ସମ୍ବଲପୁର,୨୨।୧୨(ପ୍ରମୋଦ ବହିଦାର): ହୀରାକୁଦ ଜଳଭଣ୍ଡାରରେ ବିଦେଶାଗତ ପକ୍ଷୀଙ୍କ ସମାଗମ ଆରମ୍ଭ ହୋଇଛି। ସୁବିସ୍ତୀର୍ଣ୍ଣ ଆର୍ଦ୍ରଭୂମିର ଅନୁକୂଳ ପରିବେଶ ପ୍ରତି ଆକର୍ଷିତ ହୋଇ ସୁଦୂର ୟୁରୋପ, ଆମେରିକା ସହିତ ବିଶ୍ୱର ବିଭିନ୍ନ ପ୍ରାନ୍ତରୁ ବିଦେଶାଗତ ପକ୍ଷୀ ଏଠାରେ ଏକତ୍ରିତ ହେବାରେ ଲାଗିଛନ୍ତି। ୟୁରେସିଆନ୍ ଓ୍ବିଜନ, ଗଡ଼ୱାଲ, ମାଲାର୍ଡ, ଭିନ୍ନ ଭିନ୍ନ ପ୍ରକାର ଗେବ୍ସ, ନର୍ଦ୍ଦର୍ନ ସୋଭଲର୍, ଗୁଲ୍, ଟର୍ଣ୍ଣସ, ବାର୍ ହେଡେଡ୍ ଗୁସ୍, ଟୁଫଟେଡ୍ ଡକ୍, ପୋଚାର୍ଡ, ହ୍ବିସିଲ୍ଡକ୍, ସ୍ୟାଣ୍ଡପାଇପର, ପିଣ୍ଟେଲ୍ ଆଦି ଅନେକ ବିରଳ ପ୍ରଜାତିର ବିଦେଶୀ ପକ୍ଷୀ ଏଠାରେ ପହଞ୍ଚିଥିବା ଦେଖିବାକୁ ମିଳିଛି। ଏହି ପକ୍ଷୀମାନେ ଖାଦ୍ୟ ଓ ଅପେକ୍ଷାକୃତ ଉଷ୍ମ ଜଳବାୟୁ ଅଞ୍ଚଳର ସନ୍ଧାନରେ ହଜାର ହଜାର କିଲୋମିଟର ଯାତ୍ରା କରି ହୀରାକୁଦର ଆର୍ଦ୍ରଭୂମି (ରାମସାର)ରେ ପହଞ୍ଚୁଥିବା ଜଣାପଡିଛି।
ହୀରାକୁଦ ବନ୍ୟପ୍ରାଣୀ ବନଖଣ୍ଡ ଅଧିକାରୀ ଅଂଶୁପ୍ରଜ୍ଞା ଦାଶଙ୍କ ସୂଚନା ଅନୁସାରେ, ହୀରାକୁଦ ଜଳଭଣ୍ଡାରରେ ଶୀତଋତୁରେ ଦିନର ତାପମାତ୍ରା ୨୦ରୁ ୨୬ ଡିଗ୍ରୀ ମଧ୍ୟରେ ରହୁଥିବା ବେଳେ ରାତିର ତାପମାତ୍ରା ପ୍ରାୟ ୧୦ ଡିଗ୍ରୀକୁ ଖସିଯାଇଥାଏ। ଯାହା ବିଦେଶାଗତ ପକ୍ଷୀଙ୍କ ରହଣୀ ପାଇଁ ଅନୁକୂଳ ପରିବେଶ ସୃଷ୍ଟି କରିଥାଏ। ଆସନ୍ତା ୨୦୨୫ ଜାନୁଆରୀ ୧୮ରୁ ହୀରାକୁଦ ଜଳଭଣ୍ଡାରରେ ପକ୍ଷୀ ଗଣନା ଆରମ୍ଭ ପାଇଁ ସ୍ଥିର ହୋଇଛି। ଚଳିତବର୍ଷ ବିଦେଶାଗତ ପକ୍ଷୀଙ୍କ ସମାଗମ ଆରମ୍ଭ ହୋଇଯାଇଥିବାରୁ ସେମାନଙ୍କ ସଂରକ୍ଷଣ ଓ ସୁରକ୍ଷା ପାଇଁ ବନ ବିଭାଗ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି। ବିଦେଶାଗତ ପକ୍ଷୀଙ୍କୁ ବାଧାମୁକ୍ତ ସ୍ବାଚ୍ଛନ୍ଦ ବିଚରଣର ସୁବିଧା ସ୍ବରୂପ ଜଳଭଣ୍ଡାରରେ ପର୍ଯ୍ୟଟକଙ୍କ କ୍ରୁଜ୍ ଡଙ୍ଗା ସହିତ ମତ୍ସ୍ୟଜୀବୀଙ୍କ ଡଙ୍ଗା ଚଳପ୍ରଚଳ ଉପରେ ସନ୍ଧ୍ୟା ୬ଟାରୁ ସକାଳ ୬ଟା ପର୍ଯ୍ୟନ୍ତ କଟକଣା ଲଗାଯାଇଛି। ଏପରିକି ନଦୀ ମଧ୍ୟରେ ପାଟ୍ରୋଲିଂ ପ୍ରକ୍ରିୟାକୁ ମଧ୍ୟ କେବଳ ମାନବ ଗତିବିଧି ଅଞ୍ଚଳରେ ସୀମିତ ରଖାଯାଇଛି। ବିଶେଷକରି ହୀରାକୁଦ ଜଳଭଣ୍ଡାରର ଆର୍ଦ୍ରଭୂମି ଅଞ୍ଚଳକୁ ମାନବ ପ୍ରବେଶକୁ ବାରଣ କରାଯାଇାଛି। ସେହିପରି ବିଦେଶାଗତ ପକ୍ଷୀଙ୍କୁ ଏକ ସ୍ବଚ୍ଛ ପରିବେଶ ଉପଲବ୍ଧ ପାଇଁ ହୀରାକୁଦର ଜଳଭଣ୍ଡାରର ପୂର୍ବ ଓ ପଶ୍ଚିମ ଭାଗରେ ସେମାନେ ଦେଉଥିବା ଅଣ୍ଡାର ସୁରକ୍ଷା ପାଇଁ ସ୍ଥାନୀୟ ସମ୍ପ୍ରଦାୟଙ୍କ ସହଯୋଗରେ ବ୍ୟାପକ ବ୍ୟବସ୍ଥା କରାଯାଇଛି ବୋଲି ବନଖଣ୍ଡ ଅଧିକାରୀ ଦାଶ କହିଛନ୍ତି।
