କୋରାପୁଟ,୨ା୧୨(ସ୍ବ.ପ୍ର.): ବୁଧବାରଠାରୁ ମାଓବାଦୀଙ୍କ ପିଏଲଜିଏ ସପ୍ତାହ ଆରମ୍ଭ ହୋଇଥିବାବେଳେ ମାଓବାଦୀଙ୍କ ଟପ୍ ନେତା ତଥା ଏଓବିଏସଜେଡସିର କେନ୍ଦ୍ରୀୟ କମିଟିର ବରିଷ୍ଠ ନେତା ରାମକ୍ରୀଷ୍ଣାଙ୍କ ଅଙ୍ଗରକ୍ଷୀ ତଥା ଏସିଏମ ର଼୍ୟାଙ୍କର ରାମେ ମାଡକାମୀ କୋରାପୁଟ ଜିଲା ଆରକ୍ଷୀ ଅଧୀକ୍ଷକ ମୁକେଶ ଭାମୁଙ୍କ ପାଖରେ ଆତ୍ମସମର୍ପଣ କରିଛନ୍ତି। ତାଙ୍କ ନାମରେ ରାଜ୍ୟ ସରକାରଙ୍କ ପକ୍ଷର ୪ ଲକ୍ଷ ଟଙ୍କା ପୁରସ୍କାର ଘୋଷଣା କରାଯାଇଥିଲା। ରାମେ ମାଓବାଦୀଙ୍କ କାର୍ଯ୍ୟକଳାପରେ ଅସନ୍ତୁଷ୍ଟ ପ୍ରକାଶ କରି ଏବଂ ରାଜ୍ୟ ସରକାରଙ୍କ ଚିତ୍ରକୋଣ୍ଡା ନିକଟ ବିଚ୍ଛିନ୍ନାଞ୍ଚଳର ଯୋଗାଯୋଗ କରିବା ନିମନ୍ତେ ଗୁରୁପ୍ରିୟା ସେତୁ ନିର୍ମାଣ , ସେଠାରେ ପୋଲିସ ଓ ବିଏସଫର କ୍ୟାମ୍ପ୍ ଗଠନ ସହ ସରକାରଙ୍କ ବିଭିନ୍ନ ବିକାଶମୁଳକ ଓ ଲୋକ କଲ୍ୟାଣ କାର୍ଯ୍ୟ ଦେଖି ଆତ୍ମସମର୍ପଣ କରିବାକୁ ମନସ୍ଥ କଲେ ବୋଲି ପ୍ରକାଶ କରିଛନ୍ତି।
କୋରାପୁଟ ଜିଲା ଅଧୀକ୍ଷକ କାର୍ଯ୍ୟାଳୟର ସମ୍ମିଳନୀ କକ୍ଷରେ ଆୟୋଜିତ ଏକ ଖବରଦାତା ସମ୍ମିଳନୀରେ କୋରାପୁଟ ଏସ୍ପି ଏହା ସୂଚନା ଦେଇଛନ୍ତି। ଆମତ୍ସମର୍ପଣ କରିବା ପରେ ରାମେଙ୍କୁ ଏସ୍ପି ପୁଷ୍ପଗୁଛ ଦେଇ ସ୍ବାଗତ କରିବା ସହ ରାଜ୍ୟ ସରକାରଙ୍କ ନିୟମ ଅନୁଯାୟୀ ରହିଥିବା ସମସ୍ତ ସୁବିଧା ଓ ସହାୟତା ତାକୁ ପ୍ରଦାନ କରାଯିବ ବୋଲି ଏହି ଅବସରରେ ଏସ୍ପି ସୂଚନା ଦେଇଥିଲେ ା
ସୂଚନାଯୋଗ୍ୟ, ରାମେ ମାଡକାମୀଙ୍କ ଘର ମାଲକାନାଗିରି ଜିଲା କାଲିମେଳା ଥାନା ଅନ୍ତର୍ଗତ କୁରୁବୁ ଗ୍ରାମ ହୋଇଥିବାବେଳେ ସେ ଗତ ୨୦୧୩ ମସିହାରେ ମାଓବାଦୀଙ୍କ ସଂଗଠନରେ ଯୋଗଦେଇଥିଲେ। ପରେ ସେ ୩୦୩ ବନ୍ଧୁକ ଚଳାଇବା ସହ ବିଭିନ୍ନ କାର୍ଯ୍ୟ ସଫଳତା ହାସଲ କରିବା ପରେ ତାଙ୍କ ଏସିଏମ୍ ର଼୍ୟାଙ୍କ ପଦୋନ୍ନତି କରାଯିବା ସହ ତାଙ୍କୁ ଇନସାସ ରାଇଫଲ ଚଳାଇବା ତାଲିମ ପ୍ରଦାନ କରାଯାଇଥିଲା ା ସେ ପଡ଼ିଆ ଥାନା ଅନ୍ତର୍ଗତ ସିଲାକଟା ଜଙ୍ଗଲରେ ଗୁଳିବିନିମୟ, ଚିତ୍ରକୋଣ୍ଡାର ପାନପଦର ଓ ରାମଗୁଡ଼ାଠାରେ ଗୁଳିବିନିମୟ, ଜଡାମ୍ବ ଗ୍ରାମରେ ଗୁଳିବିନିମୟ, ମୁଦୁଲିପଡ଼ା ପୋଲିଥାନାର ଖାଲଗୁଡ଼ା, ଗୋଇଗୁଡା ଗ୍ରାମରେ ପୋଲିସ ସହ ଗୁଳିବିନିମୟ ସମେତ ମାଲକାନାଗରି ଓ କୋରାପୁଟ ଜିଲାରେ ବିଭିନ୍ନ ମାଓବାଦୀ କାର୍ଯ୍ୟକଳାପରେ ସାମିଲ ଥିବା ଏସ୍ପି ସୂଚନା ଦେଇଛନ୍ତି।
