ଦିଗପହଣ୍ଡି,୩୧|୧୦(ଅଶେଷ ନାଥ ମିଶ୍ର) ଗଞ୍ଜାମ ଜିଲା ଦିଗପହଣ୍ଡି ବ୍ଲକ କୁଶପଡ଼ା ପଞ୍ଚାୟତ କେ.ସାମନ୍ତରାପୁର ଗ୍ରାମର ପି. ମିନି ରେଡ୍ଡୀ ନାମ୍ନୀ ଜଣେ ଗର୍ଭବତୀ ମହିଳା ଙ୍କୁ ମମତା ଯୋଜନାରେ ୯ ହଜାର ଟଙ୍କା ମିଳିବାର ପ୍ରତିଶ୍ରୁତି ଦେଇ ସାଇବର ଅପରାଧି ମାନେ ତାଙ୍କ ୨ ଟି ବ୍ୟାଙ୍କ ଜମାଖାତା ରୁ ୧,୨୭,୩୯୩ ଟଙ୍କା ଲୁଟି ନେଇଥିବା ଜଣାପଡିଛି।ଠକେଇର ଶିକାର ହୋଇଥିବା ମିନି ଏନେଇ ଦିଗପହଣ୍ଡି ଥାନାରେ ଏତଲା ଦେବାପରେ ପୋଲିସ ମାମଲା ନଂ.୪୪୮/୨୬ ବିଏନଏସ ର ଦଫା – ୩୧୯(୨)/୩୧୮(୪) ଅନୁଯାୟୀ ମକଦ୍ଦମା ରୁଜୁ କରି ତଦନ୍ତ ଚଳାଇଛନ୍ତି।ସାଇବର ଅପରାଧି ମାନେ ପ୍ରଥମେ ଗ୍ରାମର ଆଶାକର୍ମୀ ଏମ୍. ଜୟନ୍ତୀ ରେଡ୍ଡୀଙ୍କୁ ଫୋନ କରି ଗ୍ରାମର ଗର୍ଭବତୀ ମହିଳାଙ୍କ ପାଇଁ ମମତା ଯୋଜନାରେ ଆର୍ଥିକ ସହାୟତା ଯୋଗାଇଦିଆଯିବ।ତେଣୁ ଗ୍ରାମର କୌଣସି ଗର୍ଭବତୀ ମହିଳାଙ୍କ ଫୋନ ନଂ କୁ କନଫେରେନ୍ସ ଯୋଗେ ଯୋଗାଯୋଗ କରିବାକୁ ଜଣେ ବ୍ୟକ୍ତି ଫୋନ କରି ଆଶାକର୍ମୀ ଙ୍କୁ କହିଥିଲେ।ସେ ଭୁବନେଶ୍ୱର ସ୍ଥିତ ମହିଳା ଓ ଶିଶୁ ବିକାଶ ବିଭାଗ ର ଅଫିସର ବୋଲି ନିଜର ପରିଚୟ ଦେଇଥିଲେ।ଆଶାକର୍ମୀ ଜଣକ ଗ୍ରାମର ଗର୍ଭବତୀ ମହିଳା ମିନି ଙ୍କୁ ଫୋନ କରି କନଫେରେନ୍ସ ଜରିଆରେ ଯୋଗାଯୋଗ କରାଇ ଦେଇଥିଲେ।ପରେ ଅତି ଚତୁରତାର ସହ ସାଇବର ଅପରାଧି ଜଣକ ମିନିଙ୍କୁ ମମତା ଯୋଜନାରୁ ସହାୟତା ଅର୍ଥରାଶି ମିଳିବାର ପ୍ରଲୋଭନ ଦେଖାଇ ତାଙ୍କୁ ମୋବାଇଲ ରେ ଫୋନ – ପେ ଆପ୍ଲିକେସନ୍ ଖୋଲିବାକୁ କହିଥିଲେ।ପରେ ସେ ପଠାଇଥିବା ଏକ ଲିଙ୍କ୍ କୁ କ୍ଲିକ୍ କରିବାକୁ କହିଥିଲେ। ମିନି ତାଙ୍କ ଫୋନ ରେ ଲିଙ୍କ୍ ଖୋଲିବା ପରେ କୌଶଳକ୍ରମେ ତାଙ୍କ ୟୁପିଆଇ ପିନ୍ ନଂ ମାଗିନେଇ ଦିଗପହଣ୍ଡି ସ୍ଥିତ ୨ ଟି ରାଷ୍ଟ୍ରାୟତ ବ୍ୟାଙ୍କ ଶାଖା ରେ ଥିବା ଜମାଖାତା ରୁ ପର୍ଯ୍ୟାୟ କ୍ରମେ ୧ ଲକ୍ଷ ୨୭,୩୯୩ ଟଙ୍କା ଲୁଟି ନେଇଥିଲେ ବୋଲି ଏତଲାରେ ଉଲ୍ଲେଖ ରହିଛି।ମିନି ଙ୍କ ମୋବାଇଲ କୁ ଟଙ୍କା ଉଠାଣ ସମ୍ପର୍କିତ ମେସେଜ ଆସିବା ପରେ ସେ ଅବାକ୍ ହୋଇଯାଇଥିଲେ। ଏନେଇ ସେ ଆଶାକର୍ମୀ ଙ୍କୁ ସମସ୍ତ ଘଟଣା ଜଣାଇଥିଲେ।ପରେ ଉଭୟେ ପରିବାର ଲୋକଙ୍କ ସହବ୍ରହ୍ମପୁର ସାଇବର ଥାନା ଏବଂ ଦିଗପହଣ୍ଡି ଥାନାରେ ପହଞ୍ଚି ଏତଲା ଦେବା ପରେ ପୋଲିସ ମକଦ୍ଦମା ରୁଜୁ କରିଥିବା ମିନି କହିଛନ୍ତି।
Dharitri – Odisha’s No.1 Odia Daily
