ବଲାଙ୍ଗୀର, ୬।୬ (ବୀରେନ୍ଦ୍ର କୁମାର ଝାଙ୍କର/ସୁନୀଲ କୁମାର ମହାନ୍ତି): ବ୍ୟାସକବି ଫକୀର ମୋହନ ଗଳ୍ପ ସେନାପତିଙ୍କ କାଳଜୟୀ ‘ରେବତୀ’କୁ ନେଇ ଓଡ଼ିଆ ସାହିତ୍ୟ ଜଗତ ମୁଖରିତ। ନାରୀ ଶିକ୍ଷାର ସଂଘର୍ଷ କାଳରେ ସାମାଜିକ କୁସଂସ୍କାର ବିରୋଧରେ ଏକ ବଳିଷ୍ଠ ଆହ୍ବାନ ରେବତୀ। ପାଠପଢାକୁ ନେଇ ଆଦ୍ୟ ସଂଘର୍ଷ ଏବଂ ଆତ୍ମପ୍ରତ୍ୟୟର ଏକ ଗଭୀର ପ୍ରତିବେଦନ ରେବତୀ। ହେଲେ ଆଜି ଭିନ୍ନ ଜଣେ ରେବତୀଙ୍କ ପାଇଁ ବଲାଙ୍ଗୀର ଚର୍ଚ୍ଚିତ। ସେ ହେଲେ ରାଜେନ୍ଦ୍ର ବିଶ୍ବବିଦ୍ୟାଳୟ ସ୍ନାତକୋତ୍ତର ଶ୍ରେଣୀ ଟପ୍ପର ରେବତୀ ସ୍ବାଇଁ । ଜଣେ ଦିନ ମଜୁରିଆଙ୍କ ଝିଅ ହେଲେ ମଧ୍ୟ ନିଜର ଗଭୀର ନିଷ୍ଠା, କଠିନ ପରିଶ୍ରମ ଏବଂ ଏକାଗ୍ରତା ଯୋଗୁ ସେ ଆଜି ବିଶ୍ବବିଦ୍ୟାଳୟ ଟପ୍ସର ହୋଇ ଇତିହାସ ରଚିଛନ୍ତି । ପ୍ରତିକୂଳ ପରିସ୍ଥିତିରେ ସଫଳତା ଲାଭ କରି ଅନ୍ୟମାନଙ୍କ ପାଇଁ ପ୍ରେରଣାର ଉତ୍ସ ହୋଇଛନ୍ତି। ଶୁକ୍ରବାର ସାରେ ବଲାଙ୍ଗୀର ରାଜେନ୍ଦ୍ର ବିଶ୍ବବିଦ୍ୟାଳୟର ପରୀକ୍ଷା ଫଳ ପ୍ରକାଶ ପାଇଥିଲା । ସ୍ନାତକୋତ୍ତର ଶ୍ରେଣୀ ଛାତ୍ରୀ ରେବତୀ ସ୍ବାଇଁ ୯.୬୭ ସିଜିପିଏ ମାର୍କ ରଖି ବିଶ୍ୱବିଦ୍ୟାଳୟ ଟପ୍ସର ହୋଇଛନ୍ତି । ସେ ହେଉଛନ୍ତି ପ୍ରାଣୀବିଜ୍ଞାନ ବିଭାଗର ଛାତ୍ରୀ । ରେବତୀଙ୍କ ବାପା ସନ୍ତୋଷ ସ୍ବାଇଁ ଜଣେ ଦିନ ମଜୁରିଆ। ତାଙ୍କ ମା’ ଜୟନ୍ତୀ ଜଣେ ଗୃହିଣୀ । ସନ୍ତୋଷ ଓ ଜୟନ୍ତୀଙ୍କ ଦୁଇ ଝିଅ ରେବତୀ, ସେବତୀ ଏବଂ ଗୋଟିଏ ପୁଅ ରାଜା । ବଲାଙ୍ଗୀର ଜିଲା ପୁଇଁନ୍ତଲା ବ୍ଲକ ଅନ୍ତର୍ଗତ କୁଲଥିପାଲି ଗାଁର ମୂଳ ବାସିନ୍ଦା ସନ୍ତୋଷ ଓ ଜୟନ୍ତୀ ନିଜ ଝିଅପୁଅଙ୍କୁ ପାଠ ପଢ଼ାଇବା ପାଇଁ ୨୦୨୧ରେ ବଲାଙ୍ଗୀର ଚାଲି ଆସିଥିଲେ। ଗାନ୍ଧୀନଗରପଡା ଠାରେ ଏକ ଭଡାଘର ନେଇ ଦିନ ମଜୁରିଆ କାମ କରି ସନ୍ତୋଷ ନିଜ ତିନି ଝିଅପୁଅଙ୍କୁ ପାଠ ପଢ଼ାଉଛନ୍ତି । ଗାଁ ସ୍କୁଲରେ ୫ମ ଶ୍ରେଣୀ ପର୍ଯ୍ୟନ୍ତ ପଢ଼ିବା ପରେ ବଡଝିଅ ରେବତୀ ମହୀମୁଣ୍ଡା ଓଡିଶା ଆଦର୍ଶ ବିଦ୍ୟାଳୟରେ ସିଟ୍ ପାଇଥିଲେ। ସେହି ବିଦ୍ୟାଳୟରେ ଯୁକ୍ତଦୁଇ ଶ୍ରେଣୀ ପର୍ଯ୍ୟନ୍ତ ପାଠ ପଢ଼ିବା ପରେ ୨୦୨୧ରେ ରାଜେନ୍ଦ୍ର ବିଶ୍ବବିଦ୍ୟାଳୟରେ ଯୁକ୍ତ ତିନି ଶ୍ରେଣୀରେ ନାମ ଲେଖାଇଥିଲେ। ରେବତୀ ଭବିଷ୍ୟତରେ ବୈଜ୍ଞାନିକ ହୋଇ କ୍ୟାନସର ରୋଗୀଙ୍କ ପାଇଁ ଔଷଧ ତିଆରି କରିବାକୁ ଲକ୍ଷ୍ୟ ରଖିଥିବା କହିଛନ୍ତି। ତାଙ୍କର ସଫଳତା ପାଇଁ ସେ ମା’ ବାପା, ସମସ୍ତ ପ୍ରଫେସର, କୁଳପତି, ଶିକ୍ଷୟିତ୍ରୀ ଶିକ୍ଷକ, ଭଉଣୀ, ଭାଇଙ୍କୁ କୃତଜ୍ଞତା ଜଣାଇଛନ୍ତି। ରେବତୀଙ୍କ ସଫଳତା ସମ୍ପର୍କରେ ଖବର ପାଇବା ପରେ ସ୍ବାସ୍ଥ୍ୟମନ୍ତ୍ରୀ ତଥା ସ୍ଥାନୀୟ ବିଧାୟକ ଡ. ମୁକେଶ ମହାଲିଙ୍ଗ ତାଙ୍କୁ ଅଭିନନ୍ଦନ ଜଣାଇବା ସହ ଆର୍ଥକ ସହାୟତା ପ୍ରଦାନ କରିଥିବା ଜଣାପଡିଛି। ଆଗକୁ ମଧ୍ୟ ତାଙ୍କ ପାଠପଢ଼ାରେ ସେ ସହାୟତା କରିବେ ବୋଲି ପ୍ରତିଶ୍ରୁତି ଦେଇଥିବା ଜଣାପଡିଛି I ରେବତୀଙ୍କ ପାଖକୁ ଏବେ ଶୁଭେଚ୍ଛାର ସୁଅ ଛୁଟିବାରେ ଲାଗିଛି ।
