ଦେବଗଡ,୬।୮(ଶଶାଙ୍କ ଶେଖର ଝାଙ୍କର) : ଦେବଗଡ ସହରର ଜଣେ ଯୁବତୀଙ୍କୁ ବିବାହ ପରେ ଯୌତୁକ ନିର୍ଯାତନା ଓ ହତ୍ୟା ଉଦ୍ୟମ ଅଭିଯୋଗରେ ଦେବଗଡ ଥାନା ପୋଲିସ ଅନୁଗୋଳର ଜଣେ ଯୁବକଙ୍କୁ ଗିରଫ କରି ବୁଧବାର କୋର୍ଟ ଚାଲାଣ କରିଥିବା ଜଣାପଡିଛି। ପୋଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ ଭୁବନେଶ୍ୱର ସ୍ଥିତ ଜଗନ୍ନାଥ ନଗର ଜିଜିପି କଲୋନୀ( ମଂଚେଶ୍ୱର)ର ଚିନ୍ମୟ ମିଶ୍ରଙ୍କ ପୁଅ ସବ୍ୟସାଚୀ ମିଶ୍ର ଗତ ୨୦୨୩ ଡିସେମ୍ବର ୮ ତାରିଖ ଦିନ ଦେବଗଡ ପୌରାଂଚଳ ଶାସନ ସାହିର ପୂର୍ବତନ ବିଧାୟକ ସୁବାସ ଚନ୍ଦ୍ର ପାଣିଗ୍ରାହୀଙ୍କ ଝିଅ ସୋନାଲି ପାଣିଗ୍ରାହୀଙ୍କୁ ହିନ୍ଦୁ ରୀତିନୀତି ସହିତ ବିବାହ କରିଥିଲେ । ବିବାହ ସମୟରେ ସୋନାଲୀଙ୍କ ପରିବାର ଲୋକେ ସାମର୍ଥ୍ୟ ଅନୁଯାୟୀ ଘରକରଣା ସାମଗ୍ରୀ ସହିତ ୧୦୭ ଗ୍ରାମର ସୁନା ଅଳଙ୍କାର ପ୍ରଦାନ କରିଥିଲେ । ବିବାହ ପରେ ୨୦୨୪ ମାର୍ଚ୍ଚ ମାସ ୮ ତାରିଖ ସ୍ବାମୀ- ସ୍ତ୍ରୀ(ସବ୍ୟସାଚୀ ଓ ସୋନାଲି) ଗୋଆ ବୁଲିବାକୁ ଯାଇଥିଲେ । ତେବେ ଏହା ପୂର୍ବରୁ ସୋନାଲୀଙ୍କ ଶାଶୂ(ସବ୍ୟସାଚୀଙ୍କ ମା’) ଗୋଆ ଯିବା ସମୟରେ ସୁନା ଅଳଙ୍କାର ନେବାକୁ ମନା କରିବା ସହ ଲକରରେ ରଖିଦେବାକୁ କହି ସୁନା ଅଳଙ୍କାର ଗୁଡିକୁ ମାଗି ନେଇଥିଲେ । ସବ୍ୟସାଚୀ ଓ ସୋନାଲି ଗୋଆରୁ ଫେରିବା ପରେ ସୋନାଲିଙ୍କ ଶାଶୂ ଓ ଶ୍ୱଶୁର ବାପଘରୁ ଅଧିକ ସୁନା ଓ ଟଙ୍କା ଆଣିବାକୁ କହି ନାନା ମାନସିକ ନିର୍ଯାତନା ଦେଇଥିଲେ । ଅନ୍ୟପକ୍ଷରେ ସ୍ବାମୀ ସବ୍ୟସାଚୀ ନିଶା (ଡ୍ରଗ୍ସ)ଖାଉଥିବା ଜାଣିବାକୁ ପାଇ ସୋନାଲି ଶ୍ୱଶୁର(ସବ୍ୟସାଚୀଙ୍କ ପିତା)ଙ୍କୁ ଜଣାଇବାରୁ ସବ୍ୟସାଚୀ ତାଙ୍କୁ କୋଠରୀ ଭିତରେ ପୁରାଇ ପ୍ରବଳ ମାଡ ମାରିଥିଲେ ହେଁ କେହି ମନା କରିନଥିଲେ । ୨୦୨୪ ଏପ୍ରିଲ ୧୮ ତାରିଖ ଦିନ ସୋନାଲିଙ୍କୁ ତାଙ୍କ ଶ୍ୱଶୁର ‘ତୁମେ ତୁମ ସ୍ବାମୀଙ୍କ ସହିତ ରହିଲେ ସେ ଆଉ ଖରାପ ବାଟରେ ଯିବନାହିଁ ’ବୋଲି କହିବାସହ ପୁଅ ସବ୍ୟଚାସୀ ଅନୁଗୋଳରେ ଏକ ଘର ଦେଖିଥିବା ଦର୍ଶାଇ ବାପା(ସୋନାଲିଙ୍କ ବାବା)ଙ୍କୁ କହି ଉକ୍ତ ଘରଟି କିଣିଦେବାକୁ ପରାମର୍ଶ ଦେଇଥିଲେ । ସୋନାଲି ଏକଥା ତାଙ୍କ ଭାଇଙ୍କୁ ଜଣାଇବାରୁ ଏଥିରେ ସେ ରାଜି ହେବାସହ ସୋନାଲିଙ୍କ ନାମରେ ଉକ୍ତ ଘରଟି କିଣିବାକୁ ଆବଶ୍ୟକ କାଗଜପତ୍ର ପଠାଇବାକୁ କହିଥିଲେ । ଏକଥା ଶୁଣି ସବ୍ୟସାଚୀ(ସୋନାଲିଙ୍କ ସ୍ବାମୀ)ରାଗିଯିବା ସହ ତାଙ୍କ ମା’(ସବ୍ୟସାଚୀଙ୍କ ମା’)ଙ୍କ ନାମରେ କିଣିବାକୁ ପରାମର୍ଶ ଦେବାସହ ଏହା ନହେଲେ ସେ ସୋନାଲିଙ୍କୁ ରଖିବେ ନାହିଁ ବୋଲି କହିଥିଲେ । ସୋନାଲିଙ୍କ ବଡଭାଇ ଗତ ୨୦ ୨୪ ଅଗଷ୍ଟ ମାସ ୧୯ ତାରିଖରେ ଉଭୟ (ସୋନାଲି ଓ ସବ୍ୟସାଚୀ)ଙ୍କୁ ଫୋନ ଯୋଗେ ଦେବଗଡ ଆସିବାକୁ କହିଥିଲେ ଏବଂ ଏହାପର ଦିନ ଅର୍ଥାତ ୨୦ ତାରିଖ ଦିନ ଉଭୟେ ଦେବଗଡ ଆସିଥିଲେ । ସୋନାଲି ଓ ସବ୍ୟସାଚୀ ସେହିଦିନ ସୋନାଲିଙ୍କ ବାପ ଘରେ ଥିବା ସମୟରେ ସୋନାଲିଙ୍କ ବଡଭାଇ ଆଲୋକ ଭଉଣୀ ସୋନାଲି ନାମରେ ଉକ୍ତ ଘରଟି କିଣିବାକୁ ସବ୍ୟସାଚୀଙ୍କୁ ପ୍ରସ୍ତାବ ଦେଇଥିଲେ । ମାତ୍ର ସବ୍ୟସାଚୀ କିଛି ନକହି ଚୁପ ରହିଥିଲେ । ଆଲୋକ ଖାଇବାକୁ ଯାଇଥିବା ସମୟରେ ସବ୍ୟସାଚୀ ସୋନାଲୀଙ୍କୁ ଉପରେ ରାଗିଯାଇ ତାଙ୍କ( ସବ୍ୟସାଚୀଙ୍କ) ମା’ଙ୍କ ନାମରେ କିଣିବାକୁ କାହିଁକି ଭାଇଙ୍କୁ କହୁନାହୁ ବୋଲି ପଚାରିଥିଲେ । ସୋନାଲି ଏଥିରେ ରାଜି ନହେବାରୁ ସବ୍ୟସାଚୀ ତାଙ୍କୁ ଲାତ ମାରିବାସହ ହତ୍ୟା ଧମକ ଦେଇଥିଲେ । ଏପରିକି ସୋନାଲିଙ୍କର ତଂଟିଚିପି ହତ୍ୟା ଉଦ୍ୟମ କରିବାରୁ ସୋନାଲି ଚେତାଶୂନ୍ୟ ହୋଇପଡିଥିଲେ । ତାଙ୍କର ଚେତା ଫେରିବା ପରେ ସେ ଡାକ୍ତରଖାନାରେ ଥିବା ଏବଂ ତାଙ୍କ ଭାଇ ଓ ଡ୍ରାଇଭର ତାଙ୍କୁ ଉଦ୍ଧାର କରିଥିବା ଜାଣିବାକୁ ପାଇଥିଲେ । ସେହିପରି ସବ୍ୟସାଚୀ ତାଙ୍କୁ ଛାଡି ତାଙ୍କ ଘରକୁ ଚାଲିଯାଇଥିଲେ । ଏହା ପରଠାରେ ସୋନାଲିଙ୍କ ବାପା ଓ ମା’ ଅନେକ ବାର ସବ୍ୟସାଚୀଙ୍କ ଘରକୁ ଯାଇ ଯୋଗାଯୋଗ କରିବାରୁ ସବ୍ୟସାଚୀଙ୍କ ପରିବାର ଲୋକେ କଥାବାର୍ତ୍ତା କରିବୁ ଓ ସୋନାଲିଙ୍କୁ ନେଇ ଆସିବୁ ବୋଲି ପ୍ରତିଶ୍ରୁତି ଦେଇଥିଲେ । ମାତ୍ର ପ୍ରତିଶ୍ରୁତି ପାଳନ କରିନଥିଲେ । ଗତ ଏପ୍ରିଲ ୧୧ ତାରିଖରେ ସେମାନେ ଅନୁଗୋଳ ଯାଇ ସବ୍ୟସାଚୀଙ୍କୁ ସାକ୍ଷାତ କରିବାରୁ ସେ କୌଣସି ସମାଧାନ ନାହିଁ ବୋଲି ଉତ୍ତରଦେବା ସହିତ ଆଗ ଜାଗା କିଣିଦିଅ । ତା’ ପରେ ଯାଇ ଆଣିବା କଥା ବିଚାର କରାଯିବ ବୋଲି ଉତ୍ତର ଦେଇଥିଲେ । ଫଳରେ ସୋନାଲି ବାଧ୍ୟ ହୋଇ ଗତ ଏପ୍ରିଲ ୧୩ ତାରିଖରେ ଦେବଗଡ ଥାନାରେ ଏନେଇ ଲିଖିତ ଅଭିଯୋଗ କରିଥିଲେ । ଅଭିଯୋଗ ଅଧାରରେ ଦେବଗଡ ଥାନା ପୋଲିସ କେସ୍ ନଂ-୧୯୫/୨୬, ବିଏନଏସ୍ର ଦଫା-୮ ୫/୨୯୬/୧୧୫(୨)୧୦୯(୧) /୩୫୧(୩)/୩ ରେ ଏକ ମାମଲା ଋଜୁକରି ଘଟଣାର ତଦନ୍ତ ଚଲାଇଥିଲା । ଅଭିଯୁକ୍ତ ସବ୍ୟସାଚୀଙ୍କୁ ଅନୁଗୋଳରୁ ଗିରଫ କରିବାପରେ କୋର୍ଟଚାଲାଣ କରିଥିବା ଜଣାପଡିଛି ।
