ଶ୍ରଦ୍ଧାଳୁଙ୍କୁ ଜରିମାନା: ସେବାୟତ,ପୋଲିସଙ୍କୁ ଛାଡ଼
9:49 amJuly 17, 2022July 17, 2022 / 09

ପୁରୀ ଅଫିସ,୧୭।୭: ଶ୍ରୀମନ୍ଦିର ଭିତରକୁ ସାଧାରଣରେ ମୋବାଇଲ ନେବା ନିଷେଧ ରହିଛି। ଜନସାଧାରଣଙ୍କ ପାଇଁ ଏହି ନିୟମ ଲାଗୁ ଥିବାବେଳେ ସେବାୟତ, ପୋଲିସ ଓ ନିର୍ଦ୍ଦିଷ୍ଟ ଭିଆଇପି ଶ୍ରୀମନ୍ଦିରକୁ ମୋବାଇଲ ନେବାକୁ ନେଇ ଜନଅସନ୍ତୋଷ ପ୍ରକାଶ ପାଇଛି। ତେବେ ଶୁକ୍ରବାର ପୁଣି ଜଣେ ବ୍ୟକ୍ତି ବାଇଶିପାହାଚ ଉପରେ ଠିଆ ହୋଇ ସେଲ୍‌ଫି ନେବା ଘଟଣାରେ ପୋଲିସ ପ୍ରତିକ୍ରିୟାଶୀଳ ହେବା ପରେ ଶ୍ରଦ୍ଧାଳୁମାନେ ପ୍ରଶାସନକୁ ପାଲଟା ପ୍ରଶ୍ନ କରୁଛନ୍ତି। ସେବାୟତଙ୍କଠାରୁ ଆରମ୍ଭ କରି ଛୋଟବଡ଼ ଶ୍ରୀମନ୍ଦିର କର୍ମଚାରୀ ଓ ପୋଲିସ କର୍ମଚାରୀ ପର୍ଯ୍ୟନ୍ତ ସମସ୍ତେ ମୋବାଇଲ ନେଇ ଶ୍ରୀମନ୍ଦିର ପ୍ରବେଶ କରୁଛନ୍ତି। ଶ୍ରଦ୍ଧାଳୁମାନେ ମୋବାଇଲ ନେଇ ଯାଉ ନ ଥିବାବେଳେ କେତେଜଣ ବର୍ଗଙ୍କୁ କାହିଁକି ମୋବାଇଲ ନେଇ ଯିବାକୁ ଅନୁମତି ଦିଆଯାଉଛି ତାହାକୁ ନେଇ ସାଧାରଣରେ ପ୍ରଶ୍ନ ଉଠୁଛି। ସାଧାରଣ ଲୋକେ ମୋବାଇଲ ଫୋନ୍‌ ନେଇ ଶ୍ରୀମନ୍ଦିର ପ୍ରବେଶ କରିଥିଲେ ସେମାନଙ୍କ ଉପରେ ଜରିମାନା କରାଯାଉଛି। ଶ୍ରୀମନ୍ଦିର ଆଇନ ଧାରା ୩୦(ଏ), ସବ୍‌ସେକ୍ସନ୍‌ ୪(ସି)ରେ ସ୍ପଷ୍ଟ ଭାବେ ଉଲ୍ଲେଖ ଅଛି ଯେ, ମୋବାଇଲ ନେଇ ଧରାପଡ଼ିଲେ ହଜାର ଟଙ୍କା ଜରିମାନା ଦେବାକୁ ପଡ଼ିବ। ତେବେ ସମାନ ଆଇନ ପୋଲିସ କର୍ମଚାରୀ ଓ ସେବାୟତଙ୍କ ଠାରେ ଲାଗୁ ହେଉନାହିଁ। ଫଳରେ ଜନଅସନ୍ତୋଷ ଦେଖିବାକୁ ମିଳୁଛି।