ଦିଗପହଣ୍ଡି,୨୬ା୧୦(ଡି.ଏନ୍.ଏ.): ଦୀର୍ଘଦିନ ହେଲା ଗଞ୍ଜାମ-ଗଜପତି ସୀମାନ୍ତ ଶ୍ୟାମସୁନ୍ଦରପୁର, ବାଦପୁର ଓ ପ୍ରତାପପୁର ଗ୍ରାମ ନିକଟସ୍ଥ ଜଙ୍ଗଲରେ ଚୋରା ଦେଶୀମଦ ପ୍ରସ୍ତୁତ କାରବାର ଚାଲିଥିଲା। ଏହି ଖବର ଅବକାରୀ ଗୋଇନ୍ଦାଙ୍କ ନିକଟରେ ସୂଚନା ପହଞ୍ଚିବା ପରେ ଜିଲା ଆରକ୍ଷୀ ଅଧୀକ୍ଷକ ରମେନ୍ଦ୍ର ନାରାୟଣ ନାହାକଙ୍କ ନିର୍ଦ୍ଦେଶକ୍ରମେ ଜିଲା ଉପ-ଅଧୀକ୍ଷକ ବିଜୟ କୁମାର ଧାରୁଆଙ୍କ ତତ୍ତ୍ୱାବଧାନରେ ବ୍ରହ୍ମପୁର ମୋବାଇଲ୍ ଷ୍ଟାଫ୍ ସହ ଦିଗପହଣ୍ଡି ଅବକାରୀ କର୍ମଚାରୀମାନେ ବୁଧବାର ଅତର୍କିତ ଭାବେ ଚଢ଼ାଉ କରି ୧୧୪୦୦ ଲିଟର ପୋଚକୁ ନଷ୍ଟ କରିବା ସହ ୩୯୮ ଲିଟର ଦେଶୀ ମଦ ଜବତ କରିଛନ୍ତି। ଏହି ଚୋରାମଦ ପ୍ରସ୍ତୁତରେ ବ୍ୟବହୃତ ୫୭ଟି ପ୍ଳାଷ୍ଟିକ୍ ଡ୍ରମ୍,୧୦ଟି ପ୍ଲାଷ୍ଟିକ୍ ବାରେଲ୍ ସହ ୩ଟି ହଣ୍ଡା ଜବତ ହୋଇଛି। ଚଢ଼ାଉ ସମୟରେ ଅଭିଯୁକ୍ତମାନେ ଆଗୁଆ ସୂଚନା ପାଇ ଘଟଣାସ୍ଥଳରୁ ଚମ୍ପଟ ମାରିଥିଲେ। ଫଳରେ କୌଣସି ଅଭିଯୁ୍କ୍ତଙ୍କୁ ଗିରଫ କରାଯାଇ ନ ଥିବା ଅବକାରୀ ଏସ୍.ଆଇ ସନ୍ତୋଷ ସାହୁ କହିଛନ୍ତି। ପରେ ଶ୍ୟାମସୁନ୍ଦରପୁର ଗ୍ରାମର ଉଦୟ ମଳିକ ନାମକ ଜଣେ ଯୁବକ କେନାଲ୍ ରାସ୍ତାରେ ଦୁଇଟି ଜାର୍ରେ ଚୋରା ଦେଶୀମଦ ଧରି ଯାଉଥିବା ବେଳେ ଚଢ଼ାଉ କରି ଅଭିଯୁକ୍ତକୁ ଗିରଫ କରିବା ସହ ତାଙ୍କ ଠାରୁ ୩୮ ଲିଟର ଚୋରା ଦେଶୀମଦ ଜବତ କରିଛନ୍ତି। ଏନେଇ ଅଭିଯୁକ୍ତଙ୍କ ବିରୋଧରେ ଅବକାରୀ ମାମଲା ରୁଜୁ କରାଯାଇ ଦିଗପହଣ୍ଡି କୋର୍ଟ ଚାଲାଣ କରାଯାଇଛି। କୋର୍ଟରେ ଜାମିନ ନାମଞ୍ଜୁର ହେବାରୁ ଅଭି୍ଯୁକ୍ତକୁ ଦିଗପହଣ୍ଡି ଉପକାରାଗାରକୁ ପଠାଇ ଦିଆଯାଇଛି। ଏହି ଚଢ଼ାଉରେ ଅନ୍ୟମାନଙ୍କ ମଧ୍ୟରେ ବ୍ରହ୍ମପୁର ଭିଜିଲାନ୍ସ ଏସ୍.ଆଇ ସୁଧାଂଶୁ ମୁଣ୍ଡା,ଦିଗପହଣ୍ଡି ଅବକାରୀ ଏ.ଏସ୍.ଆଇ ବସନ୍ତ ବେହେରା, ପଦ୍ମାବତୀ ସେଠୀ,ସୁଚିତା ଡୁମ୍ଡୁମ୍, ଆଲ୍ଫାଲତା ସାହୁ,ଏନ୍.ତ୍ରିପତି,ସୁଧାକର ଶବର,ସ୍ବୟଂମ୍ଭୁ କହଁର,ନିର ବେହେରା ପ୍ରମୁଖ ବ୍ରହ୍ମପୁର ଅବକାରୀ ମୋବାଇଲ୍ କର୍ମଚାରୀମାନେ ସାମିଲ ଥିଲେ।
