ନୂଆଦିଲ୍ଲୀ,୬।୧୦: ପୁରୁଣା ଗାଡ଼ିର ପଞ୍ଜୀକରଣକୁ ନବୀକରଣ କରାଇବା ଏବେ ମହଙ୍ଗା ହେବ। ଏବେକାର ମୂଲ୍ୟର ପ୍ରାୟ ୮ଗୁଣ ଅଧିକ ଫି ଦେବାକୁ ପଡ଼ିବ। ଏନେଇ କେନ୍ଦ୍ର ସରକାର ବିଜ୍ଞପ୍ତି ପ୍ରକାଶ କରିଛନ୍ତି। ପୁରୁଣା ଯାନ ଉପରେ ଏଭଳି ଅତ୍ୟଧିକ ଫି ବୋଝ ଗାଡ଼ି ମାଲିକମାନଙ୍କୁ ଚିନ୍ତାରେ ପ୍ରକାଇବ।
୧୫ ବର୍ଷରୁ ଊର୍ଦ୍ଧ୍ୱ ପୁରୁଣା କାର୍ କିମ୍ବା ବାଣିଜି୍ୟକ ଯାନଗୁଡିକର ନବୀକରଣ କରାଇବା ସମୟରେ ୨୦୨୨ ଏପ୍ରିଲରୁ ୮ ଗୁଣା ଅଧିକ ଦେୟ ଦେବାକୁ ପଡ଼ିବ। ଟ୍ରକ ଏବଂ ବସ୍ ଗୁଡ଼ିକର ଫିଟ୍ନେସ ପ୍ରମାଣପତ୍ର ନବୀକରଣ କରାଇବା କ୍ଷେତ୍ରରେ ମଧ୍ୟ ଏଭଳି ଉଚ୍ଚ ଦେୟ ଦେବାକୁ ପଡ଼ିବ ବୋଲି ଜଣାପଡ଼ିଛି। ଏହାକୁ କାର୍ଯ୍ୟକାରୀ କରାଇବା ଲାଗି କେନ୍ଦ୍ର ରାଜପଥ, ପରିବହନ ଏବଂ ରାଜମାର୍ଗ ମନ୍ତ୍ରଣାଳୟ ପକ୍ଷରୁ ଏକ ବିଜ୍ଞପ୍ତି ଜାରି କରାଯାଇଛି। ଏହି ନିୟମ ଦିଲ୍ଲୀ ଏବଂ ଏହାର ନିକଟବର୍ତ୍ତୀ ଅଞ୍ଚଳଗୁଡିକ ପାଇଁ କାର୍ଯ୍ୟକାରୀ ହେବ ନାହିଁ। କାରଣ ଏହି ସ୍ଥାନଗୁଡ଼ିକରେ ୧୦ ବର୍ଷରୁ ଊର୍ଦ୍ଧ୍ୱ ଡିଜେଲ ଏବଂ ୧୫ ବର୍ଷରୁ ଊର୍ଦ୍ଧ୍ୱ ପେଟ୍ରୋଲ ଯାନଗୁଡିକୁ ବ୍ୟାନ କରାଯାଇଛି। ବର୍ତ୍ତମାନ ପୁରୁଣା କାର ପଞ୍ଜୀକରଣକୁ ନବୀକରଣ କଲେ ପ୍ରାୟ ୬୦୦ ଟଙ୍କା ଦେବାକୁ ପଡୁଛି। ନୂଆ ନିୟମ କାର୍ଯ୍ୟକାରୀ ହେଲେ ଏହା ୫ ହଜାର ଟଙ୍କା ପଡ଼ିବ। ସେହିଭଳି ପୁରୁଣା ବାଇକ୍ ଲାଗି ଏହା ବର୍ତ୍ତମାନ ୩୦୦ ଟଙ୍କା ଥିବା ବେଳେ ଆଗକୁ ୧ ହଜାର ଟଙ୍କା ଲାଗିବ। ୧୫ ବର୍ଷରୁ ଊର୍ଦ୍ଧ୍ୱ ଟ୍ରକ୍ ଏବଂ ବସ୍ କ୍ଷେତ୍ରରେ ଏହା ୧୫୦୦ ଟଙ୍କାରୁ ୧୨,୫୦୦ ଟଙ୍କାକୁ ବୃଦ୍ଧି ଘଟିବ। ଘରୋଇ ଯାନ ପଞ୍ଜୀକରଣର ନବୀକରଣ ବିଳମ୍ବ ହେଲେ ମାସିକ ୩୦୦ ଟଙ୍କା ଏବଂ ବାଣିଜି୍ୟକ ଯାନଗୁଡିକ ଲାଗି ୫୦୦ ଟଙ୍କା ଜରିମାନା ଦେବାକୁ ହେବ। ସେହିଭଳି ବାଣିଜି୍ୟକ
ଯାନଗୁଡ଼ିକର ଫିଟ୍ନେସ ପ୍ରମାଣପତ୍ରର ନବୀକରଣ ବିଳମ୍ବ ହେଲେ ଦୈନିକ ୫୦ ଟଙ୍କା ଜରିମାନା ଗଣିବାକୁ ପଡ଼ିବ। ପୁରୁଣା ଯାନଗୁଡ଼ିକୁ ବଜାରରୁ ହଟାଇବା ଲାଗି ସରକାର ଏଭଳି ନୀତି ଆପଣାଉଥିବା କୁହାଯାଇଛି। ଘରୋଇ ଯାନ ଅବଧି ୧୫ ବର୍ଷ ଟପିଥିଲେ ଯାନର ମାଲିକ ପ୍ରତି ୫ ବର୍ଷରେ ପଞ୍ଜୀକରଣ ନବୀକରଣ କରାଇବାକୁ ହେବ। ଏହାବାଦ ବାଣିଜି୍ୟକ ଯାନଗୁଡ଼ିକ ୮ ବର୍ଷ ଅବଧି ପୂରଣ କରିଥିଲେ ଫିଟ୍ନେସ ସାର୍ଟିଫିକେଟ ନବୀକରଣ କରାଇବେ। ସେହିଭଳି ଫିଟ୍ନେସ ପରୀକ୍ଷଣ ଲାଗି ମାନୁଆଲ ବ୍ୟବସ୍ଥାକୁ ଉଠାଇ ଦେବା ଉପରେ ସରକାର ବର୍ତ୍ତମାନ ଫୋକସ କରିଥିବା ଜଣାପଡ଼ିଛି।
