ନୂଆଦିଲ୍ଲୀ,୧୭।୯(ପି.ଟି.): ଏଥର ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ଦୁର୍ନୀତ ରୋକିବାକୁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ଦୁର୍ନୀତି ନିବାରଣ ବିଭାଗ (ଏସିୟୁ) ଏକ ନୂଆ ପଦକ୍ଷେପ ଗ୍ରହଣ କରିବ। ଏସିୟୁ ଫ୍ରଡ୍ ଡିଟେକ୍ସନ ସର୍ଭିସ (ଏଫ୍ଡିଏସ୍)ର ସାହାଯ୍ୟ ନେବ। ଏହା ଦ୍ୱାରା ବେଟିଂ ତଥା ଅନ୍ୟ ଦୁର୍ନୀତ ରୋକିବାକୁ ପ୍ରୟାସ କରାଯିବ ବୋଲି ବୋର୍ଡ ତରଫରୁ କୁହାଯାଇଛି।
ଏଥର ଫାଙ୍କା ଷ୍ଟାଡିୟମରେ ଆଇପିଏଲ୍ ମ୍ୟାଚ୍ ସବୁ ଖେଳାଯିବ। ଦୁର୍ନୀତି ରୋକିବା ପାଇଁ ଏସିୟୁ ମୁଖ୍ୟ ଅଜିତ ସିଂଙ୍କ ସମ୍ମୁଖରେ ବଡ଼ ଚ୍ୟାଲେଞ୍ଜ ରହିଛି। ଏଥିପାଇଁ ବିସିସିଆଇ ୟୁନାଇଟେଡ କିଙ୍ଗଡମ (ୟୁକେ)ର କମ୍ପାନୀ ସ୍ପୋର୍ଟରାଡାର ସହ ଏକ ଚୁକ୍ତିରେ ସ୍ବାକ୍ଷର କରିଛି। ଏସିୟୁ ସହିତ ଏହି କମ୍ପାନୀ ମିଳିତ ଭାବେ କାର୍ଯ୍ୟ କରିବ। ଏଥିପାଇଁ କମ୍ପାନୀ ତା’ର ଇଣ୍ଟିଗ୍ରିଟି ସର୍ଭିସ ଦେବ ବୋଲି ବୋର୍ଡ କହିଛି।
ଏହାପୂର୍ବରୁ ସ୍ପୋର୍ଟରାଡାର ଫିକ୍ସିଂ ଦ୍ୱାରା ପ୍ରଭାବିତ ହୋଇଥିବା ଗୋଆ ଫୁଟବଲ ଲିଗ୍ରେ କାର୍ଯ୍ୟ କରିଛି। ଫିଫା, ୟୁଇଏଫ୍ଏ ଓ ବିଶ୍ୱର ଅନ୍ୟ ଶ୍ରେଷ୍ଠ ଲିଗ୍ଗୁଡିକ ସହିତ ଏହି କମ୍ପାନୀ ମିଳିତ ଭାବେ କାର୍ଯ୍ୟକରି ବେଶ୍ ସଫଳତା ହାସଲ କରିଛି। ବିସିସିଆଇ ଏସିୟୁ କିଛିଦିନ ତଳେ ତାମିଲନାଡୁ ପ୍ରିମିୟର ଲିଗ୍ (ଟିଏନ୍ପିଏଲ୍) ବେଟିଂକୁ ରୋକିବାରେ ପ୍ରୟାସ କରି ସଫଳତା ହାସଲ କରିଥିଲା।
ଏଫ୍ଡିଏସ୍ ଦ୍ୱାରା ବେଟିଂ ସମ୍ପର୍କିତ ସବୁ ପ୍ରକାର କାର୍ଯ୍ୟକଳାପକୁ ଚିହ୍ନଟ କରିହେବ ବୋଲି ସ୍ପୋର୍ଟରାଡାର ତରଫରୁ କୁହାଯାଇଛି। ଏଥିପାଇଁ ସ୍ପୋର୍ଟରାଡାର ବୈଷୟିକ ଦୃଷ୍ଟିକୋଣରୁ ବେଶ୍ ଉନ୍ନତ ରହିଛି। ଏଥିପାଇଁ କମ୍ପାନୀ ୬୦୦ ସ୍ବାଧୀନ ବୁକ୍ମେକର୍ସଙ୍କୁ ଟ୍ରାକ୍ କରିବାର କ୍ଷମତା ରଖୁଛି। ପ୍ରତ୍ୟେକ ଦିନ ୫୦ ଲକ୍ଷ ଡାଟା ପ୍ରକ୍ରିୟାରେ ସାମିଲ କରିବ ଏହି କମ୍ପାନୀ। ବେଟିଂ ଓ ଦୁର୍ନୀତିକୁ ରୋକିବାକୁ ବିସିସିଆଇ ଗୁରୁତ୍ୱପୂର୍ଣ୍ଣ ପଦକ୍ଷେପ ଗ୍ରହଣ କରିଛି ବୋଲି ବୋର୍ଡର ଜଣେ ବରିଷ୍ଠ ଅଧିକାରୀ କହିଛନ୍ତି। ତେବେ ଆଗାମୀ ଆଇପିଏଲ୍ରେ ବୋର୍ଡର ଏହି ପଦକ୍ଷେପ କେତେ ସଫଳ ହେଉଛି ତାହା ଦେଖିବାକୁ ବାକି ରହିଲା।
