ନୂଆଦିଲ୍ଲୀ, ୫।୬ : ବିଶ୍ୱ ପରିବେଶ ଦିବସ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମୃତ୍ତିକା ସଂରକ୍ଷଣ ଆନ୍ଦୋଳନ କାର୍ଯ୍ୟକ୍ରମରେ ଅଂଶଗ୍ରହଣ କରି ଚାଷ ଜମିକୁ ରାସାୟନିକ ପଦାର୍ଥ ମୁକ୍ତ କରିବାକୁ ଆହ୍ବାନ ଦେଇଛନ୍ତି। ସେ ଲୋକମାନଙ୍କୁ ସମ୍ବୋଧିତ କରି କହିଛନ୍ତି ଯେ,ପରିବେଶର ସୁରକ୍ଷା ପାଇଁ ଭାରତର ପ୍ରୟାସ ବହୁମୁଖୀ ହୋଇଛି। ଜଳବାୟୁ ପରିବର୍ତ୍ତନରେ ଭାରତର ଭୂମିକା ସୀମିତ ରହିଛି। ଭାରତ ଏକ୍ଷେତ୍ରରେ ପ୍ରୟାସ ଜାରି ରଖିଛି।
ସେ କହିଛନ୍ତି ଯେ ପୃଥିବୀର ବଡ ଆଧୁନିକ ଦେଶଗୁଡ଼ିକ କେବଳ ପୃଥିବୀର ଅଧିକରୁ ଅଧିକ ସମ୍ବଳ ବ୍ୟବହାର କରିବା ସହିତ ସର୍ବାଧିକ କାର୍ବନ ନିର୍ଗମନ ମଧ୍ୟ କରୁଛନ୍ତି।
ପ୍ରଧାନମନ୍ତ୍ରୀ କହିଛନ୍ତି ଯେ, ଚଳିତ ବର୍ଷର ବଜେଟରେ ଆମେ ନିଷ୍ପତ୍ତି ନେଇଛୁ ଯେ ଗଙ୍ଗା କୂଳରେ ଅବସ୍ଥିତ ଗ୍ରାମଗୁଡିକରେ ଆମେ ପ୍ରାକୃତିକ ଚାଷକୁ ଉତ୍ସାହିତ କରିବୁ। ପ୍ରାକୃତିକ ଚାଷର ଏକ ବଡ଼ କରିଡର ନିର୍ମାଣ କରାଯିବ। ଏହା ସହିତ ଆମର ଚାଷ ଜମି ରାସାୟନିକ ପଦାର୍ଥ ମୁକ୍ତ ହେବା ସହିତ ନମାମି ଗଙ୍ଗେ ଅଭିଯାନକୁ ମଧ୍ୟ ନୂତନ ଶକ୍ତି ମିଳି ପାରିବ।
ବିଜ୍ଞାନ ଭବନରେ ଆୟୋଜିତ ଏହି କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ କହିଛନ୍ତି ଯେ ପୂର୍ବରୁ ଆମ ଦେଶର ଚାଷୀଙ୍କ ପାଇଁ ତାଙ୍କ ଚାଷ ଜମିର ମାଟି କି ପ୍ରକାରର, ମାଟିରେ ଅଭାବ କ’ଣ, କେତେ ଅଭାବ ସେ ସମ୍ବନ୍ଧରେ ସୂଚନା ନ ଥିଲା। ଏହି ସମସ୍ୟାର ସମାଧାନ ପାଇଁ ଦେଶର ଚାଷୀଙ୍କୁ ମୃତ୍ତିକା ସ୍ବାସ୍ଥ୍ୟ କାର୍ଡ ଦେବା ପାଇଁ ଏକ ବିଶାଳ ଅଭିଯାନ ଆରମ୍ଭ କରାଯାଇଥିଲା।
ବର୍ଷା ଜଳ ସଂରକ୍ଷଣ ଅଭିଯାନ ମାଧ୍ୟମରେ ଆମେ ଦେଶର ଲୋକଙ୍କୁ ଜଳ ସଂରକ୍ଷଣ ସହିତ ସଂଯୋଗ କରୁଛୁ। ଚଳିତ ବର୍ଷ ମାର୍ଚ୍ଚରେ ମଧ୍ୟ ଦେଶରେ ୧୩ ଟି ବଡ ନଦୀ ସଂରକ୍ଷଣ ପାଇଁ ଏକ ଅଭିଯାନ ଆରମ୍ଭ ହୋଇଛି। ଏଥିରେ ଜଳର ପ୍ରଦୂଷଣକୁ ହ୍ରାସ କରିବା ସହିତ ନଦୀ କୂଳରେ ନୂଆ ଜଙ୍ଗଲ ସୃଷ୍ଟି କାର୍ଯ୍ୟ ଅନ୍ତର୍ଗତ ବୃକ୍ଷ ଚାରା ରୋପଣ କରାଯାଉଛି।
ପ୍ରଧାନମନ୍ତ୍ରୀ କହିଛନ୍ତି ଯେ ମୃତ୍ତିପକା ସଂରକ୍ଷଣ ପାଇଁ ଆମେ ପାଞ୍ଚଟି ପ୍ରମୁଖ ବିଷୟ ଉପରେ ଧ୍ୟାନ ଦେଇଛୁ। ପ୍ରଥମେ ମାଟିକୁ ରାସାୟନିକ ମୁକ୍ତ କିପରି କରାଯିବ। ଦ୍ୱିତୀୟରେ ମାଟିରେ ବାସ କରୁଥିବା ଜୀବମାନଙ୍କୁ କିପରି ରକ୍ଷା କରାଯିବ। ବୈଷୟିକ ଭାଷାରେ ସେମାନେ ମୃତ୍ତିକାର ଜୈବିକ ପଦାର୍ଥ । ତୃତୀୟରେ ମୃତ୍ତିକାର ଆର୍ଦ୍ରତା କିପରି ବଜାୟ ରଖାଯିବ। ଏହା ପର୍ଯ୍ୟନ୍ତ ଜଳର ଉପଲବ୍ଧତା କିପରି ବଢ଼ିବ। ଚତୁର୍ଥରେ ଭୂତଳ ଜଳ କମ ହେତୁ ମାଟିରେ ହେଉଥିବା କ୍ଷୟକୁ କିପରି ଦୂର କରାଯାଇପାରିବ ଏବଂ ପଞ୍ଚମରେ ଜଙ୍ଗଲ ପରିସୀମା ହ୍ରାସ ଯୋଗୁ ମାଟିର କ୍ରମାଗତ କ୍ଷୟକୁ କିପରି ରୋକାଯାଇପାରିବ। ଏହି ୫ ମନ୍ତ୍ର ଦ୍ୱାରା ମୃତ୍ତିକା ସଂରକ୍ଷଣ ହୋଇ ପାରିବ ବୋଲି ପ୍ରଧାନମନ୍ତ୍ରୀ କହିଛନ୍ତି।
