ଭୁବନେଶ୍ୱର, ୧୭।୫ (ବ୍ୟୁରୋ):ଅଗ୍ନିକାଣ୍ଡରେ ଅନେକ ଜୀବନ ଯିବା ସହ ବହୁ ସମ୍ପତ୍ତି ନଷ୍ଟ ହେଉଛି। ବର୍ଷକୁ ବର୍ଷ ଏହି ନିଆଁ ବିପତ୍ତି ବଢ଼ି ଚାଲିଛି। ତେଣୁ ଅଗ୍ନିକାଣ୍ଡ ଘଟିଲାବେଳେ ଭୟଭୀତ ନ ହୋଇ ଏହାକୁ କିଭଳି ଆୟତ୍ତ କରାଯାଇପାରିବ ସେନେଇ ସଚେତନ କରିବା ସହ କୌଶଳ ଶିଖାଇବ ‘ଫାୟାର ପାର୍କ’। ବର୍ଷକ ପରେ ଅଗ୍ନିଶମ ବିଭାଗ ପକ୍ଷରୁ ଶନିବାରଠାରୁ ପୁଣି ଏହି କାର୍ଯ୍ୟକ୍ରମ ଆରମ୍ଭ ହେବ। ତେବେ ଏହାର୍ପୂବରୁ ସୋମବାର ଭୁବନେଶ୍ୱର ବରମୁଣ୍ଡାସ୍ଥିତ ଓଡ଼ିଶା ଫାୟାର ଆଣ୍ଡ୍ ଡିଜାଷ୍ଟର ରେସ୍ପନ୍ସ ଏକାଡେମୀଠାରେ ଏହାର ପ୍ରାକ୍ ପ୍ରସ୍ତୁତି କରାଯାଇଥିଲା। ଫାୟାର ବଲ ଓ ନୂଆ ନୂଆ ଅଗ୍ନି ନିରାପତ୍ତା ଯନ୍ତ୍ରର ବ୍ୟବହାର ସହ କୌଶଳ ପ୍ରଦର୍ଶନ କରାଯାଇଥିଲା। ଘର, ବ୍ୟବସାୟ ପ୍ରତିଷ୍ଠାନ, ଉଚ୍ଚ ଅଟ୍ଟାଳିକା, ଗ୍ୟାସ୍ ସିଲିଣ୍ଡର କିମ୍ବା ଅନ୍ୟ କେଉଁଠି ନିଆଁ ଲାଗିଲେ କିପରି ନିଜେ ସୁରକ୍ଷିତ ରହି ତାହାକୁ ପ୍ରାଥମିକ ଅବସ୍ଥାରେ ଆୟତ୍ତ କରିହେବ ସେ ସମ୍ପର୍କରେ ଅଗ୍ନିଶମ କର୍ମଚାରୀମାନେ ସର୍ବସାଧାରଣ ସ୍ଥାନକୁ ଆସି ଶିଖାଇବା ପୂର୍ବରୁ ସେଠାରେ ନିଜକୁ ପ୍ରସ୍ତୁତ କରିଥିଲେ। କାର୍ଯ୍ୟକ୍ରମରେ ଏକାଡେମୀ ପ୍ରିନ୍ସିପାଲ ରମେଶଚନ୍ଦ୍ର ମାଝି, ଭାଇସ୍ ପ୍ରିନ୍ସିପାଲ ପ୍ରକାଶ କୁମାର ଜେନାଙ୍କ ସମେତ ଅଗ୍ନିଶମ କର୍ମଚାରୀ ଓ ଅନ୍ୟମାନେ ଉପସ୍ଥିତ ଥିଲେ।
ଦିଲ୍ଲୀ ମୁଣ୍ଡ୍କା ଅଗ୍ନିକାଣ୍ଡ ପରେ ଓଡ଼ିଶା ଅଗ୍ନିଶମ ବିଭାଗ ପକ୍ଷରୁ ରବିବାରଠାରୁ ରାଜ୍ୟବ୍ୟାପୀ ଯାଞ୍ଚ ସହ ସଚେତନତା କାର୍ଯ୍ୟକ୍ରମ ଚାଲିଛି। କଟକ, ଭୁବନେଶ୍ୱର, ବାଲେଶ୍ୱର ସମେତ ବିଭିନ୍ନ ସ୍ଥାନରେ ହସ୍ପିଟାଲ, ଉଚ୍ଚ ଅଟ୍ଟାଳିକାର ଅଗ୍ନି ନିରାପତ୍ତା ବ୍ୟବସ୍ଥା ଯାଞ୍ଚ କରାଯାଉଛି। ଏଥିସହ ସାଧାରଣ ଲୋକ ଓ କର୍ମଚାରୀଙ୍କୁ ନିଆଁଲିଭା କୌଶଳ ଶିଖାଯାଉଛି। ଏହାକୁ ତ୍ୱରାନ୍ବିତ କରିବାକୁ ଫାୟାର ପାର୍କ କାର୍ଯ୍ୟକ୍ରମ ପୁଣି ଆରମ୍ଭ କରାଯାଇଛି। ପ୍ରଥମେ ୨୦୨୧ ଜାନୁୟାରୀରେ ଫାୟାର ପାର୍କ କାର୍ଯ୍ୟକ୍ରମ ଉଦ୍ଘାଟିତ ହୋଇଥିଲା। କରୋନା ମହାମାରୀ ଯୋଗୁ ମାତ୍ର ୪ ମାସରେ ଏହା ବନ୍ଦ ହୋଇଯାଇଥିଲା। ଏବେ ପୁଣି ଆରମ୍ଭ ହୋଇଥିବା ଏହି କାର୍ଯ୍ୟକ୍ରମରେ ପ୍ରତ୍ୟେକ ଶନିବାର ଅପରାହ୍ନ ୩ଟା ୩୦ରୁ ୫ଟା ମଧ୍ୟରେ ଜନଗହଳିପୂର୍ଣ୍ଣ ଓ ବିଭିନ୍ନ ସ୍ଥାନରେ ସାଧାରଣ ଲୋକ ଓ ଛାତ୍ରଗୋଷ୍ଠୀଙ୍କୁ ଅଗ୍ନିଶମ ବିଭାଗ ପକ୍ଷରୁ ତାଲିମ ସହ ସଚେତନତା କରାଯିବ। ଏଥିସହ ସେମାନଙ୍କୁ ପାମ୍ପଲେଟ ପ୍ରଦାନ କରାଯାଇ ମତାମତ ନିଆଯିବ ବୋଲି ସୂଚନା ଦିଆଯାଇଛି।
