ଭୁବନେଶ୍ୱର,୨୩।୨(ବ୍ୟୁରୋ): ଧାନ ବିକ୍ରି ଓ ମଣ୍ଡିରେ ହେଉଥିବା ଅବ୍ୟବସ୍ଥାକୁ ନେଇ ଗତ ୩ ଦିନ ଅଚଳାବସ୍ଥା ପରେ ସୋମବାର ବିଧାନସଭାରେ ଏ ପ୍ରସଙ୍ଗରେ ୨ ଘଣ୍ଟା ଧରି ଆଲୋଚନା ହୋଇଥିଲା। ଟୋକନ ବ୍ୟବସ୍ଥାକୁ ଉଚ୍ଛେଦ କରିବା ସହ ମଣ୍ଡିରେ ସିସିଟିଭି ଲଗାଇବା ଏବଂ ଟୋକନ ପାଇଥିବା ସମସ୍ତ ଚାଷୀଙ୍କ ଧାନ କିଣିବାକୁ ବିରୋଧୀ ଦଳ ଭାଜପା ଓ କଂଗ୍ରେସ ସଦସ୍ୟମାନେ ଦାବି କରିଥିଲେ। ଦୀର୍ଘ ସମୟ ଆଲୋଚନା ହେବା ପରେ ମଧ୍ୟ ବିରୋଧୀ ସଦସ୍ୟମାନେ ସମବାୟ ମନ୍ତ୍ରୀଙ୍କ ଉତ୍ତରରେ ସନ୍ତୁଷ୍ଟ ନ ହୋଇ ବିଧାନସଭା କକ୍ଷ ଛାଡି ବାହାରକୁ ଚାଲି ଯାଇଥିଲେ।
ସୋମବାର ପ୍ରଶ୍ନୋତ୍ତର କାର୍ଯ୍ୟକ୍ରମ ପରେ ଶୂନ୍ୟକାଳ ଓ ମୁଲତବୀ ଆଲୋଚନାକୁ ବାତିଲ କରାଯାଇ ଅପରାହ୍ନ ୧୨ଟା ୩୦ ମିନିଟରୁ ୧ଟା ୩୦ ମିନିଟ ଯାଏ ଧାନ କିଣା ପ୍ରସଙ୍ଗକୁ ନେଇ ଆସିଥିବା ମୋଶନ ଉପରେ ଆଲୋଚନା ହୋଇଥିଲା। ସଂସଦୀୟ ବ୍ୟାପାର ମନ୍ତ୍ରୀ ବିକ୍ରମ କେଶରୀ ଆରୁଖ ମୋଶନ ଆଗତ କରିଥିଲେ। ଭାଜପା ସଦସ୍ୟ ଜୟନାରାୟଣ ମିଶ୍ର କହିଥିଲେ ଯେ ଗତ ୨୧ ବର୍ଷ ହେବ ରାଜ୍ୟରେ ଧାନ କିଣା ସମସ୍ୟା ଲାଗି ରହିଛି। ଆଗରୁ ଧାନ କିଣା ହେବା ପୂର୍ବରୁ ଜିଲାସ୍ତରରେ ଧାନକିଣା କମିଟି ବସି ସ୍ଥିର କରାଯାଉଥିଲା। ଏବେ ସବୁକିଛି ଭୁବନେଶ୍ୱରରୁ କରାଯାଉଛି। ଅଣଜଳସେଚିତ ଜମିରେ ଏକର ପିଛା ୨୧ରୁ ୨୨ କୁଇଣ୍ଟାଲ ଧାନ ଅମଳ ହେଉଥିବା ବେଳେ ସରକାର ମାତ୍ର ୧୩ କୁଇଣ୍ଟାଲ ଧାନ କିଣୁଛନ୍ତି। ସେହିପରି ଜଳସେଚିତ ଜମିରେ ଏକର ପିଛା ୪୦ କୁଇଣ୍ଟାଲ ଧାନ ଉତ୍ପାଦନ ହେଉଥିବା ବେଳେ ମାତ୍ର ୧୯ କୁଇଣ୍ଟାଲ କିଣା ଯାଉଛି ବୋଲି ସେ ଅଭିଯୋଗ କରିଥିଲେ। କଂଗ୍ରେସ ସଭ୍ୟ ନରସିଂହ ମିଶ୍ର କହିଛନ୍ତି ଯେ ଧାନ କିଣିବା ଦାୟିତ୍ୱ କେନ୍ଦ୍ର ସରକାରଙ୍କ। ଯୋଗାଣ ନିଗମ, ସ୍ବୟଂ ସହାୟକ ଗୋଷ୍ଠୀ ଏବଂ ମିଲର୍ମାନଙ୍କ ସହାୟତାରେ ଧାନ କିଣାରେ ଦୁର୍ନୀତି ହେଉଛି। ଯେଉଁ ମିଲର୍ମାନେ ମଣ୍ଡିକୁ ଯାଉଛନ୍ତି ସେମାନଙ୍କ ବିରୋଧରେ ଫୌଜଦାରି ମାମଲା ରୁଜୁ ହେବା ଦରକାର। ସରକାର କଟ୍ନି ଛଟ୍ନି ବନ୍ଦ କରିବାକୁ ମଣ୍ଡିରେ ସିସିଟିଭି ଲଗାନ୍ତୁ ବୋଲି ସେ କହିଥିଲେ। ବିଜେଡି ସଭ୍ୟ ପ୍ରତାପ କେଶରୀ ଦେବ କହିଥିଲେ ଯେ ରାଜ୍ୟ ସରକାର ଟୋକନ ବ୍ୟବସ୍ଥା ଉଠାଇ ଦେଲେ କ୍ଷୁଦ୍ର ଓ ନାମମାତ୍ର ଚାଷୀ ଧାନ ବିକିପାରିବେ ନାହିଁ। ଏଫ୍ଏକ୍ୟୁ ମାନର ଧାନ କିଣାଗଲେ ରାଜ୍ୟର ମାତ୍ର ୩୦ ପ୍ରତିଶତ ଚାଷୀ ଧାନ ବିକିବାକୁ ଯୋଗ୍ୟ ହେବେ। ଏଥର ରାଜ୍ୟ ସରକାର ସବୁ ଚାଷୀଙ୍କଠାରୁ ଧାନ କିଣିଛନ୍ତି। କେନ୍ଦ୍ର ସରକାର ଧାନ ସବ୍ସିଡି ବାବଦରେ ବକେୟା ୭୩୮୪ କୋଟି ଟଙ୍କା ଦେଇନାହାନ୍ତି। ଏବର୍ଷ ରାଜ୍ୟ ସରକାର ଧାନ କିଣିବା ପାଇଁ ୧୦ ହଜାର କୋଟି ଟଙ୍କା ଋଣ କରିଛନ୍ତି। ଆଲୋଚନାରେ ଭାଜପା ସଦସ୍ୟ ମୋହନ ଚରଣ ମାଝି, ବିଷ୍ଣୁ ଚରଣ ମାଝି, କଂଗ୍ରେସ ସଭ୍ୟ ସୁରେଶ କୁମାର ରାଉତରାୟ, ସନ୍ତୋଷ ସିଂ ସାଲୁଜା, ତାରା ପ୍ରସାଦ ବାହିନୀପତି , ବିଜେଡି ସଦସ୍ୟ କିଶୋର ମହାନ୍ତି, ଦେବେଶ ଆଚାର୍ଯ୍ୟ ଏବଂ ପ୍ରୀତିରଞ୍ଜନ ଘଡାଇ ଭାଗ ନେଇଥିଲେ।
ଆଲୋଚନା ଶେଷରେ ସମବାୟ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ କହିଥିଲେ ଯେ ଧାନ ସଂଗ୍ରହ ବର୍ଷ ଅକ୍ଟୋବର ୧ରୁ ଆରମ୍ଭ ହୋଇ ସେପ୍ଟେମ୍ବର ୩୦ରେ ସମାପ୍ତି ହୁଏ। ଏହି ବର୍ଷବ୍ୟାପୀ ଅବଧି ମଧ୍ୟରେ ରାଜ୍ୟ ସରକାର ଖରିଫ୍ ଓ ରବି ଋତୁ ପାଇଁ ପୃଥକ୍ ଧାନ ସଂଗ୍ରହ କରିଥାଆନ୍ତି। ସଂଗୃହୀତ ଚାଉଳକୁ ରାଜ୍ୟର ସାଧାରଣ ବଣ୍ଟନ ବ୍ୟବସ୍ଥାରେ ବ୍ୟବହାର କରାଯାଇଥାଏ। ବଳକା ଚାଉଳକୁ ଭାରତୀୟ ଖାଦ୍ୟ ନିଗମ (ଏଫ୍ସିଆଇ) ମାଧ୍ୟମରେ କେନ୍ଦ୍ରୀୟ ଅନ୍ନ ଭଣ୍ଡାରରେ ଦାଖଲ କରାଯାଏ। ରାଜ୍ୟ ସରକାର ପ୍ରାଥମିକ କୃଷି ସମବାୟ ସମିତିଗୁଡିକ ମାଧ୍ୟମରେ ପଞ୍ଜୀକୃତ ଚାଷୀଙ୍କ ନିକଟରୁ ସିଧାସଳଖ ଧାନ ସଂଗ୍ରହ କରୁଛନ୍ତି। କେତେଗୁଡିଏ ଜିଲାରେ ଯୋଗ୍ୟ ମହିଳା ସ୍ବୟଂ ସହାୟକ ଗୋଷ୍ଠୀ ଓ ପାଣି ପଞ୍ଚାୟତଗୁଡିକୁ ମଧ୍ୟ ଧାନ ସଂଗ୍ରହରେ ସାମିଲ କରାଯାଇଛି। ପଞ୍ଜୀକୃତ ଚାଷୀଙ୍କଠାରୁ ବଳକା ଧାନ ସଂଗ୍ରହ କରାଯାଉଛି। ପଞ୍ଜୀକରଣ ଲାଗି ଚାଷୀ ପଟାଓ୍ବାରି ତଥ୍ୟ ପ୍ରଦାନ କରୁଛନ୍ତି। ଧାନ କିଣାର ସବୁ କାଗଜ କାମ ପ୍ରସ୍ତୁତି ପି-ପାସ୍ ଆପ୍ଲିକେଶନ ସହାୟତାରେ କମ୍ପ୍ୟୁଟରୀକୃତ ପ୍ରକ୍ରିୟା ମାଧ୍ୟମରେ ପରିଚାଳିତ ହେଉଛି। ଖରିଫ ବିପଣନ ବା ଧାନ ସଂଗ୍ରହ ବର୍ଷ ୨୦୨୦-୨୧ ପାଇଁ ଅନ୍ତତଃ ୭୧ ଲକ୍ଷ ମେଟ୍ରିକ ଟନର ଧାନ ସଂଗ୍ରହ କରାଯିବାର ଲକ୍ଷ୍ୟ ଧାର୍ଯ୍ୟ ସ୍ଥିରୀକୃତ ହୋଇଛି। ଖରିଫ ଓ ରବିରେ ଧାନ ସଂଗ୍ରହର ଧାର୍ଯ୍ୟ ଯଥାକ୍ରମେ ୫୪ ଲକ୍ଷ ଓ ୧୭ଲକ୍ଷ ମେଟ୍ରିକ ଟନ ରହିଛି। ଏହାଠାରୁ ଅଧିକ ଧାନ ଯଦି ପଞ୍ଜୀକୃତ ଚାଷୀଙ୍କଠାରୁ ମଣ୍ଡିକୁ ଆସିବ ତାହା ମଧ୍ୟ ରାଜ୍ୟ ସରକାର କିଣିବେ। ରାଜ୍ୟରେ ଫେବୃୟାରୀ ୨୦୨୧ ସୁଦ୍ଧା ମୋଟ ୫୫.୯୭ ଲକ୍ଷ ମେଟ୍ରିକ ଟନ ଧାନ କ୍ରୟ କରାଯାଇଛି। ଗତବର୍ଷ ତୁଳନାରେ ଚଳିତ ଖରିଫ ଧାନ ସଂଗ୍ରହରେ ଚାଷୀ ଅଂଶଗ୍ରହଣ ମଧ୍ୟ ଉତ୍ସାହଜନକ ରହିଛି। ଗତ ୨୧ ତାରିଖ ସୁଦ୍ଧା ୧୦.୧୩ ଲକ୍ଷ ଚାଷୀ ସରକାରଙ୍କୁ ଖରିଫ ଧାନ ବିକ୍ରୟ କରିଛନ୍ତି। ଗତବର୍ଷ ଏହି ସମୟ ସୁଦ୍ଧା ୮.୩୧ ଲକ୍ଷ ଚାଷୀ ସରକାରଙ୍କୁ ଖରିଫ ଧାନ ବିକ୍ରି କରିଥିଲେ। ଯେଉଁ କ୍ଷେତ୍ରରେ ଟୋକନର ବୈଧତା ଶେଷ ହୋଇଥିବା ଅଭିଯୋଗ ଆସୁଛି ସେ କ୍ଷେତ୍ରରେ ଆବଶ୍ୟକ ପଦକ୍ଷେପ ଗ୍ରହଣ କରାଯିବ। ବିରୋଧୀ ଦଳ ଦୋମୁହାଁ ନୀତି ଧରିଛନ୍ତି ବୋଲି ମନ୍ତ୍ରୀ କହିଛନ୍ତି। ମନ୍ତ୍ରୀଙ୍କ ଉତ୍ତରରେ ଅସନ୍ତୁଷ୍ଟ ହୋଇ ବିରୋଧୀ ଦଳ ସଦସ୍ୟମାନେ ବିଧାନସଭା ବାହାରକୁ ଚାଲି ଯାଇଥିଲେ।
