ଢେଙ୍କାନାଳ ଅଫିସ, ୬।୪ – ଢେଙ୍କାନାଳ ହକିର ହୃତଗୌରବ ଫେରାଇ ଆଣିବାକୁ ଆରମ୍ଭ ହୋଇଛି ଉଦ୍ୟମ। ଜିଲାର ପ୍ରତିଭାବାନ୍ ହକି ଖେଳାଳିଙ୍କୁ ଚୟନ କରି ଉନ୍ନତ ପ୍ରଶିକ୍ଷଣ ପ୍ରଦାନ ପାଇଁ ରାଉରକେଲା ସ୍ପୋର୍ଟସ୍ ହଷ୍ଟେଲର ମହିଳା ହକି କୋଚ୍ ଫ୍ଲୋରେନ୍ସିଆ ଏକ୍କାଙ୍କୁ ଦାୟିତ୍ୱ ପ୍ରଦାନ କରାଯାଇଛି। ତାଙ୍କୁ ଜିଲା କ୍ରୀଡ଼ା ବିଭାଗ କାର୍ଯ୍ୟାଳୟରେ ନିଯୁକ୍ତି ପ୍ରଦାନ କରାଯାଇଥିବାବେଳେ ସେ ମଙ୍ଗଳବାର ବିଧିବଦ୍ଧ ଭାବେ ଦାୟିତ୍ୱ ଗ୍ରହଣ କରିଛନ୍ତି।
ଏକଦା ଢେଙ୍କାନାଳର ହକି କ୍ରୀଡ଼ାବିତ୍ ଜାତୀୟସ୍ତରରେ ଅର୍ଜିଥିଲେ ସୁନାମ। ଏବେ ବି ଗ୍ରାମାଞ୍ଚଳର ଯୁବପିଢ଼ିଙ୍କ ମଧ୍ୟରେ ହକିକୁ ନେଇ ରହିଛି କ୍ରେଜ୍। ତେବେ ସେମାନଙ୍କୁ ସମୟୋପଯୋଗୀ ନୂଆ ଟେକ୍ନିକ୍ ବିଷୟରେ ପ୍ରଶିକ୍ଷଣ ଦେବା ପାଇଁ କୋଚ୍ଙ୍କ ଅଭାବ ରହିଛି। ତେଣୁ ଜିଲାର ହକି ଖେଳାଳି ଆଶାଜନକ ପ୍ରଦର୍ଶନ କରିପାରୁନାହାନ୍ତି। ଜାତୀୟସ୍ତରରେ ପହଞ୍ଚତ୍ବା ଲାଗି ସେମାନଙ୍କ ସ୍ବପ୍ନ ପୂରଣ ହୋଇପାରୁନାହିଁ। ଏହାକୁ ନେଇ କ୍ରୀଡ଼ାବିତ୍ମାନଙ୍କ ମଧ୍ୟରେ ଦୀର୍ଘଦିନ ଧରି ଅସନ୍ତୋଷ ଲାଗି ରହିଥିଲା। ତେବେ ଫ୍ଲୋରେନ୍ସିଆଙ୍କ ନିଯୁକ୍ତି ଢେଙ୍କାନାଳର ସୁପ୍ତ ହକିକୁ ନୂଆଜୀବନ ଦେବ ବୋଲି ଆଶା ସଞ୍ଚାର ହୋଇଛି। ଫ୍ଲୋରେନ୍ସିଆ କାର୍ଯ୍ୟରେ ଯୋଗଦେବାପରେ ଜିଲାପାଳ ସରୋଜ କୁମାର ସେଠୀ, ଜିଲା କ୍ରୀଡ଼ା ଅଧିକାରୀ ପ୍ରଦୀପ୍ତ କୁମାର ମହାନ୍ତିଙ୍କୁ ସାକ୍ଷାତ୍ କରି ବିଭିନ୍ନ ବିଷୟରେ ଆଲୋଚନା କରିଛନ୍ତି।
ଜାତୀୟ ଓ ଅନ୍ତର୍ଜାତୀୟ ହକିର ଜଣେ ପରିଚିତ ଚେହେରା ହେଉଛନ୍ତି ମହିଳା ହକି କୋଚ୍ ଫ୍ଲୋରେନ୍ସିଆ ଏକ୍କା। ସେ ପଟିଆଲାସ୍ଥିତ ନେତାଜୀ ସୁଭାଷ ନ୍ୟାଶନାଲ ଇନ୍ଷ୍ଟିଚ୍ୟୁଟ୍ ଅଫ୍ ସ୍ପୋର୍ଟସରୁ ହକି କୋଚିଂରେ ଡିପ୍ଲୋମା କରିଛନ୍ତି। ସେହିପରି ହଙ୍ଗେରୀ ବୁଦାପେଷ୍ଟରେ ଅନ୍ତର୍ଜାତୀୟ କୋଚିଂ କୋର୍ସ ମଧ୍ୟ କରିଛନ୍ତି। ରାଜ୍ୟ ସରକାରଙ୍କ କ୍ରୀଡ଼ା ଓ ଯୁବ ସେବା ବିଭାଗରେ ୨୦୧୨ରୁ ସେ ହକି କୋଚ୍ ଭାବେ ଦାୟିତ୍ୱ ତୁଲାଇ ଆସୁଛନ୍ତି। ନ୍ୟାଶନାଲ ହକି ଚାମ୍ପିୟନଶିପ୍ରେ ଓଡ଼ିଶାରୁ ପ୍ରତିନିଧିତ୍ୱ କରିଥିବା ଫ୍ଲୋରେନ୍ସିଆ ୧୬ ମେଡାଲ ଜିତିଛନ୍ତି। ତାଙ୍କ ପ୍ରଶିକ୍ଷଣରେ ଓଡ଼ିଶା ଦଳ ଜାତୀୟ ହକି ଚାମ୍ପିୟନଶିପ୍ରେ ୧୫ ମେଡାଲ ଆଣିଛି। ବହୁ ଜାତୀୟସ୍ତରୀୟ ହକି ଖେଳାଳିଙ୍କୁ ସୃଷ୍ଟି କରିଥିବା ଫ୍ଲୋରେନ୍ସିଆଙ୍କୁ ଢେଙ୍କାନାଳ ହକି ଦାୟିତ୍ୱ ଦିଆଯିବାକୁ ବିଭିନ୍ନ ମହଲରେ ସ୍ବାଗତ କରାଯାଇଛି।
ଢେଙ୍କାନାଳ ସହର ସମେତ ସଦର ବ୍ଲକର ଅସନପାଟିଆ, ଜଙ୍ଖିରା ଏବଂ ନାଗିଆପଶି ଅଞ୍ଚଳରେ ଯୁବ କ୍ରୀଡ଼ାବିତ୍ଙ୍କ ମଧ୍ୟରେ ହକିକୁ ନେଇ ସ୍ବତନ୍ତ୍ର ଝୁଙ୍କ୍ ରହିଛି। ଉକ୍ତ ଅଞ୍ଚଳର ୧୦୦ରୁ ଊର୍ଦ୍ଧ୍ୱ ହକି ଖେଳାଳି ବ୍ୟକ୍ତିଗତ ଉଦ୍ୟମରେ ପ୍ରଶିକ୍ଷଣ ଜାରି ରଖିଛନ୍ତି। ଜିଲାର ପ୍ରତି ବ୍ଲକରୁ ଦକ୍ଷ ହକି ଖେଳାଳିଙ୍କୁ ଖୋଜି ବାହାର କରିବା, ସେମାନଙ୍କୁ ଉନ୍ନତ ପ୍ରଶିକ୍ଷଣ ଦେବା, ହକି କିଟ୍ ସମେତ ଆନୁଷଙ୍ଗିକ ଉପକରଣ ଯୋଗାଇ ଦେବା ଲାଗି କିଛିଦିନ ତଳେ ଜିଲାପାଳ ନିର୍ଦ୍ଦେଶ ଦେଇଥିଲେ। ସେହିପରି ୫-ଟି ବ୍ୟବସ୍ଥା ଅନ୍ତର୍ଗତ ସ୍କୁଲରେ ହକିର ବିକାଶ ଲାଗି ସ୍ବତନ୍ତ୍ର ଭାବେ ଧ୍ୟାନ ଦିଆଯାଉଛି। ପ୍ରାରମ୍ଭିକ ପର୍ଯ୍ୟାୟରେ ଏଭଳି ୮ଟି ସ୍କୁଲରେ ପ୍ରଶିକ୍ଷଣ କାର୍ଯ୍ୟକ୍ରମ ଆରମ୍ଭ କରାଯିବ ବୋଲି ଜିଲା କ୍ରୀଡ଼ା ଅଧିକାରୀ ସୂଚନା ଦେଇଛନ୍ତି।
