ଗଞ୍ଜାମ,୧୭ା୫(ଡି.ଏନ.ଏ.):ଗଞ୍ଜାମର ସୁନାଝିଅ ମନସ୍ବିନୀ ମହାରଣା। ଦୁଃସାହସିକ ସାମୁଦ୍ରିକ କ୍ରୀଡ଼ା ଏସୀୟ ଉଇଣ୍ଡ ସର୍ଫିଙ୍ଗ ଚାମ୍ପିୟନଶିପରେ ସେ ସ୍ବର୍ଣ୍ଣ ପଦକ ହାସଲ କରିଛନ୍ତି। ମନସ୍ବିନୀ ଭାରତୀୟ ଆର୍ଏସ୍-ଏକ୍ସ ଶ୍ରେଣୀରେ ଏକ ନମ୍ବର ସ୍ଥାନ ଅଧିକାର କରି ରାଜ୍ୟ ତଥା ଦେଶ ପାଇଁ ଗୌରବ ଆଣି ଦେଇଛନ୍ତି। ଏହି ସଫଳତା ପରେ ତାଙ୍କୁ ବିଭିନ୍ନ ମହଲରୁ ଶୁଭେଚ୍ଛାର ସୁଅ ଛୁଟିଛି। ଗଞ୍ଜାମ ବ୍ଲକ ଅନ୍ତର୍ଗତ ମଲାଡ଼ ପଞ୍ଚାୟତ ପାଣିବନ୍ଧ ଗ୍ରାମର ଭାସ୍କର ମହାରଣା ଓ ପ୍ରମିଳା ମହାରଣାଙ୍କ ଝିଅ ହେଉଛନ୍ତି ମନସ୍ବିନୀ। ମୁମ୍ବାଇରେ ନାଭାଲ ୱାଟରମ୍ୟାନ୍ଶିପ ଟ୍ରେନିଂ ସେଣ୍ଟରଠାରେ ଗତ ୮ ତାରିଖରୁ ଚାଲିଥିବା ଚାମ୍ପିୟନଶିପର ଦ୍ୱିତୀୟ ରାଉଣ୍ଡରେ ମନସ୍ବିନୀ ସ୍ବର୍ଣ୍ଣ ପଦକ ଜିତିଛନ୍ତି। ଏହି ମଲ୍ଟି କ୍ଲାସ ଚାମ୍ପିୟନଶିପ୍ ପ୍ରତିଯୋଗିତାରେ ୯୮ ଜଣ ଖେଳାଳି ଭାଗ ନେଇଥିବା ବେଳେ ସେଥି ମଧ୍ୟରେ ୨୮ ଜଣ ମହିଳା ଖେଳାଳି ଥିଲେ। ଅନ୍ତର୍ଜାତୀୟ ସମୁଦ୍ର ବୁଡାଳି ସବୀର ବକ୍ସଙ୍କ ତତ୍ତ୍ୱାବଧାନରେ ୨୦୧୩ରୁ ମନସ୍ବିନୀ ଏହି ଦୁଃସାହସିକ ସାମୁଦ୍ରିକ କ୍ରୀଡାରେ ଗୋଟିଏ ପରେ ଗୋଟିଏ ସଫଳତା ଅର୍ଜନ କରି ଗଞ୍ଜାମ ପାଇଁ ଗୌରବ ଆଣିବାରେ ଲାଗିଛନ୍ତି।
