜନା ଜମି ରହୁଛି। ୩ନଂ. ୱାର୍ଡ ଲଳିତ ନଗରରେ ଅଧିକାଂଶ ପୌର କର୍ମଚାରୀ ରହୁଛନ୍ତି। ସମ୍ପୃକ୍ତ ଓ୍ବାର୍ଡର ବାସିନ୍ଦା ଅଳିଆ ଉଠାଇବା ସମ୍ପର୍କରେ ଅଧିକାରୀଙ୍କୁ ଅବଗତ କରାଇବା ସତ୍ତ୍ୱେ ଏହାକୁ କେହି କର୍ଣ୍ଣପାତ କରୁନାହାନ୍ତି। ସେହିପରି ଆବର୍ଜନା ପରିଚାଳନା ଲାଗି ପୌରସଂସ୍ଥାର ୨୩ ଓ୍ବାର୍ଡରେ ଉଭୟ ପ୍ଲାଷ୍ଟିକ ଏବଂ ଢାଙ୍କୁଣି ଯୁକ୍ତ ଡଷ୍ଟବିନ୍ ରଖାଯାଇଛି। ତେବେ ଦୀର୍ଘଦିନ ଧରି ଏଗୁଡ଼ିକୁ ଖାଲି କରାଯାଉ ନ ଥିବାରୁ ଅଳିଆ ଭର୍ତ୍ତି ହୋଇ ତଳେ ଗଦା ହେଉଛି। ସୂଚନା ଦେବା ସତ୍ତ୍ୱେ ଅଳିଆ ଗାଡି ଆସୁ ନ ଥିବା ଅଭିଯୋଗ ହେଉଛି। ସେହିପରି କୁଞ୍ଜକାନ୍ତସ୍ଥିତ ବ୍ଲକ ଓ ମତ୍ସ୍ୟ ଉପନିର୍ଦ୍ଦେଶକ କାର୍ଯ୍ୟାଳୟ ସମ୍ମୁଖ ପ୍ରମୁଖ ରାସ୍ତା କଡ଼ରେ ଅଳିଆ ଗଦା ହୋଇ ରହୁଛି। ଅଭିଯୋଗ କଲେ ଉପରଠାଉରିଆ ଉତ୍ତର ମିଳୁଛି, ଯାହା ସ୍ଥାନୀୟ ବାସିନ୍ଦାଙ୍କ ମଧ୍ୟରେ ଅସନ୍ତୋଷ ବଢ଼ାଉଛି। ସହରରେ କରୋନା ସଂକ୍ରମଣ ବଢୁଥିବାବେଳେ ପରିମଳ ବ୍ୟବସ୍ଥା ସଜାଡ଼ିବାକୁ ବିଶେଷ ଧ୍ୟାନ ଦିଆଯାଉଥିବା ପୌରସଂସ୍ଥା ପକ୍ଷରୁ କୁହାଯାଉଛି। ଜନତାଙ୍କୁ ସଚେତନ କରିବାକୁ ଡାକବାଜି ଯନ୍ତ୍ର ସହାୟତାରେ ପ୍ରଚାର କରାଯାଉଛି। ହେଲେ ଏସବୁ କେବଳ ଲୋକ ଦେଖାଣିଆ ବୋଲି ଚର୍ଚ୍ଚା ହେଉଛି।
ଏ ସଂକ୍ରାନ୍ତରେ ପୌର ନିର୍ବାହୀ ଅଧିକାରୀ ଅତନୁ କୁମାର ସାମନ୍ତ କୁହନ୍ତି, ଦିନକ ପୂର୍ବରୁ ସଫେଇ ଦାୟିତ୍ୱରେ ଥିବା ସ୍ବଚ୍ଛସାଥୀଙ୍କୁ ଅଳିଆ ଉଠାଇବା ପାଇଁ କୁହାଯାଇଥିଲା। କାହିଁକି ଉଠାଇ ନାହାନ୍ତି ସେ ପଚାରି ବୁଝିବେ ବୋଲି କହି ପ୍ରସଙ୍ଗ ଏଡ଼ାଇ ଯାଇଥିଲେ।
