କୁଜଙ୍ଗ,୨୫।୯ (ମନୋଜ ପ୍ରଧାନ):କୁଜଙ୍ଗ ବ୍ଲକରେ ଗଢି ଉଠିଥିବା ଫ୍ଲାଏଆଶ୍ ଇଟା କାରଖାନା ମାଲିକମାନେ ବିଭିନ୍ନ ଉପାୟରେ ଗରିବ ଜନସାଧାରଣଙ୍କୁ ଠକି ଚାଲିଛନ୍ତି। ଏଥିନିମନ୍ତେ ସାଧାରଣ ଜନତା ମୁହଁ ଖୋଲିବାକୁ ସାହସ ଜୁଟାଇ ପାରୁନାହାନ୍ତି। ପ୍ରକାଶ ଯେ, ଫ୍ଲାଏଆଶ୍ ଇଟା କାରଖାନା ମାଲିକମାନେ ଲୁଣା ଓ ପୋତେଇ ବାଲି ବ୍ୟବହାର କରୁଥିବା ବେଳେ ନିମ୍ନମାନର ସିମେଣ୍ଟ, ଜିପ୍ସମ ଓ ପାଉଁଶ ବ୍ୟବହାର କରୁଛନ୍ତି। ଏହାଦ୍ୱାରା ଇଟାର ମାନ ଦୁର୍ବଳ ହେଉଥିବାରୁ ଖୁବ୍କମ୍ ଦିନରେ ନଷ୍ଟ ହୋଇଯାଉଛି। ଜଣେ ଗରିବ ଲୋକ ପ୍ରଧାନମନ୍ତ୍ରୀ ଆବାସ ଅବା ବିଜୁ ପକ୍କାଘର ଯୋଜନାରେ ଘରଖଣ୍ଡେ କରୁଥିଲେ ବି ତାହାର ଆୟୁଷ କମିଯାଉଛି। ଅନ୍ୟପଟେ ୧୦ ଇଞ୍ଚ ଇଟା ପରିବର୍ତ୍ତେ ୯ ଇଞ୍ଚ ବା ସାଢେ ୮ ଇଞ୍ଚର ଇଟାଦେଇ ଗ୍ରାହକମାନଙ୍କୁ ଠକାଯାଉଛି। ଅପରପକ୍ଷେ କାରଖାନାରେ ଇଟାର ମୂଲ୍ୟସୂଚୀ ପ୍ରଦର୍ଶିତ କରାଯାଉନାହିଁ। ଇଟା କାରଖାନା ମାଲିକମାନେ ବ୍ୟବହାର କରୁଥିବା ଲୁଣାବାଲିକୁ ଚୋରାରେ ଆଣୁଛନ୍ତି। ଏଭଳି ଶତାଧିକ ଟ୍ରିପ୍ ବାଲି ଆଣି କାରଖାନା ପରିସର ବାହାରେ ଯଥା କେନାଲ ବନ୍ଧ କଡ଼ ଓ ବିଭିନ୍ନ ସ୍ଥାନରେ ଜମାକରି ରଖିଛନ୍ତି ା ସେମାନେ ବାଲି କେଉଁ ସଇରାତରୁ ଆଣିଛନ୍ତି ତାହାର ପ୍ରମାଣ ମଧ୍ୟ ଦେଇପାରୁନାହାନ୍ତି। ଅନ୍ୟପଟେ ସରକାରୀ ସଂସ୍ଥାରେ ବ୍ୟବହାର କରିବା ପୂର୍ବରୁ ମାନ ନିର୍ଦ୍ଧାରଣ କରାଯାଉନାହିଁ ବୋଲି ମାଟି ସୁରକ୍ଷା ମଞ୍ଚ ସଂଯୋଜକ ହୃଷୀକେଶ ନାଥ ଅଭିଯୋଗ କରିଛନ୍ତି। ଜଗତ୍ସିଂହପୁର ଜିଲାପାଳ ଏଥିପ୍ରତି ଦୃଷ୍ଟି ଦେବାକୁ ସେ ଦାବି କରିଛନ୍ତି।
