ଢେଙ୍କାନାଳ ଅଫିସ, ୨୩।୩ – ଦୋଳ ମହୋତ୍ସବକୁ ନେଇ ଉତ୍ସବମୁଖର ହୋଇଉଠିଛି ଢେଙ୍କାନାଳ ଜିଲା କାମାକ୍ଷାନଗର ବ୍ଲକର ଗୁନେଇବିଲି ପଞ୍ଚାୟତର ୧୦୦ ବର୍ଷ ପୁରୁଣା ଏହି ମହୋତ୍ସବରେ ୧୧ ଗ୍ରାମ ସାମିଲ ହୋଇଥିବାବେଳେ ସମଗ୍ର ଅଞ୍ଚଳରେ ସୃଷ୍ଟି ହୋଇଛି ଭକ୍ତିଭାବମୟ ପରିବେଶ।
କୋଭିଡ୍ କଟକଣା ପାଇଁ ୨ବର୍ଷ ହେଲା ଏହି ପ୍ରାଚୀନ ଦୋଳ ଉତ୍ସବ ବନ୍ଦ ଥିଲା। ଚଳିତବର୍ଷ କରୋନା ନିୟନ୍ତ୍ରଣରେ ଥିବାରୁ ୧୧ଦିନ ବ୍ୟାପୀ ଏହି ମହୋତ୍ସବ ଆଡମ୍ବର ସହକାରେ ପାଳନ କରାଯାଉଛି। ଏଥିରେ ଗୁନେଇବିଲି ପଞ୍ଚାୟତର ଗୋଡାସ, ବୋଲୁଅ, ବୃନ୍ଦାବନପୁର, ବୁଢୀବିଲି, ଭଏରପୁର, ରଗଡ଼ିପଡ଼ା, ରାଙ୍କିଆ, କଣ୍ଟାଝରିଆ, ବାଲିପଡ଼ା, ଟାଙ୍ଗର, ମହାବୀରନଗର ଗ୍ରାମର ରାଧାକୃଷ୍ଣଙ୍କ ବିମାନ ସାମିଲ ହୋଇଛନ୍ତି। ନିୟମ ଅନୁଯାୟୀ ଦୋଳପୂର୍ଣ୍ଣିମାଠାରୁ ପ୍ରତ୍ୟେକ ଦିନ ଗୋଟିଏ ଗ୍ରାମରେ ମେଳଣ ଅନୁଷ୍ଠିତ ହେଉଛି। ଗତ ଶନିବାର ବୃନ୍ଦାବନପୁରରେ ମେଳଣ କାର୍ଯ୍ୟକ୍ରମ ଆୟୋଜିତ ହୋଇଥିଲା। ଏହି ଉପଲକ୍ଷେ ରାଧାକୃଷ୍ଣଙ୍କ ଯୁଗଳ ପ୍ରତିମାକୁ ସୁସଜ୍ଜିତ ବିମାନରେ ବସାଇ ନଗର ପରିକ୍ରମା କରାଯାଇଥିଲା। ଉଜ୍ଜ୍ୱଳ ଆଲୋକ, ଫଗୁଖେଳ, ଲଉଡ଼ିବାଡ଼ି ଖେଳ, କୀର୍ତ୍ତନ, ସିଙ୍ଗବାଜାରେ ମେଳଣ ପଡ଼ିଆ ଉତ୍ସବମୁଖର ହୋଇଉଠିଥିଲା। କାର୍ଯ୍ୟକ୍ରମକୁ ୧୧ ମଣ୍ଡଳର ସଭାପତି ଯାଦବାନନ୍ଦ ପାଳ, ସମ୍ପାଦକ ଅଲେଖ ପ୍ରସାଦ ସ୍ବାଇଁ, ଉପଦେଷ୍ଟା ନୃସିଂହ ଚରଣ ବେହେରା, ସଭାପତି ବିଦ୍ୟାଧର ନାୟକ, ସମ୍ପାଦକ ଦୁଃଖବନ୍ଧୁ ବେହେରା, ପ୍ରାଣବନ୍ଧୁ ବେହେରା, ନିତ୍ୟାନନ୍ଦ ବେହେରା, ପ୍ରହଲ୍ଲାଦ ବେହେରା, ବିଦ୍ୟାଧର ସ୍ବାଇଁ ପ୍ରମୁଖ ପରିଚାଳନା କରିଥିଲେ।
