ବେଜିଂ,୨୦।୮: ରଖେ ହରି ମାରେ କିଏ। ଅର୍ଥାତ୍ ଯାହାକୁ ଭଗବାନ ରକ୍ଷା କରିବାକୁ ଚାହାନ୍ତି ତା’କୁ କୌଣସି ଶକ୍ତି କ୍ଷତି ପହଞ୍ଚାଇପାରେ ନାହିଁ। ଏଭଳି କିଛି ଘଟିଛି ଜଣେ ୪ ବର୍ଷର ଶିଶୁ ସହ। ୧୮ ମହଲା ସ୍ଥିତ ଫ୍ଲାଟ୍ର ଝରକାରୁ ଜଣେ ଶିଶୁ ଖସିପଡ଼ିଥିଲେ। କିନ୍ତୁ ଭଗବାନଙ୍କ ଦୟାରୁ ସେ ବଞ୍ଚିଯାଇଛନ୍ତି। ଏହି ଦୃଶ୍ୟ ହେଉଛି ଚାଇନାର ହୁବଇ ପ୍ରାନ୍ତର ଶିଆଂୟାଂଗ ସହରର। ଅଗଷ୍ଟ ୬ରେ ଉକ୍ତ ସହରରେ ରହୁଥିବା ଜଣେ ୪ବର୍ଷର ଶିଶୁ ନିଜ ଜେଜେମା’ଙ୍କ ସହ ଘରେ ଏକୁଟିଆ ଥିବା ବେଳେ ମା’ବାପା ଘରୁ ବାହାରକୁ ଯାଇଥିଲେ। ଉକ୍ତ ଶିଶୁ ସୋଫା ଉପରେ ଚଢ଼ି ଏକୁଟିଆ ଖେଳୁଥିବା ବେଳେ ହଠାତ୍ ଝରାକାରୁ ୧୮୦ ଫୁଟ ତଳକୁ ଖସିପଡ଼ିଥିଲେ। କିନ୍ତୁ ଭାଗ୍ୟବଶତଃ ତଳକୁ ଖସି ପଡ଼ିବା ସମୟରେ ସେ ଏକ ଗଛରେ ଅଟକିଯାଇଥିଲେ। ଉକ୍ତ ଶିଶୁ ଜୀବିତ ଥିବା ବେଳେ ଗୁରୁତର ଆହତ ହୋଇଛନ୍ତି। ତାଙ୍କୁ ସଙ୍ଗେ ସଙ୍ଗେ ସ୍ଥାନୀୟ ଲୋକେ ହସ୍ପିଟାଲକୁ ନେଇଥିଲେ। ବର୍ତ୍ତମାନ ହସ୍ପିଟାଲର ଆଇସିୟୁରେ ତାଙ୍କର ଚିକିତ୍ସା ଚାଲିଥିବା ବେଳେ ଏବେ ସ୍ବାସ୍ଥ୍ୟବସ୍ଥା ସ୍ଥିର ରହିଛି ବୋଲି ଶିଶୁଙ୍କ ପିତା କହିଛନ୍ତି। ଅନ୍ୟପଟେ କେତେକ ସ୍ଥାନରେ ଶିଶୁଙ୍କୁ ଜୋରରେ ଆଘାତ ଲାଗିଥିବା ବେଳେ ତାଙ୍କର ଜୀବନ ବଞ୍ଚିଯିବା କୌଣସି ଚମତ୍କାରରୁ କମ୍ ନୁହେଁ ବୋଲି ଚିକିତ୍ସା କରୁଥିବା ଡାକ୍ତର କହିଛନ୍ତି।
