ଜେନେଭା, ୫ା୬:ଅପମିଶ୍ରିତ ଏବଂ ଦୂଷିତ ଖାଦ୍ୟ ଗ୍ରହଣ କରିବା ଦ୍ୱାରା ସାରା ବିଶ୍ୱରେ ପ୍ରତିବର୍ଷ ପ୍ରାୟ ୧୫ ଲକ୍ଷ ଲୋକଙ୍କ ମୃତ୍ୟୁ ଘଟୁଛି। ଏହି ସାଙ୍ଘାତିକ ସ୍ଥିତିରେ କୋମଳମତି ଶିଶୁମାନେ ସବୁଠାରୁ ଅଧିକ ଶିକାର ହେଉଛନ୍ତି ବୋଲି ଗୁରୁବାର ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ) ପକ୍ଷରୁ ଚେତାବନୀ ଦିଆଯାଇଛି। ଖାଦ୍ୟରେ କ୍ଷତିକାରକ ବ୍ୟାକ୍ଟେରିଆ, ଭୂତାଣୁ, ପାରାସାଇଟ୍ (ପରଜୀବୀ) ଏବଂ ବିପଜ୍ଜନକ ରାସାୟନିକ ପଦାର୍ଥ ମିଶିବା ଯୋଗୁ ଏହି ସ୍ବାସ୍ଥ୍ୟ ସଙ୍କଟ ସୃଷ୍ଟି ହେଉଛି।
୨୦୦୦ରୁ ୨୦୨୧ ମଧ୍ୟରେ ବିଶ୍ୱର ୧୯୪ ଦେଶର ତଥ୍ୟକୁ ଅନୁଧ୍ୟାନ କରି ଏହି ରିପୋର୍ଟ ପ୍ରକାଶ ପାଇଛି। ଏହି ତଥ୍ୟ ଅନୁଯାୟୀ, ପୃଥିବୀରେ ବାର୍ଷିକ ପ୍ରାୟ ୮୮.୬ କୋଟି ଲୋକ ଅସ୍ବାସ୍ଥ୍ୟକର ଓ ଦୂଷିତ ଖାଦ୍ୟ ଖାଇ ବିଭିନ୍ନ ଗୁରୁତର ରୋଗରେ ଆକ୍ରାନ୍ତ ହେଉଛନ୍ତି। ଏଥିମଧ୍ୟରୁ ୫ ବର୍ଷରୁ କମ୍ ବୟସର ଶିଶୁମାନଙ୍କ ପାଇଁ ଏହି ବିପଦ ପ୍ରାୟ ତିନି ଗୁଣ ଅଧିକ। ବିଶ୍ୱ ସ୍ବାସ୍ଥ୍ୟ ସଂଗଠନର ମୁଖ୍ୟ ଟେଡ୍ରୋସ ଅଧନୋମ ଗେବ୍ରେସିସ କହିଛନ୍ତି, ‘ଖାଦ୍ୟ ସୁରକ୍ଷା କୌଣସି କାଳ୍ପନିକ ବିଷୟ ନୁହେଁ; ଏହା ପ୍ରତିଦିନ ପ୍ରତ୍ୟେକ ପରିବାରର ପ୍ରତିଟି ଥାଳି ବା ଆହାର ସହ ଜଡ଼ିତ।’ ୨୦୦୦ ମସିହା ତୁଳନାରେ ସାମଗ୍ରିକ ଭାବେ ଦୂଷିତ ଖାଦ୍ୟଜନିତ ରୋଗ କିଛି ମାତ୍ରାରେ କମିଥିଲେ ମଧ୍ୟ ବିଶ୍ୱର ବିଭିନ୍ନ ଅଞ୍ଚଳ ମଧ୍ୟରେ ବ୍ୟାପକ ଅସମାନତା ଦେଖିବାକୁ ମିଳିଛି। ବିଶେଷକରି ଆଫ୍ରିକା ଏବଂ ଭାରତ ସମେତ ଦକ୍ଷିଣ-ପୂର୍ବ ଏସିଆ ମହାଦେଶରେ ଏହି ସମସ୍ୟା ସବୁଠାରୁ ଉଦ୍ବେଗଜନକ। ସାରା ବିଶ୍ୱର ମୋଟ ଆକ୍ରାନ୍ତଙ୍କ ମଧ୍ୟରୁ ପ୍ରାୟ ତିନି-ଚତୁର୍ଥାଂଶ (୭୫%) ରୋଗୀ ଏବଂ ମୋଟ ମୃତ୍ୟୁ ସଂଖ୍ୟାର ପ୍ରାୟ ୬୦ ପ୍ରତିଶତ କେବଳ ଏହି ଦୁଇଟି ଅଞ୍ଚଳରୁ ହିଁ ଚିହ୍ନଟ ହେଉଛନ୍ତି।
୨୦୨୧ ମସିହାର ତଥ୍ୟ ଅନୁଯାୟୀ, ପ୍ରାୟ ୮୬ କୋଟି ମାମଲାରେ ବ୍ୟାକ୍ଟେରିଆ ଏବଂ ଭାଇରସ ଭଳି ‘ବାୟୋଲୋଜିକାଲ୍ ହାଜାର୍ଡସ’ (ଜୈବିକ ବିପଦ) ଯୋଗୁ ଲୋକମାନେ ଆକ୍ରାନ୍ତ ହୋଇଥିଲେ। ଅପରପକ୍ଷରେ ଖାଦ୍ୟ ଓ ପାଣିରେ ରାସାୟନିକ ପଦାର୍ଥର ମିଶ୍ରଣ ଯୋଗୁ ସବୁଠାରୁ ଅଧିକ ମୃତ୍ୟୁ ଘଟିଛି। ଏହି ଅଣ-ଜୈବିକ ବିପଦ ମଧ୍ୟରେ ବିଶେଷକରି ଆର୍ସେନିକ ଏବଂ ସୀସା (ଲିଡ୍) ବିଷକ୍ରିୟା ଯୋଗୁ ଅଧିକାଂଶ ଲୋକ ପ୍ରାଣ ହରାଉଛନ୍ତି।
ଡବ୍ଲ୍ୟୁଏଚ୍ଓର ଖାଦ୍ୟ ସୁରକ୍ଷା ବୈଷୟିକ ଅଧିକାରୀ ୟୁକି ମିନାତୋ କହିଛନ୍ତି, ବର୍ତ୍ତମାନର ଜଳବାୟୁ ପରିବର୍ତ୍ତନ ଯୋଗୁ ଖାଦ୍ୟ ଦୂଷିତ ହେବାର ଆଶଙ୍କା ପୂର୍ବ ଅପେକ୍ଷା ବହୁ ଗୁଣ ବଢ଼ିଯାଇଛି। ଏହାସହିତ ମାନବ ଶରୀରରେ ବଢ଼ୁଥିବା ‘ଆଣ୍ଟିମାଇକ୍ରୋବିଆଲ୍ ରେଜିଷ୍ଟାନ୍ସ’ (ଔଷଧ ପ୍ରତିରୋଧକ ଶକ୍ତି) ଯୋଗୁ ଏହି ସଂକ୍ରମଣଗୁଡ଼ିକର ଚିକିତ୍ସା କରିବା ଆହୁରି କଷ୍ଟକର ହେବାରେ ଲାଗିଛି। ଏହି ସ୍ବାସ୍ଥ୍ୟ ସଙ୍କଟ କେବଳ ଜୀବନ ନେଉନାହିଁ, ବରଂ ଏହାଦ୍ୱାରା ବିଶ୍ୱ ଅର୍ଥନୀତି ମଧ୍ୟ ବ୍ୟାପକ ଭାବେ ପ୍ରଭାବିତ ହେଉଛି। କେବଳ ୨୦୨୧, ଏହି ରୋଗ ଯୋଗୁ କାର୍ଯ୍ୟଦକ୍ଷତା ହ୍ରାସ ପାଇ ବିଶ୍ୱ ଅର୍ଥନୀତିକୁ ପ୍ରାୟ ୬୪୭ ବିଲିୟନ ଡଲାରର ଆର୍ଥିକ କ୍ଷତି ସହିବାକୁ ପଡ଼ିଛି।
Dharitri – Odisha’s No.1 Odia Daily
