ବାଲେଶ୍ୱର ଅଫିସ, ୬ା୨: ବାଲେଶ୍ୱର ଜିଲା ନୀଳଗିରି ବ୍ଲକ ସିଆଡ଼ିମାଳ ପଞ୍ଚାୟତର ସିନ୍ଦୁରିଆ ଗାଁକୁ ରାସ୍ତା ନାହିଁ । ଆବଶ୍ୟକ ସ୍ଥଳେ ଗାଁକୁ ଆସିପାରୁନି ଆମ୍ବୁଲାନ୍ସ କିମ୍ବା ଦମକଳ ଗାଡ଼ି। ପ୍ରାୟ ୨କି.ମି. ଖଟରେ ବୋହି ରୋଗୀଙ୍କୁ ଆମ୍ବୁଲାନ୍ସ ପର୍ଯ୍ୟନ୍ତ ଆଣିବାକୁ ପଡିଥାଏ। ଏବେ ପଞ୍ଚାୟତ ନିର୍ବାଚନ ପାଇଁ ଗାଁରେ ପହଞ୍ଚୁଛନ୍ତି ସ୍ଥାନୀୟ ନେତା, ବିଧାୟକ ଓ କର୍ମୀ। ଗ୍ରାମବାସୀ ଏକାଠି ହୋଇ ପ୍ରଥମେ ଗାଁକୁ ରାସ୍ତା କର, ପରେ ଭୋଟ ଦିଆଯିବ ବୋଲି ଦାବି କରି ଜିଦ୍ରେ ଅଟଳ ଅଛନ୍ତି।
ସିନ୍ଦୁରିଆ ଗାଁ କୁଲଡ଼ିହା ଅଭୟାରଣ୍ୟ ଅଧୀନ ସ୍ବର୍ଣ୍ଣଚୂଡ଼ ପାହାଡ଼ର ପାଦଦେଶରେ ଦୀର୍ଘ ୬୨ ବର୍ଷ ପୂର୍ବରୁ ଗଢ଼ି ଉଠିଥିଲା। ଆଦିବାସୀ, ହରିଜନ ସମ୍ପ୍ରଦାୟର ଲୋକମାନେ ଏଠାରେ ବସତି ସ୍ଥାପନ କରିଥିଲେ। ଗ୍ରାମରେ ପ୍ରାୟ ୩ଶହରୁ ଊର୍ଦ୍ଧ୍ୱ ପରିବାର ରହିଆସୁଛନ୍ତି। ସ୍ବାଧୀନତାର ୭୫ବର୍ଷ ପରେ ମଧ୍ୟ ସିନ୍ଦୁରିଆ ଗାଁକୁ ରାସ୍ତାଟିଏ ହୋଇପାରିନାହିଁ । ପାନୀୟ ଜଳ, ସ୍ବାସ୍ଥ୍ୟସେବା, ଶିକ୍ଷା ଓ ବିଦ୍ୟୁତୀକରଣ ଭଳି ମୌଳିକ ସେବା ଏଠାରେ ଉପଲବ୍ଧ ନାହିଁ । କେବଳ ଗୋଟିଏ ‘ସିନ୍ଦୁରିଆ ପ୍ରାଥମିକ ବିଦ୍ୟାଳୟ’ ଅଛି। ପଞ୍ଚମ ଶ୍ରେଣୀ ପରେ ଛାତ୍ରୀଛାତ୍ର ୪କି.ମି. ଦୂରରେ ଥିବା ଏମ୍ଇ ଓ ହାଇସ୍କୁଲକୁ ପାଠ ପଢ଼ିବାକୁ ଯାଇଥାନ୍ତି। ସେହିପରି ଗାଁରେ ଦୀର୍ଘବର୍ଷ ଧରି ରହିଆସୁଥିବା ଅଧିକାଂଶ ଭୂମିହୀନଙ୍କୁ ଏଯାଏ ଜମିପଟ୍ଟା ମିଳିନାହିଁ । ଏଠାକାର ଲୋକେ ପୋଖରୀରେ ଗାଧୋଇବା ସହ ଆବଶ୍ୟକସ୍ଥଳେ ଝରଣାପାଣି ପିଇ ସମୟ ଅତିବାହିତ କରୁଛନ୍ତି। ଗ୍ରାମରେ ବିଦ୍ୟୁତ୍ ବ୍ୟବସ୍ଥା ମଧ୍ୟ ଉପଲବ୍ଧ ନାହିଁ । ଅନ୍ୟପକ୍ଷରେ କୁଲଡ଼ିହା ଅଭୟାରଣ୍ୟରୁ ବାରମ୍ବାର ହାତୀପଲ ଆସି ଘରଦ୍ୱାର ଭାଙ୍ଗିବା ସହ ଫସଲ ନଷ୍ଟ କରୁଛନ୍ତି। ଫଳରେ ଏସବୁ ମୌଳିକ ସମସ୍ୟାକୁ ନେଇ ଚଳିତ ପଞ୍ଚାୟତ ନିର୍ବାଚନରେ ଗାଁକୁ ରାସ୍ତା ତିଆରି କରିବା ପରେ ନିର୍ବାଚନରେ ଭୋଟ ଦେବାକୁ ନିଷ୍ପତ୍ତି ନେଇଛନ୍ତି ଗ୍ରାମବାସୀ। ସମସ୍ତ ନେତାଙ୍କୁ ସମାନ ଦାବି କରୁଛନ୍ତି। ଯେଉଁ ନେତା ରାସ୍ତା ତିଆରି କରିବେ ଭୋଟ୍ ତାଙ୍କୁ ମିଳିବ ବୋଲି ଗ୍ରାମବାସୀ ଅଡି ବସିଛନ୍ତି।
ସ୍ଥାନୀୟ ବାସିନ୍ଦା ବାଇଧର ସିଂ କହିଛନ୍ତି, ଗ୍ରାମରେ ରାସ୍ତା ନ ଥିବାରୁ କୌଣସି ରୋଗ ହେଲେ ଆମ୍ବୁଲାନ୍ସ ଆସିପାରେ ନାହିଁ । ୨କି.ମି. ଚାଲି ଚାଲି ଯିବା ତଥା ରୋଗୀଙ୍କୁ ଖଟିଆରେ ନେବା ପରେ ଆମ୍ବୁଲାନ୍ସ ନିକଟରେ ପହଞ୍ଚିଥାନ୍ତି। ଏପରିକି ପ୍ରସୂତିଙ୍କୁ ମଧ୍ୟ ଏଭଳି ସମସ୍ୟାରେ ସମ୍ମୁଖୀନ ହେବାକୁ ପଡ଼ିଥାଏ। ବର୍ଷାଦିନେ ଏହି ଯନ୍ତ୍ରଣା ଦ୍ୱିଗୁଣିତ ହୋଇଥିବା କହିଛନ୍ତି।
