ପ୍ୟାରିସ, ୨।୧୦(ଏପି): ପୂର୍ବତନ ଚାମ୍ପିୟନ ଲାଟିଭିଆର ଜେଲେନା ଓଷ୍ଟାପେଙ୍କୋ ଚଳିତ ଫ୍ରେଞ୍ଚ୍ ଓପନ ଗ୍ରାଣ୍ଡସ୍ଲାମ ଟେନିସ ମହିଳା ସିଙ୍ଗଲ୍ସ ତୃତୀୟ ରାଉଣ୍ଡରେ ପ୍ରବେଶ କରିଛନ୍ତି। ଗୁରୁବାର ଅନୁଷ୍ଠିତ ଦ୍ୱିତୀୟ ରାଉଣ୍ଡ ମ୍ୟାଚରେ ସେ ଦ୍ୱିତୀୟ ସିଡ୍ ଚେକ୍ ରିପବ୍ଲିକର କାରୋଲିନା ପ୍ଲିସ୍କୋଭାଙ୍କୁ ୬-୪, ୬-୨ ସେଟ୍ରେ ପରାସ୍ତ କରିଛନ୍ତି। ଓଷ୍ଟାପେଙ୍କୋ ପୂର୍ବରୁ କ୍ୟାରିୟରର ଏକମାତ୍ର ଗ୍ରାଣ୍ଡସ୍ଲାମ ଟାଇଟଲ ଏଠାରେ ୨୦୧୭ରେ ଜିତିଥିଲେ। ସେହିବର୍ଷ ପ୍ଲିସ୍କୋଭା ସେମିଫାଇନାଲରେ ପ୍ରବେଶ କରିଥିଲେ ଏବଂ ସିମୋନା ହାଲେପଙ୍କଠାରୁ ହାରି ଯାଇଥିଲେ। ଅଣସିଡେଡ ଲାଟିଭିଆର ଓଷ୍ଟାପେଙ୍କୋ ପରବର୍ତ୍ତୀ ରାଉଣ୍ଡରେ ୨୯ତମ ସିଡ୍ ସ୍ଲୋଆନେ ଷ୍ଟିଫେନ୍ସ କିମ୍ବା ପାଉଲା ବାଡୋସାଙ୍କୁ ଭେଟିବେ। ଅନ୍ୟ ମହିଳା ସିଙ୍ଗଲ୍ସ ମ୍ୟାଚରେ ପେତ୍ରା କ୍ୱିଟୋଭା ୬-୩, ୬-୩ ସେଟ୍ରେ ଜସମିନ୍ ପାଓଲିନି, ଅଷ୍ଟ୍ରେଲିଆନ ଓପନ ଚାମ୍ପିୟନ ସୋଫିଆ କେନିନ ୩-୬, ୬-୩, ୬-୨ରେ ଆନା ବୋଗ୍ଡାନ, ଡାନିଏଲ ରୋଜ୍ କଲିନ୍ସ ୬-୨, ୬-୩ରେ କ୍ଲାରା ଟୌସନ, ଆରିନା ସାବାଲେଙ୍କା ୭-୬(୮/୬), ୬-୦ ସେଟ୍ରେ ଡାରିଆ କାସାଟକିନାଙ୍କୁ ହରାଇ ତୃତୀୟ ରାଉଣ୍ଡରେ ପ୍ରବେଶ କରିଛନ୍ତି। ଆମେରିକାର କଲିନ୍ସଙ୍କଠାରୁ ହାରିଥିବା ଡେନ୍ମାର୍କର ୧୭ ବର୍ଷୀୟା କ୍ଲାରା କ୍ୱାଲିଫାଇଂ ରାଉଣ୍ଡ ମଧ୍ୟଦେଇ ଆସିଥିଲେ ହେଁ ପ୍ରଥମ ରାଉଣ୍ଡରେ ୨୧ତମ ସିଡ୍ ଜେନିଫର ବ୍ରାଡିଙ୍କୁ ହରାଇ ଉଲ୍ଲେଖନୀୟ ସଫଳତା ପାଇଥିଲେ। ୧୯୮୯ ପରେ କୌଣସି ଡେନମାର୍କ ମହିଳାଭାବେ ସେ ପ୍ରଥମଥରପାଇଁ କୌଣସି ବଡ଼ ଟୁର୍ନାମେଣ୍ଟର ଦ୍ୱିତୀୟ ରାଉଣ୍ଡରେ ପ୍ରବେଶ କରିଥିଲେ।
ପୁରୁଷ ସିଙ୍ଗଲ୍ସ
ଜୋକୋଭିଚ୍, ଡିମିଟ୍ରୋଭ୍ଙ୍କ ଅଗ୍ରଗତି
ପ୍ରତିଯୋଗିତାର ପୁରୁଷ ସିଙ୍ଗଲ୍ସ ଦ୍ୱିତୀୟ ରାଉଣ୍ଡରେ ସର୍ବିୟାର ନୋଭାକ୍ ଜୋକୋଭିଚ୍ ୬-୧, ୬-୨, ୬-୨ ସେଟ୍ରେ ରିକାଡର୍ସ ବେରାନ୍କିସ୍ଙ୍କୁ ହରାଇ ହରାଇ ତୃତୀୟ ରାଉଣ୍ଡରେ ପହଞ୍ଚତ୍ଛନ୍ତି। ସେହିପରି କ୍ରିଷ୍ଟିଆନ ଗର୍ସିନ ୬-୭(୫/୭), ୬-୨, ୭-୬(୭/୩), ୬-୪ ସେଟ୍ରେ ମାକ୍ର ପୋଲମାନ୍ସଙ୍କୁ ଏବଂ ଗ୍ରିଗୋର ଡିମିଟ୍ରୋଭ୍ ୬-୪, ୭-୬(୭/୫), ୬-୧ ସେଟ୍ରେ ଆନ୍ଦ୍ରେଜ ମାର୍ଟିନଙ୍କୁ ହରାଇ ଦେଇଛନ୍ତି। ଅନ୍ୟ ଦ୍ୱିତୀୟ ରାଉଣ୍ଡ ମ୍ୟାଚରେ ମଧ୍ୟରେ କରେନ ଖାଚାନୋଭ ୬-୧, ୬-୭(୪/୭), ୭-୬(୯/୭), ୭-୬(୭/୨) ସେଟ୍ରେ ଜିରି ଭେସ୍ଲି, ଟିଆଗୋ ମଣ୍ଟେରିଓ ୭-୬(୭/୫), ୬-୪, ୬-୧ ସେଟ୍ରେ ମାର୍କୋସ ଗିରନ, ପାବ୍ଲୋ କାରେନୋ ବୁଷ୍ଟା ୬-୩, ୬-୨, ୬-୧ ସେଟ୍ରେ ଗୁଇଡୋ ପିଲ୍ଲା, ମାର୍ଟନ ଫୁକ୍ସେିଭିକ୍ସ ୭-୬(୭/୨), ୬-୩, ୭-୫ ସେଟ୍ରେ ଆଲବର୍ଟ ରାମୋସଙ୍କୁ ପରାସ୍ତ କରିଛନ୍ତି।
