ଥିରୁଭାନନ୍ତପୁରମ୍, ୧୯।୧୨: କେରଳରେ ରାଜନୈତିକ ପ୍ରତିହିଂସାର ନିଆଁ ବ୍ୟାପିବାରେ ଲାଗିଛି। ରବିବାର ଅଲାପ୍ପୁଝାରେ ଭାଜପା ନେତା ଓବିସି ମୋର୍ଚ୍ଚା ସଚିବ ରଞ୍ଜିତ ଶ୍ରୀନିବାସନଙ୍କୁ ତାଙ୍କ ଘର ନିକଟରେ ଅଜଣା ଆକ୍ରମଣକାରୀ ହତ୍ୟା କରିଛନ୍ତି। ୧୨ ଘଣ୍ଟା ପୂର୍ବରୁ ଜିଲାରେ ସୋସିଆଲ ଡେମୋକ୍ରାଟିକ ପାର୍ଟି ଅଫ ଇଣ୍ଡିଆ (ଏସଡିପିଆଇ)ର ନେତା ରାଜ୍ୟ ସଚିବ ଶାନ କେ.ଏସ.ଙ୍କୁ ଛୁରୀରେ ହତ୍ୟା କରାଯାଇଥିଲା। ସୁରକ୍ଷା ଦୃଷ୍ଟିରୁ ଜିଲାରେ ୧୪୪ ଧାରା ଜାରି କରାଯାଇଥିବା ଜିଲାପାଳ ଏ.ସିକନ୍ଦର ସୂଚନା ଦେଇଛନ୍ତି।
ପୋଲିସର ସୂଚନାନୁସାରେ,ଭାଜପା ନେତାଙ୍କ ହତ୍ୟା ମାମଲାରେ ୧୧ ଜଣଙ୍କୁ ଗିରଫ କରାଯାଇଛି। ଏଥିମଧ୍ୟରୁ କିଛି ଏହି ମାମଲାରେ ସିଧାସଳଖ ଜଡିତ ହେବାର ଆଶଙ୍କା ରହିଛି। ଏହି ଦୁଇଟି ଘଟଣାକୁ ନେଇ ରାଜ୍ୟ
ମୁଖ୍ୟମନ୍ତ୍ରୀ ପିନରାଇ ବିଜୟନ ଉଦବେଗ ପ୍ରକାଶ କରିବା ସହିତ ଏହାର କଡ଼ା ନିନ୍ଦା କରିଛନ୍ତି। ଆକ୍ରମଣକାରୀଙ୍କ ବିରୋଧରେ ପୋଲିସ କଡା କାର୍ଯ୍ୟାନୁଷ୍ଠାନ ଗ୍ରହଣ କରିବ ବୋଲି ସେ କହିଛନ୍ତି। ଏଭଳି ସଂକୀର୍ଣ୍ଣ ଚିନ୍ତାଧାରା ଏବଂ ଅମାନବୀୟ କାର୍ଯ୍ୟ ରାଜ୍ୟ ପାଇଁ ଖରାପ ବୋଲି ସେ କହିଛନ୍ତି। ହତ୍ୟାକାରୀ ଗୋଷ୍ଠୀ ଏବଂ ସେମାନଙ୍କର ଘୃଣ୍ୟ ମନୋଭାବକୁ ସେ ସମାଲୋଚନା କରିଛନ୍ତି।
ମୃତ ଶ୍ରୀନିବାସନଙ୍କୁ ତାଙ୍କ ଘର ବାହାରେ ହତ୍ୟା କରାଯାଇଛି। ପୋଲିସ କହିଛି ଯେ ସେ ସକାଳେ ମର୍ନିଂଓ୍ବାର୍କରେ ବୁଲିବାକୁ ବାହାରିଥିବାବେଳେ ଆଠ ଜଣିଆ ଆକ୍ରମଣକାରୀ ଦଳ ତାଙ୍କୁ ଆକ୍ରମଣ କରି ଛୁରୀରେ ହତ୍ୟା କରିଥିଲେ। ଡାକ୍ତରଖାନା ଯିବା ବାଟରେ ତାଙ୍କର ମୃତ୍ୟୁ ଘଟିଥିଲା।
ସେହିପରି ଏସଡିପିଓ ନେତା ନିଜ ସ୍କୁଟରରେ ମାନ୍ନାଚେରୀକୁ ଫେରୁଥିବା ବେଳେ ତାଙ୍କୁ ଆକ୍ରମଣ କରାଯାଇଥିଲା। ପୋଲିସ କହିଛି ଯେ କାରରେ ଆସିଥିବା ଆକ୍ରମଣକାରୀମାନେ ପ୍ରଥମେ ତାଙ୍କ ଦୁଇ ଚକିଆ ଯାନକୁ ଧକ୍କା ଦେଇଥିଲେ ଏବଂ ସେ ତଳେ ପଡ଼ିଯିବା ମାତ୍ରେ ତାଙ୍କୁ ଛୁରୀରେ ଆକ୍ରମଣ କରାଯାଇଥିଲା। ପରେ ଏର୍ନାକୁଲମର ଏକ ଘରୋଇ ଡାକ୍ତରଖାନାରେ ଚିକିତ୍ସା ସମୟରେ ତାଙ୍କର ମୃତ୍ୟୁ ଘଟିଥିଲା।