ଭଞ୍ଜନଗର,୧୭।୨(ଡି.ଏନ.ଏ.): ଭଞ୍ଜନଗର କବିସମ୍ରାଟ ଆଥ୍ଲେଟିକ୍ ଆସୋସିଏଶନ ଦ୍ୱାରା ପରିଚାଳିତ ଭଞ୍ଜନଗର ଜେଲ ପଡ଼ିଆକୁ ବାଣିଜ୍ୟ ମେଳା ପାଇଁ ଅନୁମତି ଦିଆଯାଇଥିବାରୁ ବିଭିନ୍ନ ମହଲରେ ଅସନ୍ତୋଷ ପ୍ରକାଶ ପାଇଛି। ଉକ୍ତ ପଡ଼ିଆରେ ଗୁରୁବାର ଭଞ୍ଜନଗର ବାଣିଜ୍ୟ ମେଳା-୨୦୨୩ ଆରମ୍ଭ ହୋଇଥିବାରୁ ଭଞ୍ଜନଗରର କ୍ରୀଡ଼ା ପ୍ରେମୀମାନେ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି।
କିଛିଦିନ ପୂର୍ବେ ଏଠାରେ ରାଜ୍ୟସ୍ତରୀୟ ଫୁଟବଲ ଟୁର୍ନାମେଣ୍ଟ ହେବାର ଥିଲା । କାର୍ଯ୍ୟକ୍ରମ ଆରମ୍ଭର କିଛି ଘଣ୍ଟା ପୂର୍ବରୁ ପ୍ରଶାସନ ପକ୍ଷରୁ ହଠାତ୍ ଟୁର୍ନାମେଣ୍ଟକୁ ବନ୍ଦ କରି ଦିଆଯାଇଥିଲା। ଯାହାକୁ ନେଇ କ୍ରୀଡ଼ା ପ୍ରେମୀମାନେ ହତୋସତ୍ାହିତ ହୋଇପଡ଼ିଥିଲେ। ପଡ଼ିଆ ସଭାପତି ଦାୟିତ୍ୱରେ ଥିବା ପୁର୍ବତନ ବାଚସ୍ପତି ସୋମନାଥ ରଥଙ୍କ ଇତିମଧ୍ୟରେ ପରଲୋକ ହୋଇସାରିଛି। ତେଣୁ ଖେଳ ପଡ଼ିଆ ଦାୟିିତ୍ୱରେ ବର୍ତମାନ କିଏ ଅଛନ୍ତି ସହରବାସୀ ଏନେଇ ଜାଣନ୍ତି ନାହ। ପଡ଼ିଆ ଅନୁମୋଦନରେ କେତେକ ତ୍ରୁଟିଥିବ ଭାବି ସେ ସମୟରେ ଆୟୋଜକ କର୍ମକର୍ତ୍ତାମାନେ ବାଧ୍ୟ ହୋଇ ନୀରବ ରହିଯାଇଥିଲେ । ଏଭଳି ସ୍ଥିତିରେ ଏଠାରେ ଖେଳାଳିମାନଙ୍କୁ ଖେଳିବାକୁ ସୁଯୋଗ ମିଳୁନଥିବା ବେଳେ ବ୍ୟବସାୟୀମାନଙ୍କୁ ବ୍ୟବସାୟ କରିବା ପାଇଁ କିଭଳି ସୁଯୋଗ ମିଳୁଛି ବୋଲି କ୍ରୀଡ଼ାପ୍ରେମୀ ପ୍ରଶ୍ନ ଉଠାଇଛନ୍ତି । ଏହି ମେଳା ଆସନ୍ତା ୨୬ ତାରିଖ ପର୍ଯ୍ୟନ୍ତ ଚାଲିବ। ଫଳରେ କ୍ରୀଡ଼ାବିତ୍ ମାନେ ସେଠାରେ ଏହି ସମୟରେ ଖେଳକୁଦ ଅଭ୍ୟାସ କରିବା ସମ୍ଭବପର ନୁହେଁ । ଆସୋସିଏଶନ ପକ୍ଷରୁ ବିଭିନ୍ନ ମରାଯାଇଥିବା ପୋଷ୍ଟରରେ ମଧ୍ୟ କବିସମ୍ରାଟ ଉପେନ୍ଦ୍ର ଭଞ୍ଜଙ୍କ ନାମ ବଦଳରେ କବିସମ୍ରାଟ ଖେଳ ପଡ଼ିଆ ଲେଖାଯାଇଛି । ଯାହାକୁ ନେଇ ଭଞ୍ଜ ପ୍ରେମୀମାନେ ମଧ୍ୟ ଅସନ୍ତୋଷ ବ୍ୟକ୍ତ କରିଛନ୍ତି । ଅପରପକ୍ଷେ ଆୟୋଜକ କର୍ମକର୍ତ୍ତାଙ୍କ ସହ ପରୋକ୍ଷରେ ଜଡ଼ିତ ଜଣେ କର୍ମକର୍ତ୍ତା କହିଛନ୍ତି। ଆଇନ ଅନୁଯାଇ ପ୍ରଶାସନିକ ଅନୁମୋଦନ ନିଆଯାଇଛି । ଏଥିସହ ଆଥ୍ଲେଟିକ୍ ଆସୋସିଏଶନକୁ ଭଡ଼ା ଅର୍ଥ ପରିଶୋଧ କରି ଅନୁମୋଦନ ନିଆଯାଇଛି । ମେଳା ଦ୍ୱାରା ଅନେକ ଗରିବ ବ୍ୟବସାୟୀ ତାହାର ଉପକୃତ ହେବେ । ସନ୍ଧ୍ୟାରେ ମେଳାକୁ ଭଞ୍ଜନଗର ଏନଏସି ଅଧ୍ୟକ୍ଷ ଗୋପବନ୍ଧୁ ମହାପାତ୍ର ମୁଖ୍ୟ ଅତିଥି ଭାବେ ଯୋଗଦେଇ ଉଦ୍ଘାଟନ କରିଥିଲେ। ଏନଏସି ଉପାଧ୍ୟକ୍ଷା ସମ୍ମାନିତ ଅତିଥି ଭାବେ ଯୋଗ ଦେଇଥିଲେ। ଶୁଳପାଣି ଶତପଥୀ ସଭାକୁ ସଂଯୋଜନା କରିଥିଲେ।
