କରାଚୀ,୧।୫ : ପୂର୍ବତନ ପାକିସ୍ତାନ ପେସର ମହମ୍ମଦ ସାମି କ୍ୟାରିୟର ଆରମ୍ଭରୁ ଦ୍ରୁତଗତିରେ ବୋଲିଂ କରିବା ପାଇଁ ଜଣାଯାଉଥିଲେ। ସେ ଘଣ୍ଟା ପ୍ରତି ୧୪୫ରୁ ୧୫୦ କିମି ବେଗରେ ବଲ ପକାଉଥିଲେ। ଶୋଏବ ଅଖତରଙ୍କ ସହ ମିଶି ପ୍ରତିପକ୍ଷ ବ୍ୟାଟରଙ୍କୁ ଭୟଭିତ କରୁଥିଲେ। ଏହି ପୂର୍ବତନ ପାକିସ୍ତାନ ପେସର ଗୋଟିଏ ମ୍ୟାଚ୍ରେ ଘଣ୍ଟା ପ୍ରତି ୧୬୦ କିମି ବେଗରେ ଦୁଇ ଥର ବୋଲିଂ କରିଥିବା ଦାବି କରିଛନ୍ତି। କିନ୍ତୁ ସେହି ମ୍ୟାଚ୍ରେ ସ୍ପିଡ୍ ଗନ କାମ କରୁ ନ ଥିବାରୁ ବଲର ଗତି ମପାଯାଇ ପାରି ନ ଥିଲା।
”ମୁଁ ଗୋଟିଏ ମ୍ୟାଚ୍ରେ ଦୁଇ ଥର ୧୬୦ରୁ ଅଧିକ କିମି ବେଗରେ ବୋଲିଂ କରିଛି। ଗୋଟିଏ ୧୬୨ ଓ ଅନ୍ୟ ବଲର ଗତି ୧୬୪ କିମି ଥିଲା। ତା’ ପରେ ବୋଲିଂ ମେସିନ (ସ୍ପିଡ୍ ଗନ) କାମ କରୁ ନ ଥିବା କୁହାଗଲା। ଏଣୁ ବଲକୁ ହିସାବକୁ ନିଆଗଲା ନାହିଁ। କିନ୍ତୁ ଯଦି ମୋଟ ଉପରେ ଦେଖିବା, ଯିଏବି ୧୬୦ରୁ ଅଧିକ ବେଗରେ ବୋଲିଂ କରିଛନ୍ତି, ସେ ଥରେ କିମ୍ବା ଦୁଇ ଥର ଏହି ଗତି ହାସଲ କରିଛନ୍ତି। ଏହାର ଅର୍ଥ ନୁହେଁ, ସେମାନେ ନିୟମିତ ଭାବେ ଏହି ଗତିରେ ବୋଲିଂ କରନ୍ତି“ ବୋଲି ଶାମି କହିଛନ୍ତି। ଉଲ୍ଲେଖଯୋଗ୍ୟ, ଅନ୍ତର୍ଜାତୀୟ କ୍ରିକେଟରେ ଦ୍ରୁତତମ ବଲ ପକାଇବାର ରେକର୍ଡ ଶୋଏବ ଅଖତରଙ୍କ ନାମରେ ରହିଛି। ୨୦୦୨ରେ ସେ ନ୍ୟୁଜିଲାଣ୍ଡ ବିପକ୍ଷରେ ଘଣ୍ଟା ପ୍ରତି ୧୬୧ କିମି ବେଗ ହାସଲ କରିଥିଲେ। ପାକିସ୍ତାନ ପାଇଁ ଅନ୍ତର୍ଜାତୀୟ ସ୍ତରରେ ଶାମି ୩୬ ଟେଷ୍ଟ, ୮୭ ଦିନିକିଆ ଓ ୧୩ଟି୨୦ ଖେଳି ମୋଟ ୨୨୩ ଉଇକେଟ ନେଇଛନ୍ତି।
