ଦାରିଙ୍ଗବାଡ଼ି,୨୨ା୪(ଡି.ଏନ୍.ଏ.): କନ୍ଧମାଳ ଜିଲା ଦାରିଙ୍ଗବାଡ଼ି ଅଞ୍ଚଳରେ ଘନଘନ ବିଦ୍ୟୁତ୍କାଟକୁ ନେଇ ଜନ ଅସନ୍ତୋଷ ଦାନା ବାନ୍ଧୁଛି। ଦୀର୍ଘ ଘଣ୍ଟା ଧରି ବିଦ୍ୟୁତ ଅଚଳ ଯୋଗୁ ବ୍ୟବସାୟ ପ୍ରତିଷ୍ଠାନ ସମେତ ସରକାରୀ ଏବଂ ବେସରକାରୀ କାର୍ଯ୍ୟାଳୟ ଏକ ପ୍ରକାର ଠପ୍ ହେଇଯାଉଛି। ବିଶେଷ କରି ଆଉ କିଛିଦିନ ପରେ ଛାତ୍ରୀଛାତ୍ରଙ୍କ ପରୀକ୍ଷା ଥିବାରୁ ସେମାନଙ୍କ ପାଠପଢ଼ାରେ ବ୍ୟାହତ ସୃଷ୍ଟି ହୋଇଛି। ଏନେଇ ସଂଯୁକ୍ତା ସାହୁ ନାମକ ଜଣେ ମହିଳା ଜିଲା ପ୍ରଶାସନ ନିକଟରେ ଅଭିନବ ଉପାୟରେ ବିଦ୍ୟୁତ୍ ସମସ୍ୟାର ସମାଧାନ ପାଇଁ ନିବେଦନ କରିଛନ୍ତି । ସାମାଜିକ ଗଣମାଧ୍ୟମରେ ସେ ଏକ ଭିଡିଓ ଭାଇରଲ କରିଛନ୍ତି। ଉକ୍ତ ଭିଡିଓରେ କହିଛନ୍ତି, କରୋନା ପାଇଁ ଦୀର୍ଘ ୨ବର୍ଷ ଧରି ପିଲାଙ୍କ ପାଠପଢ଼ା ବନ୍ଦ ରହିଥିଲା। ଏବେ ପିଲାମାନେ ବିଦ୍ୟାଳୟ ଖୋଲିବା ପରେ ନିୟମିତ ପାଠ ପଢ଼ିବାର ସୁଯୋଗ ପାଇଲେ। ବିଦ୍ୟାଳୟରେ ପଢ଼ିବା ସହ ଘରେ ନିଜ ପାଠ ଅଭ୍ୟାସ କରୁଛନ୍ତି ହେଲେ ଘନଘନ ବିଦ୍ୟୁତ୍କାଟ୍ ଯୋଗୁ ମହମବତୀ ବା ଡିବିରିରେ ପମିବାକୁ ହେଉଛି। ହେଲେ ବିଦ୍ୟୁତ ଆଲୋକରେ ପଢ଼ିବା ଏବଂ ମହମବତୀ ଆଲୋକରେ ପଢ଼ିବା ମଧ୍ୟରେ ଅନେକ ଫରକ ରହୁଛି। ବିଦ୍ୟୁତ୍କୁ ଭରସା କରିଥିବାରୁ ସମସ୍ତଙ୍କ ଘରେ ଡିବିରି ଏବଂ ମହମବତୀ ନାହିଁ। ଫଳରେ ହଟହଟା ଭୋଗୁଛନ୍ତି। ଏଥିପ୍ରତି ବିଦ୍ୟୁତ ବିଭାଗ ଏବଂ ଜିଲା ପ୍ରଶାସନ ଗୁରୁତ୍ୱ ଦେବାକୁ ସଂଯୁକ୍ତା ନିବେଦନ କରିଛନ୍ତି। ଘନଘନ ବିଦ୍ୟୁତ କାଟ୍ ବନ୍ଦ କରାଯାଉ ନ ହେଲେ ମହିଳାମାନେ ରାଜରାସ୍ତାକୁ ଓହ୍ଲାଇବେ ବୋଲି ଦାରିଙ୍ଗବାଡ଼ି ଅଞ୍ଚଳର ଏକାଧିକ ମହିଳା ଚେତାବନୀ ଦେଇଛନ୍ତି।
