ବେଙ୍ଗାଲୁରୁ,୧୮ ।୯: କର୍ନାଟକର ରାଜଧାନୀ ବେଙ୍ଗାଲୁରୁର ଏକ ଘଟଣା ଏବେ ସମସ୍ତଙ୍କୁ ଚମକାଇ ଦେଇଛି । ବ୍ୟାଦରହଲ୍ଲୀ ଅଞ୍ଚଳରେ ଗୋଟିଏ ପରିବାରର ୫ ଜଣଙ୍କ ମୃତଦେହ ଘର ଭିତରୁ ମିଳିବା ପରେ ଉକ୍ତ ଅଞ୍ଚଳରେ ଏକ ପ୍ରକାର ଭୟର ବାତାବରଣ ସୃଷ୍ଟି ହୋଇଛି । ଏମାନଙ୍କ ମଧ୍ୟରୁ ୪ ଜଣଙ୍କ ମୃତଦେହ ଝୁଲନ୍ତା ଅବସ୍ଥାରେ ମିଳିଥିବା ବେଳେ ୯ ମାସର ଶିଶୁଟି ମୃତ ଅବସ୍ଥାରେ ବିଛଣାରେ ପଡିଥିବା ଦେଖାଯାଇଥିଲା । ଏହା ଦିଲ୍ଲୀର ବୁରାଡି ଘଟଣାକୁ ପୁଣିଥରେ ମନେପକାଇ ଦେଇଛି । ବୁରାଡିରେ ୨ ବର୍ଷ ପୂର୍ବେ ଗୋଟିଏ ଘର ଭିତରେ ୧୧ ଜଣଙ୍କ ମୃତଦେହ ଝୁଲନ୍ତା ଅବସ୍ଥାରେ ମିଳିଥିଲା । ବେଙ୍ଗାଲୁରୁର ଏହି ଘଟଣା ୫ ଦିନ ପୂର୍ବର ବୋଲି ଅନୁମାନ କରାଯାଉଥିବା ବେଳେ ସମସ୍ତ ମୃତଦେହ ସହ ଏକ ଅଢେଇ ବର୍ଷର ଶିଶୁକନ୍ୟା ଥିବା ବେଳେ ତାକୁ ପ୍ରାୟତଃ ଅଚେତ ଅବସ୍ଥାରେ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଛି । ଘଟଣା ସମ୍ପର୍କରେ ଏପର୍ଯ୍ୟନ୍ତ କୌଣସ ସଠିକ ତଥ୍ୟ ମିଳିପାରି ନାହିଁ । ମୃତକଙ୍କ ମଧ୍ୟରେ ରହିଛନ୍ତି ୯ ମାସର ଶିଶୁ, ତାଙ୍କ ମା’(୩୪ ବର୍ଷ), ଆଇ(୫୧ବର୍ଷ), ମାଉସୀ(୩୧ବର୍ଷ) ଓ ମାମୁ(୨୫ ବର୍ଷ) । ଶିଶୁଙ୍କ ଅଜା ଓ ଅଢେଇ ବର୍ଷର ଭଉଣୀ ଜୀବିତ ଥିବା ବେଳେ ଅଜା ଏବେ କୌଣସି କଥା କହିବା ଅବସ୍ଥାରେ ନ ଥିବା କହିଛି ପୋଲିସ । ସମସ୍ତେ ଭିନ୍ନ ଭିନ୍ନ କୋଠରୀରେ ଫାଶୀ ଲଗାଇଥିବା ବେଳେ ୯ ମାସର ଶିଶୁଟି ଭୋକରେ ପ୍ରାଣ ହରାଇଥିବା ଅନୁମାନ କରାଯାଉଛି ।
