ଲକ୍ଷ୍ନୌ, ୨୬।୭: ପୁଅର ହିଂସାତ୍ମକ ଆଚରଣରେ ଅତିଷ୍ଠ ହୋଇପଡ଼ିଥିବା ବାପା ଓ ମା’ ଶେଷରେ ନେଇଥିଲେ ଏକ ଚକିତ କଲା ଭଳି ନିଷ୍ପତ୍ତି। ସୁପାରି କିଲରଙ୍କୁ ୨ ଲକ୍ଷ ଟଙ୍କା ଦେଇ ବାପା ଓ ମା ଶେଷରେ ପୁଅଙ୍କୁ ହତ୍ୟା କରିଥିଲେ। ଏହି ଘଟଣା ଘଟିବାର ମାତ୍ର ୨ ଦିନ ପରେ ପୋଲିସ ମୃତ ଯୁବକର ବାପାଙ୍କ ସମେତ ଦୁଇ ଜଣ ସୁପାରି କିଲର୍ଙ୍କୁ ଗିରଫ କରିଛି। ଏଭଳି ଏକ ଅବିଶ୍ୱସନୀୟ ଘଟଣା ଉତ୍ତର ପ୍ରଦେଶର ଲକ୍ଷ୍ନୌସ୍ଥିତ ହାପୁର ସହରରେ ଘଟିଛି। ଏଠାରେ ରହୁଥିବା କମଲ ଚାନ୍ଦ ତୋମାର ପେଶାରେ ଜଣେ ଅଟୋମୋବାଇଲ ମରାମତି ଦୋକାନର ମାଲିକ ଥିଲେ। କିନ୍ତୁ କମଲ ତାଙ୍କ ପୁଅ ରିଷଭର ବ୍ୟବହାରକୁ ନେଇ ବେଶ୍ ଚିନ୍ତିତ ରହୁଥିଲେ। ରିଷଭ ବାପା କମଲଙ୍କ ସମେତ ତାଙ୍କ ମା’ଙ୍କୁ ଦୁର୍ବ୍ୟବହାର କରିବା ସହିତ ଟଙ୍କା ମାଗି ମାଡ଼ ମାରୁଥିଲେ। ଏପରିକି ଦିନେ ଟଙ୍କା ମାଗି ତାଙ୍କ ମା’ଙ୍କ ହାତ ଭାଙ୍ଗି ଦେଇଥିଲେ। ଶେଷରେ କମଲ ଅନ୍ୟାନ୍ୟ ଉପାୟ ନ ପାଇ ତାଙ୍କର ବନ୍ଧୁ ଦୀନେଶଙ୍କୁ ଏକଥା ଜଣାଇଥିଲେ। ଉଭୟ ରିଷଭକୁ ହତ୍ୟା କରିବା ପାଇଁ ଯୋଜନା କରିଥିଲେ। ଏଥିଲାଗି ଦୀନେଶ ୨ ଲକ୍ଷ ଟଙ୍କା ସୁପାରି ନେଇ ଆଉ ଜଣେ ଲୋକଙ୍କ ସହାୟତାରେ ରିଷଭକୁ କାର୍ରେ ଏକ ନିଛାଟିଆ ସ୍ଥାନକୁ ନେଇଯାଇଥିଲେ। ଯେଉଁଠାରେ ସେମାନେ ରିଷଭକୁ ପ୍ରଚୁର ମଦ ପିଆଇ ଶେଷରେ ହତ୍ୟା କରିଥିଲେ। ତେବେ ଯେତେବେଳେ ରିଷଭର ହତ୍ୟା କରାଯାଇଥିବା ନେଇ ତାଙ୍କ ବାପା ଓ ମା ଥାନାରେ ଅଭିଯୋଗ କରିଥିଲେ ପୋଲିସ ଉଭୟଙ୍କ ଉପରେ ସନ୍ଦେହ ପ୍ରକାଶ କରିଥିଲା। ସେମାନେ ରିଷଭର ମୃତ୍ୟୁରେ ମିୟମ୍ରାଣ ଜଣାପଡ଼ୁ ନ ଥିଲେ କି ପୋଷ୍ଟ ମର୍ଟମ ପାଇଁ କୌଣସି ଆଗ୍ରହ ଦେଖାଇ ନ ଥିଲେ। ପୋଲିସ ଉଭୟଙ୍କୁ ପଚରା ଉଚରା କରିବା ପରେ ଶେଷରେ ସେମାନେ ସତକଥା କହି ଦେଇଥିଲେ।
