ଭୁବନେଶ୍ୱର,୩୧।୮: ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକ୍ରମେ ଖରିଫ ୨୦୨୫ ପାଇଁ ରାଜ୍ୟରେ ସାର ଯୋଗାଣ ତ୍ୱରାନ୍ୱିତ କରାଯାଇଛି। ଉପମୁଖ୍ୟମନ୍ତ୍ରୀ ତଥା କୃଷିମନ୍ତ୍ରୀ କନକ ବର୍ଦ୍ଧନ ସିଂହଦେଓ ନିୟମିତ ସମୀକ୍ଷା କରୁଛନ୍ତି। ରାଜ୍ୟରେ ପର୍ଯ୍ୟାପ୍ତ ସାର ମହଜୁଦ ଥିବା ସୂଚନା ଦେଇ ଚାଷୀଙ୍କୁ ଆତଙ୍କିତ ନ ହେବାକୁ ଅନୁରୋଧ କରାଯାଇଛି।
ଖରିଫ ଋତୁ ପାଇଁ ୫୮.୫୦ ଲକ୍ଷ ହେକ୍ଟର ଫସଲ ଯୋଜନା (ଧାନ: ୩୪.୯୪ ଲକ୍ଷ, ଅଣ-ଧାନ: ୨୩.୫୬ ଲକ୍ଷ) ଅନୁଯାୟୀ, ରାଜ୍ୟକୁ ୯.୫୫ ଲକ୍ଷ ମେଟ୍ରିକ ଟନ୍ ସାର ଆବଣ୍ଟିତ ହୋଇଛି। ଅଗଷ୍ଟ ଶେଷ ସୁଦ୍ଧା ୮.୧୦ ଲକ୍ଷ ମେଟ୍ରିକ ଟନ୍ ସାର ମିଳିସାରିଛି, ମୋଟ ଉପଲବ୍ଧତା ୧୧.୦୪ ଲକ୍ଷ ମେଟ୍ରିକ ଟନ୍ (ୟୁରିଆ: ୪.୮୪ ଲକ୍ଷ, DAP: ୨.୧୮ ଲକ୍ଷ, MOP: ୦.୬୧ ଲକ୍ଷ, SSP: ୦.୩୪ ଲକ୍ଷ, NP/NPK/NPKS: ୩.୦୫ ଲକ୍ଷ)। ଏଥିମଧ୍ୟରୁ ୮.୪୬ ଲକ୍ଷ ମେଟ୍ରିକ ଟନ୍ ଚାଷୀଙ୍କୁ ବିକ୍ରି ହୋଇଛି, ଏବଂ ୨.୫୬ ଲକ୍ଷ ମେଟ୍ରିକ ଟନ୍ ମହଜୁଦ ଅଛି।
କଳାବଜାରୀ ଓ ନକଲି ସାର ରୋକିବାକୁ ଜିଲା ଓ ବ୍ଲକ ସ୍ତରରେ ଏନଫୋର୍ସମେଣ୍ଟ ଟିମ୍ ଗଠନ କରାଯାଇଛି। ୪୫୪୬ ଖୁଚୁରା ଦୋକାନ ଯାଞ୍ଚ ହୋଇଛି, ୧୨୦୨ ବ୍ୟବସାୟୀଙ୍କୁ ନୋଟିସ ଜାରି, ୩୦ଟି ଦୋକାନରେ ବିକ୍ରୟ ବନ୍ଦ, ୬୨ଟି ଡିଲର ଲାଇସେନ୍ସ ନିଲମ୍ବିତ/ବାତିଲ ଓ ୬ଟି ଷ୍ଟକ୍ ଜବତ ହୋଇଛି।
କୃଷି ସଚିବ ଡ଼. ଅରବିନ୍ଦ କୁମାର ପାଢ଼ୀ କେନ୍ଦ୍ର ସରକାର ଓ ସାର କମ୍ପାନୀଙ୍କ ସହ ସମନ୍ୱୟ ରଖି ଯୋଗାଣ ସୁନିଶ୍ଚିତ କରୁଛନ୍ତି। ମାର୍କଫେଡ୍କୁ ପାକ୍ସ ଓ ଲ୍ୟାମ୍ପସରେ ସାର ଉପଲବ୍ଧତା ନିଶ୍ଚିତ କରିବାକୁ ନିର୍ଦ୍ଦେଶ ଦିଆଯାଇଛି।
