ନୂଆଦିଲ୍ଲୀ,୨।୧୨: ସୁପ୍ରିମକୋର୍ଟ କହିଛନ୍ତି ଯେ ସ୍ବାମୀ-ସ୍ତ୍ରୀଙ୍କ ମଧ୍ୟରେ ବିବାଦରେ ପିଲାଙ୍କର କୌଣସି ସମସ୍ୟା ନହେବା ଉଚିତ। ପୁଅ ବୟସ୍କ ହେବା ପର୍ଯ୍ୟନ୍ତ ଭରଣ ପୋଷଣ ଦାୟିତ୍ୱ ବାପାଙ୍କର। ବିଚାରପତି ଏମ୍.ଆର୍. ଶାହା ଏବଂ ଏ.ଏସ୍. ବୋପାନ୍ନାଙ୍କ ନେତୃଥ୍ବରେ ଗଠିତ ଖଣ୍ଡପୀଠ ଏକ ମାମଲାର ବିଚାର କରି ଏଭଳି କହିଛନ୍ତି।
ସ୍ବାମୀ-ସ୍ତ୍ରୀଙ୍କ ଝଗଡ଼ାରେ ପିଲାମାନେ ଯନ୍ତ୍ରଣା ଭୋଗିବା ଉଚିତ ନୁହେଁ। ଶିଶୁର ବିକାଶ ବଜାୟ ରଖିବା ପାଇଁ ପିତାଙ୍କ ଦାୟିତ୍ୱ। ମା’ ରୋଜଗାର କରୁ ନଥିବା ସ୍ଥଳେ ପିଲାଙ୍କ ସମ୍ପୂର୍ଣ୍ଣ ଦାୟିତ୍ୱ ପିତାଙ୍କର ବୋଲି ଶୀର୍ଷକୋର୍ଟ କହିଛନ୍ତି। ଜୟପୁରର ଏକ ମାମଲାରେ କୋର୍ଟ ଏଭଳି ରାୟ ଦେଇଛନ୍ତି।
ସମ୍ବିଧାନର ଧାରା ୧୪୨ ଅନୁଯାୟୀ ସୁପ୍ରିମକୋର୍ଟ ପରିବାର କୋର୍ଟ ଏବଂ ହାଇକୋର୍ଟଙ୍କ ଛାଡପତ୍ରର ନିଷ୍ପତ୍ତି ସମ୍ପର୍କରେ କହିଛନ୍ତି ଯେ,ଏଥିରେ ପିତାଙ୍କୁ ପ୍ରତି ମାସରେ ୫୦,୦୦୦ ଟଙ୍କା ଭରଣ ପୋଷଣ ଯୋଗାଇବାକୁ ନିର୍ଦ୍ଦେଶ ଦିଆଯାଇଛି। ମେ ’୨୦୧୧ ଦମ୍ପତି ଏକାଠି ରହୁ ନାହାଁନ୍ତି। ଡିସେମ୍ବର ୨୦୧୯ ଠାରୁ ପିତା ଭରଣ ପୋଷଣ ଦେବା ବନ୍ଦ କରିଦେଇଛନ୍ତି। ୧୫ ନଭେମ୍ବର, ୨୦୧୨ ରେ ଦିଆଯାଇଥିବା ଆଦେଶର ପ୍ରତିପାଳନ କରାଯାଉ ନ ଥିବା ସର୍ବୋଚ୍ଚ ନ୍ୟାୟାଳୟ କହିଛନ୍ତି।
ଶୀର୍ଷକୋର୍ଟ ପୁଅର ଭରଣ ପୋଷଣ ପାଇଁ ମାସକୁ ଧାର୍ଯ୍ୟ ହୋଇଥିବା ୫୦,୦୦୦ ଟଙ୍କା ପ୍ରଦାନ କରିବାକୁ ନିର୍ଦ୍ଦେଶ ଦେଇଛନ୍ତି। ଡିସେମ୍ବର ୨୦୧୯ରୁ ନଭେମ୍ବର ୨୯୨୧ ପର୍ଯ୍ୟନ୍ତ ବକେୟା ଥିବା ଭରଣ ପୋଷଣ ଟଙ୍କା ଆଠ ସପ୍ତାହ ମଧ୍ୟରେ ପ୍ରଦାନ କରାଯିବାକୁ କୋର୍ଟ ନିର୍ଦ୍ଦେଶ ଜାରି କରିଛନ୍ତି।
୨୦୦୫ ନଭେମ୍ବର ୧୬ରେ ଏହି ଦମ୍ପତି ବିବାହ କରିଥିଲେ ଏବଂ ଅଭିଯୁୂକ୍ତ ବ୍ୟକ୍ତି ଜଣକ ସେତେବେଳେ ଭାରତୀୟ ସେନାରେ ମେଜର ଭାବରେ କାର୍ଯ୍ୟ କରୁଥିଲେ। ବର୍ତ୍ତମାନ ସେମାନଙ୍କ ପୁଅକୁ ୧୩ ବର୍ଷ ହୋଇଛି ।
