ଡେରାବିଶ, ୨୪ା୯(ସ୍ବ.ପ୍ର.): ଡେରାବିଶ ବ୍ଲକ ଅଧୀନ ଦାନପୁରଠାରେ କେନ୍ଦ୍ରାପଡ଼ା ପୂର୍ତ୍ତ ବିଭାଗ ପକ୍ଷରୁ ଲୁଣାନଦୀ ଉପରେ ନିର୍ମିତ ହୋଇଥିବା ସେତୁ ଏବେ ବି ଅଧାପନ୍ତରିଆ ହୋଇ ପଡ଼ିରହିଛି। ୨୦୧୬ରେ ମୁଖ୍ୟମନ୍ତ୍ରୀ ଏହି ସେତୁକୁ ଲୋକାର୍ପିତ କରିଥିଲେ। ଏହା ଭିତରେ ୫ ବର୍ଷ ବିତିଯାଇଥିଲେ ମଧ୍ୟ ସେତୁକୁ ସଂଯୋଗ କରିଥିବା ରାସ୍ତା ନିର୍ମାଣ ହୋଇନାହିଁ। ଲୁଣା ନଦୀର ନିର୍ମିତ ହୋଇଥିବା ସେତୁକୁ ସଂଯୋଗ କରିଛି କେନ୍ଦ୍ରାପଡ଼ା ମୁଖ୍ୟ କେନାଲ ଉପରେ ନିର୍ମିତ ହୋଇଥିବା ସେତୁ। ମାତ୍ର ବିଭାଗୀୟ ଅପାରଗତା ପାଇଁ ଜଳସମ୍ପଦ ବିଭାଗ ଅଧୀନରେ ଥିବା ନଦୀବନ୍ଧ ଓ କେନ୍ଦ୍ରାପଡ଼ା ମୁଖ୍ୟ କେନାଲର ଡାହାଣ ପାର୍ଶ୍ୱ ବନ୍ଧରେ ଅସ୍ଥାୟୀ ଭାବେ ସାଧାରଣ ଲୋକ ଯାତାୟାତ କରୁଛନ୍ତି। ଏହି ରାସ୍ତାରେ ବ୍ରିଟିଶ୍ ସରକାରଙ୍କ ସମୟରେ କଟକରୁ ଜମ୍ବୁ ଯାଏ ବାଣିଜି୍ୟକ ସମ୍ପର୍କ ପାଇଁ ମୁଖ୍ୟ କେନାଲର ଦାନପୁରଠାରେ ନିର୍ମିତ ଲକ୍ ପୋଲ ଏବେ ବିପଦ ସଙ୍କୁଳ ଅବସ୍ଥାରେ। ଅସ୍ଥାୟୀ ଭାବେ ଲୁଣାନଦୀର ସେତୁକୁ ଏହି ଲକ୍ ପୋଲ ଦେଇ ଯାଇଥିବା ନଦୀବନ୍ଧ ରାସ୍ତା ପୂର୍ତ୍ତ ବିଭାଗ କର୍ତ୍ତୃପକ୍ଷ ବ୍ୟବହାର କରୁଛନ୍ତି। ମାତ୍ର ଏହି ନଦୀ ବନ୍ଧ ଓ ବିପଦ ସଙ୍କୁଳ ଅବସ୍ଥାରେ ଥିବା ଲକ୍ ପୋଲ ଦେଇ ଶତାଧିକ ସଂଖ୍ୟାରେ ବାଲି ବୋଝେଇ ଟ୍ରକ୍ଠାରୁ ଆରମ୍ଭ କରି କଟକରୁ-ପାଟକୁରା ଯାଉଥିବା ଯାତ୍ରୀବାହୀ ବସ୍ ଚଳାଚଳ କରୁଛି। କେତେବେଳେ ଯେ ଅଘଟଣ ଘଟିବ ତାହା କହିହେବ ନାହିଁ। ସମସ୍ତ ଘଟଣା ପ୍ରତି ଅବଗତ ଥାଇ ମଧ୍ୟ ପୂର୍ତ୍ତ ବିଭାଗ ନିଦା ବିଷ୍ଣୁ ପାଲଟି ଥିବା ଦାନପୁର ସରପଞ୍ଚ ବିଭୁଦେନ୍ଦୁ ପଣ୍ଡା କହିଛନ୍ତି। ଏହି ରାସ୍ତାଟି ବ୍ଲକ ଅଞ୍ଚଳର ମୁଖ୍ୟ ରାସ୍ତା ହୋଇଥିବାରୁ ଏ ନେଇ ଅଗଷ୍ଟ ୨୫ରେ ଅନୁଷ୍ଠିତ ପଞ୍ଚାୟତ ସମିତି ବୈଠକରେ ସରପଞ୍ଚ ପଣ୍ଡାଙ୍କ ସମେତ ଉପସ୍ଥିତ ବହୁ ସରପଞ୍ଚ ଓ ସମିତିସଭ୍ୟ ତୁରନ୍ତ ସଂଯୋଗୀକରଣ ରାସ୍ତା ନିର୍ମାଣ ପାଇଁ ଦାବି ଉଠାଇଥିଲେ। ତେବେ ପଞ୍ଚାୟତ ସମିତି ଅଧ୍ୟକ୍ଷଙ୍କ ନେତୃତ୍ୱରେ ଏକ ପ୍ରତିନିଧି ଦଳ ଜିଲାପାଳଙ୍କ ସହ ଆଲୋଚନା କରିବାକୁ ବୈଠକରେ ପ୍ରସ୍ତାବ ଗୃହୀତ ହୋଇଥିଲା। ଏ ବିଷୟରେ ଶିକ୍ଷାବିତ୍ ରନତ୍ାକର ନାୟକ ଓ ସାମାଜିକ କର୍ମୀ ସୁଖଦାନନ୍ଦ ପ୍ରଧାନଙ୍କ ସୂଚନା ଅନୁଯାୟୀ, ଲୁଣାନଦୀରେ ସେତୁ ନିର୍ମାଣ ହେବ ଏବଂ ବ୍ଲକ ସମେତ ଦ୍ୱୀପାଞ୍ଚଳବାସୀଙ୍କର ବହୁ ଦିନର ସମସ୍ୟା ସମାଧାନ ନେଇ ବହୁ ଆନ୍ଦୋଳନ କରାଯାଇଥିଲା। ମାତ୍ର ଏହି ସେତୁ ନିର୍ମାଣ ପରେ ସଂଯୋଗୀ କରଣ ରାସ୍ତା ପାଇଁ ବିଭାଗୀୟ କର୍ତ୍ତୃପକ୍ଷ ସମ୍ପୂର୍ଣ୍ଣ ଚୁପ୍ ବସିବା ଅଞ୍ଚଳବାସୀଙ୍କୁ ବ୍ୟଥିତ କରିଛି। ଏ ବିଷୟରେ କେନ୍ଦ୍ରାପଡ଼ା ପୂର୍ତ୍ତ ବିଭାଗର ନିର୍ବାହୀ ଯନ୍ତ୍ରୀ ସରୋଜ କୁମାର ନାୟକ କହିଛନ୍ତି, ସେତୁକୁ ସଂଯୋଗ କରିବାକୁ ଥିବା ରାସ୍ତା ପାଇଁ ଜମି ଅଧିଗ୍ରହଣ ସରିଛି। ମାତ୍ର ମାଲିକାନା ସ୍ବତ୍ୱ ବିବାଦ ନେଇ ମାମଲା କୋର୍ଟରେ ବିଚାରାଧୀନ ଅଛି। ଯେଉଁଥିପାଇଁ ସଂଯୋଗୀକରଣ ରାସ୍ତା କାର୍ଯ୍ୟରେ ବିଳମ୍ବ ଘଟୁଛି। ସାଧାରଣ ଲୋକଙ୍କ ବ୍ୟବହାର ପାଇଁ ବିପଦସଙ୍କୁଳ ଲକ୍ ପୋଲ ଦେଖିବା ପରେ ଏହାର ମରାମତି ପାଇଁ ଖୁବ୍ଶୀଘ୍ର କରାଯିବ।
