ରସୁଲପୁର,୧୩।୪(ଡି.ଏନ.ଏ.): ରସୁଲପୁର ବ୍ଲକ ଅଞ୍ଚଳର ପ୍ରସିଦ୍ଧ ଐତିହାସିକ ସିଂହାପୁର ଯାତ୍ରା ୧୪ତାରିଖରୁ ଆରମ୍ଭ ହେବ। ଏହାକୁ ନେଇ ପ୍ରସ୍ତୁତି ଜୋରଦାର ହୋଇଛି। ମଧୁତୀର୍ଥ ପୁଷ୍କରିଣୀ ତଟସ୍ଥ ମଦନମୋହନ ମନ୍ଦିର, ପ୍ରଭୁ ନାରାୟଣ ଗୋସାଇଁଙ୍କ ସ୍ଥଳଦେଶର ସିଂହାସିନ ଓ ମନ୍ଦିର ନାନା ପ୍ରକାର ରଙ୍ଗବେରଙ୍ଗରେ ସଜେଇ ହେଉଛି। ଯାତ୍ରା ପଡ଼ିଆ ଅଞ୍ଚଳକୁ ସ୍ବଚ୍ଛ ଓ ଶୁଦ୍ଧ କରିବା ଦାୟିତ୍ୱ ସ୍ବେଚ୍ଛାସେବୀ ଅନୁଷ୍ଠାନ ଗ୍ରାମୀଣ ଏକତା ମଞ୍ଚ ହାତକୁ ନେଇଛି। ମଞ୍ଚ ପକ୍ଷରୁ ପ୍ରଥମେ ପ୍ରଭୁ ନାରାୟଣ ଗୋସାଇଁ ଜଳଶୟନ କରୁଥିବା ପୁଷ୍କରିଣୀ ମଧୁତୀର୍ଥକୁ ସଫେଇ କରାଯାଇଛି। ମଞ୍ଚ ପକ୍ଷରୁ ସଞ୍ଜୀବ ପଣ୍ଡା, ଦୀପକ ସାହୁ, ଜ୍ଞାନରଞ୍ଜନ ମଲିକ, ଜିତେନ୍ଦ୍ର ମଲିକ, ସ୍ବରୂପ ରଞ୍ଜନ କାଣ୍ଡିଙ୍କ ସମେତ ଯାତ୍ରା କମିଟି ସଦସ୍ୟ କମଳାକାନ୍ତ ପ୍ରଧାନ, ଦୁଃଶାସନ ପ୍ରଧାନ, ଗିରିଜା ଶଙ୍କର ନାୟକ ଓ ପ୍ରଭାକର ପ୍ରଧାନ ପ୍ରମୁଖ ପୁଷ୍କରିଣୀ ସଫେଇ କରିଛନ୍ତି।
ଜଳ ବିଶୋଧନ ପାଇଁ ବିଶେଷଜ୍ଞଙ୍କ ପରାମର୍ଶକ୍ରମେ ଚୁନ ଏବଂ ଔଷଧ ସିଞ୍ଚନ କରାଯାଇଛି। ପ୍ରଭୁଙ୍କୁ ଜଳ ଗର୍ଭରୁ ବାହାର କରିବା ପାଇଁ ଘଣ୍ଟାଘଣ୍ଟା ପାଣିରେ ଫସି ରହିବାକୁ ପଡ଼ିବ। ତେବେ ଏହି ସମୟରେ ଭକ୍ତ ଯେପରି କୌଣସି ଚର୍ମ ରୋଗରେ ପୀଡ଼ିତ ନ ହେବେ ସେ ଦିଗରେ ଧ୍ୟାନ ଦେଇ ମଞ୍ଚ ପକ୍ଷରୁ ଏଭଳି ପଦକ୍ଷେପ ନିଆଯାଇଛି ବୋଲି ସଭାପତି ଅଭିମନ୍ୟୁ ସାହୁ ମତ ରଖିଛନ୍ତି। ଏଥିସହିତ ମଞ୍ଚ ପକ୍ଷରୁ ଯାତ୍ରା ପଡ଼ିଆକୁ ପରିସ୍କାର କରାଯାଇଛି। ଯାତ୍ରା ଅବସରରେ ବିଭିନ୍ନ ସ୍ଥାନରୁ ବାହାରୁଥିବା ଆବର୍ଜନାକୁ କିପରି ଠିକ୍ରେ ପରିଚାଳନା କରାଯାଇ ପାରିବ ସେ ଦିଗରେ ମଞ୍ଚ ପକ୍ଷରୁ ଗୁରୁତ୍ୱ ଦିଆଯିବ ବୋଲି କୁହାଯାଇଛି। ମଞ୍ଚ ପକ୍ଷରୁ ନିଆଯିଥିବା ପଦକ୍ଷେପକୁ ଯାତ୍ରା ପରିଚାଳନା କମିଟି ପକ୍ଷରୁ ପ୍ରସଂଶା କରାଯାଇଛି। ଏହାବାଦ୍ ମଞ୍ଚ ପକ୍ଷରୁ ପ୍ରଦାନ କରାଯାଇଥିବା ଆମ୍ବୁଲାନ୍ସ ଓ ଲୋକଙ୍କୁ ସୁବିଧା ଯୋଗାଇବା ଦିଗରେ ବ୍ୟବହାର ହେଉଥିବା ୪ ଚକିଆ ଯାନ ଯାତ୍ରା ସମୟରେ ୨୪ ଘଣ୍ଟିଆ ସେବା ଯୋଗାଇ ଦେବାକୁ ଲକ୍ଷ୍ୟ ରଖାଯାଇଛି।
