ନୂଆଦିଲ୍ଲୀ, ୫।୯: ଚାଇନା ଭାରତ ମଧ୍ୟରେ ଉତ୍ତେଜନା ବଢ଼ିବାରେ ଲାଗିଛି। ଅରୁଣାଚଳ ପ୍ରଦେଶର ୫ ଯୁବକଙ୍କୁ ଚାଇନା ସୈନ୍ୟ ଉଠାଇନେଇଛନ୍ତି। ଏସମ୍ପର୍କରେ କଂଗ୍ରେସ ବିଧାୟକ ନନୋଙ୍ଗ୍ ଏରିଙ୍ଗ୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟୁଇଟ୍ କରି ଜଣାଇଛନ୍ତି। ରାଜ୍ୟର ସୀମାବର୍ତ୍ତୀ ଉପର ସୁବନସିିରି ଜିଲାରୁ ଯୁବକମାନଙ୍କୁ ଉଠାଇ ନିଆଯାଇଛି। ଏବେ ଚାଇନା ସୈନ୍ୟ ଯୁବକମାନଙ୍କୁ ବନ୍ଧକ ରଖିଥିବା ଏରିଙ୍ଗ୍ କହିଛନ୍ତି। ପୂର୍ବରୁ ମଧ୍ୟ ଏଭଳି ଘଟଣା ଘଟିଥିଲା। ତେବେ ଚାଇନାର ଏଭଳି କାର୍ଯ୍ୟର କଡ଼ା ଜବାବ ଦିଆଯିବା ଆବଶ୍ୟକ ବୋଲି ସେ ଦାବି କରିଛନ୍ତି। ଯୁବକମାନଙ୍କୁ ନଚାଓ ସୀମାରୁ ଅପହରଣ କରାଯାଇଛି। ଯୁବକମାନେ ହେଉଛନ୍ତି ତନୁ ବାକାର, ପ୍ରଶାତ ରିଙ୍ଗ୍ଲିଙ୍ଗ୍, ନଗାରୁଦିରି, ଡୋଙ୍ଗତୁ ଇବିୟା ଏବଂ ତୋଚ୍ ଇଙ୍ଗକାମ୍। ଯୁବକମାନେ ମାଛ ଧରୁଥିବାବେଳେ ସେମାନଙ୍କୁ ଅପହରଣ କରାଯାଇଥିବା କୁହାଯାଉଛି। ଏହି ଘଟଣା ସମ୍ପର୍କରେ ସ୍ଥାନୀୟ ଭାଜପା ଏମ୍ପି କିରେନ୍ ରିଜିଜୁ ମଧ୍ୟ ଅବଗତ ଥିବା ଏରିଙ୍ଗ୍ କହିଛନ୍ତି। ଲଦାଖ ଏବଂ ଡୋକଲାମ୍ ଭଳି ଅରୁଣାଚଳପ୍ରଦେଶରେ ମଧ୍ୟ ଚାଇନା ଉପଦ୍ରବ ଆରମ୍ଭ କରିଦେଇଥିବା ଏରିଙ୍ଗ୍ ସୂଚନା ଦେଇଛନ୍ତି। ଏଠାରେ ଚାଇନା ଅନୁପ୍ରବେଶ ଜାରି ରଖିଥିବା ସେ କହିଛନ୍ତି। ଚାଇନା ସୀମାରେ ଯୁବକମାନେ ପ୍ରବେଶ କରିଥିବା କୁହାଯାଉଛି। ଏଠାରେ ଭାରତ-ଚାଇନା ସୀମା ସମ୍ପର୍କିତ କୌଣସି ତଥ୍ୟ ନ ଥିବାରୁ ସ୍ଥାନୀୟ ବାସିନ୍ଦା ବହୁ ସମୟରେ ସମସ୍ୟାର ସମ୍ମୁଖୀନ ହେଉଥିବା କୁହାଯାଉଛି।
