ବାସୁଦେବପୁର,୨।୬(ଡି.ଏନ୍.ଏ.): ଭଦ୍ରକ ଜିଲା ବାସୁଦେବପୁର ସହର ମଧ୍ୟରେ ମୁଖ୍ୟରାସ୍ତାର ଦୁଇପାର୍ଶ୍ୱରେ ଜବରଦଖଲ ନେଇ ଅସନ୍ତୋଷ ବୃଦ୍ଧି ପାଉଥିବା ବେଳେ ଏହା ପ୍ରଶାସନର ମୁଣ୍ଡବ୍ୟଥାର କାରଣ ହୋଇଥିଲା। ଦିନକୁ ଦିନ ସହର ମଧ୍ୟରେ ଦୁର୍ଘଟଣା ବୃଦ୍ଧି ପାଉଥିବା ବେଳେ ଗତ ୨୬ ତାରିଖରେ କଣ୍ଟେନର ଚାପାରେ ଜଣେ ୬ ମାସର ଶିଶୁପୁତ୍ରର ଜୀବନ ଯିବା ପରେ ବିଳମ୍ବରେ ହେଲେ ମଧ୍ୟ ପ୍ରଶାସନର ଚେତା ପଶିଛି। ସହର ମୁଖ୍ୟରାସ୍ତାର ହାଇସ୍କୁଲ ଛକଠାରୁ କଲେଜ ଛକ ପର୍ଯ୍ୟନ୍ତ ରାସ୍ତା ଦୁଇପାର୍ଶ୍ୱରେ ଜବରଦଖଲ ଉଚ୍ଛେଦ କରାଯାଇଛି। ପୌରପାଳିକା, ତହସିଲ, ଥାନାର ମିଳିତ ସହଯୋଗରେ ବୁଧବାର ପ୍ରଥମ ଦିନରେ ଶତାଧିକ ଉଠାଦୋକାନ ଉଚ୍ଛେଦ କରାଯାଇଥିଲା। ୧ ପ୍ଲାଟୁନ ପୋଲିସ ସହ ଏସ୍ଡିପିଓ ସୌରଭ ଓତା, ତହସିଲଦାର ସୌଭାଗ୍ୟ ପଣ୍ଡା, ପୌର ନିର୍ବାହୀ ଅଧିକାରୀ ମାନସ ଦଣ୍ଡପାଟ, ବାସୁଦେବପୁର ଥାନାଧିକାରୀ ସାବିତ୍ରୀ ପଣ୍ଡାଙ୍କ ସମେତ ନାୟକାଣିଡିହୀ ଓ କଷିଆ ସାମୁଦ୍ରିକ ଥାନାଧିକାରୀ ଉପସ୍ଥିତ ଥିଲେ।
୨ୟ ଦିନରେ ମଧ୍ୟ ଜବରଦଖଲ ହଟାଯାଇଛି। ତେବେ ଦୁଇଦିନ ମଧ୍ୟରେ ୨ଶହରୁ ଊର୍ଦ୍ଧ୍ୱ ଉଠାଦୋକାନୀଙ୍କୁ ରାସ୍ତାକଡ଼ରୁ ଉଚ୍ଛେଦ କରାଯାଇଛି। ହାଇସ୍କୁଲ ଛକଠାରୁ ଏବି କଲେଜ ଛକ ଓ ହାଇସ୍କୁଲ ଛକଠାରୁ ବାଳିକା ହାଇସ୍କୁଲ ରୋଡ୍ରେ ଉଚ୍ଛେଦ କରାଯାଇଛି। ଉଲ୍ଲେଖଯୋଗ୍ୟ, ଉଠାଦୋକାନୀମାନେ ସରକାରୀ ଜାଗାରେ ଦୀର୍ଘଦିନ ଧରି ଦୋକାନ କରି ଆସୁଥିବାରୁ ଟ୍ରାଫିକ ସମସ୍ୟା ସୃଷ୍ଟି ହେଉଥିବା ସହ ଧନଜୀବନ କ୍ଷତି ହେଉଥିଲା।
