କେନ୍ଦୁଝର, ୨୦।୪ (ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲା ସଦର ବ୍ଲକ ଟାଙ୍ଗରାଣୀ ଗାଁରେ ପୋଖରୀରେ ବୁଡି ବାପାଙ୍କ ମୃତ୍ୟୁ ହୋଇଥିବା ବେଳେ ଉଦ୍ଧାର କରିବାକୁ ଯାଇ ସାନ ପୁଅ ଗୁରୁତର ହୋଇଛନ୍ତି। ଏହି ଦୁଃଖଦ ଘଟଣାକୁ ନେଇ ଉକ୍ତ ଅଞ୍ଚଳରେ ଶୋକର ଛାୟା ଖେଳିଯାଇଛି। ବାପା ପୋଖରୀରେ ବୁଡିଯିବା ଦେଖି ଦୁଇ ପୁଅ ତାଙ୍କୁ ପାଣିକୁ ଡେଇଁ ପଡ଼ିଥିଲେ। କିନ୍ତୁ ବାପାଙ୍କୁ ବଞ୍ଚାଇ ପାରି ନ ଥିଲେ। ଅପରପକ୍ଷେ ଏସବୁରେ ସାନପୁଅ ଲକ୍ଷ୍ମୀଧର ନାଏକ (୧୫) ଗୁରୁତର ହୋଇପଡ଼ିଥିବାରୁ ତାଙ୍କୁ କେନ୍ଦୁଝର ମୁଖ୍ୟ ଚିକିତ୍ସାଳୟରେ ଚିକିତ୍ସା ପାଇଁ ଭର୍ତ୍ତି କରାଯାଇଛି।
ପ୍ରକାଶ ଯେ, ରବିବାର ମଧ୍ୟାହ୍ନରେ ସଦର ଥାନା ଅନ୍ତର୍ଗତ ନେଲୁଙ୍ଗ ପଞ୍ଚାୟତ ଟାଙ୍ଗରାଣି ଗାଁର ବିଜୟ କୁମାର ନାଏକ(୪୨) ପୋଖରୀରେ ଗାଧାଉଥିବା ସମୟରେ ବୁଡି ଯାଇଥିଲେ। କିଛି ସମୟ ବିଳମ୍ବ ହେବାର ଦେଖି ଦୁଇ ପୁଅ ପୋଖରୀକୁ ଖୋଜିବାକୁ ଆସିଥିଲେ। ଦୁହେଁ କାଳ ବିଳମ୍ବ ନ କରି ବାପାଙ୍କୁ ବଞ୍ଚାଇବାକୁ ଯାଇ ପୋଖରୀ ଭିତରକୁ ଡେଇଁ ପଡ଼ିଥିଲେ। ଅଧିକ ଖାଲ ହୋଇଥିବାରୁ ବାପାଙ୍କୁ ଉଦ୍ଧାର କରିବା ସମୟରେ ତାଙ୍କ ମୃତ୍ୟୁ ହୋଇଯାଇଥିଲା। ହେଲେ ଏସବୁରେ ସାନପୁଅ ଲକ୍ଷ୍ମୀଧର ଗୁରୁତର ହୋଇଥିଲେ। ତାଙ୍କ ସ୍ଥାନୀୟ ଲୋକେ କେନ୍ଦୁଝର ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଛନ୍ତି। ସଦର ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ପରିବାର ଅତ୍ୟନ୍ତ ଗରିବ ଥିବାରୁ ସରକାରୀ ସୁବିଧା ଯୋଗାଇ ଦେବା ପାଇଁ ଗ୍ରାମବାସୀ ଦାବି କରିଛନ୍ତି।
