ବରଗଡ଼,୧୭।୬(ପ୍ରେମାନନ୍ଦ ଖମାରୀ): ବରଗଡ଼ ଜିଲାରେ ଖରିଫ୍ ଚାଷକାର୍ଯ୍ୟ ସମୟ ଆସି ଯାଇଛି। ମାତ୍ର ଏପର୍ଯ୍ୟନ୍ତ ଟୋକନ ସମସ୍ୟା ଯୋଗୁ ଚାଷୀମାନେ ଗତ ରବିରେ ଅମଳ କରିଥିବା ଧାନ ବିକ୍ରି କରି ପାରି ନାହାନ୍ତି। ଏଭଳି ସ୍ଥିତିରେ ଚାଷୀଙ୍କ ଅମଳ ଧାନ କ୍ଷେତ, ଖଳାର ଖୋଲା ଆକାଶତଳେ ପଡ଼ି ରହିଛି। ବିଭିନ୍ନ ସମୟରେ ବର୍ଷା ଯୋଗୁ ତାହା ଭିଜିବାରେ ଲାଗିଛି। ଆଗକୁ ପୁଣି ବର୍ଷା ମାଡ଼ି ଆସୁଥିବାରୁ ଚାଷୀମାନଙ୍କ ଧାନବିକ୍ରି ଚିନ୍ତା ବଢ଼ି ଯାଇଛି। ଅନ୍ୟପଟେ ରବିଧାନ ବିକି ପାରି ନଥିବାରୁ ଜିଲାର ଚାଷୀମାନେ ଖରିଫ୍ ଚାଷକାର୍ଯ୍ୟକୁ ମଧ୍ୟ ଆଗେଇ ନେଇ ପାରୁ ନାହାନ୍ତି। ଏହାକୁ ନେଇ ଚାଷୀମାନଙ୍କ ମଧ୍ୟରେ ଆନ୍ଦୋଳନ ତେଜିବାରେ ଲାଗିଛି। ମଙ୍ଗଳବାର ସଂଯୁକ୍ତ କୃଷକ ସଂଗଠନ ନେତୃତ୍ୱରେ ଜିଲାର ସହରାଟିକ୍ରା, ଗାଇସୀମା, ଗ୍ରୀଣ୍ଡୋଲା, ଖୁଣ୍ଟପାଲି, ମୁଲବାର ଆଦି ଅଞ୍ଚଳର ଚାଷୀମାନେ ମୁଖ୍ୟ ଜିଲା ଯୋଗାଣ ଅଧିକାରୀ ଏବଂ ସମବାୟ ଉପନିବନ୍ଧକ(ଡିଆରସିଏସ୍)ଙ୍କୁ କାର୍ଯ୍ୟାଳୟକୁ ଟୋକନ ସମସ୍ୟାର ସମାଧାନ ଦାବି ନେଇ ଆସିଥିଲେ। ଆସନ୍ତା ୨୦ତାରିଖ ସୁଦ୍ଧା ସମସ୍ତ ପଞ୍ଜୀକୃତ ଚାଷୀଙ୍କୁ ଟୋକନ ନ ମିଳିଲେ କିମ୍ବା ଟୋକନରେ ରହିଥିବା ତ୍ରୁଟି ସଂଶୋଧନ କରା ନଗଲେ ଚାଷୀମାନେ ଆନ୍ଦୋଳନକୁ ଓହ୍ଲାଇବାକୁ ବାଧ୍ୟ ହେବେ ବୋଲି ସଂଯୁକ୍ତ କୃଷକ ସଂଗଠନର ଉପଦେଷ୍ଟା ରମେଶ ମହାପାତ୍ର ବିଭାଗୀୟ ଅଧିକାରୀମାନଙ୍କୁ ରୋକଠୋକ୍ ଶୁଣାଇ ଦେଇଥିଲେ।
ସୂଚନା ଅନୁଯାୟୀ, ଗତ ୧୧ତାରିଖରୁ ଜିଲାରେ ରବିଧାନ ସଂଗ୍ରହ ପ୍ରକ୍ରିୟା ଆରମ୍ଭ ହୋଇଛି। ଆରମ୍ଭରୁ ଟୋକନ ସମସ୍ୟା ଯୋଗୁ ଧାନ ବିକ୍ରିବଟା ପ୍ରଭାବିତ ହୋଇଛି। ଜିଲାର ଅନେକ ଚାଷୀଙ୍କ ଟୋକନକୁ ବ୍ଲକ୍ କରି ଦିଆଯାଇଛି। ସେହିପରି ଯେଉଁ ଚାଷୀମାନଙ୍କୁ ଟୋକନ ମିଳିଛି, ସେଥିରେ ପଞ୍ଜୀକୃତ ଜମି ତୁଳନାରେ ବିକ୍ରିଯୋଗ୍ୟ ଧାନ ପରିମାଣକୁ ଯଥେଷ୍ଟ କମାଇ ଦିଆଯାଇଛି। ଏଭଳି ଅଭିଯୋଗ ନେଇ ଚାଷୀମାନେ ବାରମ୍ବାର ପ୍ରାଥମିକ କୃଷି ସମବାୟ ସମିତି(ପାକ୍ସ)ଠାରୁ ଆରମ୍ଭ କରି ସମବାୟ ଉପନିବନ୍ଧକ, ଜିଲା ଯୋଗାଣ ଅଧିକାରୀ ଏବଂ ଜିଲାପାଳଙ୍କ କାର୍ଯ୍ୟାଳୟକୁ ଆସି ଧାଁ ଧପଡ଼ ହେଉଛନ୍ତି। ବିଭାଗୀୟ ଅଧିକାରୀଙ୍କ ପରାମର୍ଶକ୍ରମେ ନିର୍ଦ୍ଧାରୀତ ଫର୍ମରେ ଆବେଦନ କରୁଛନ୍ତି। ମାତ୍ର ମାସମାସ ବିତିଯିବା ସତ୍ତ୍ୱେ ସେମାନଙ୍କ ଟୋକନ ସମସ୍ୟାର ସମାଧାନ ହେଉ ନାହିଁ ବୋଲି ଚାଷୀମାନେ ଅଭିଯୋଗ କରିଛନ୍ତି। ଏଭଳି ଅଭିଯୋଗ ନେଇ ସଂଯୁକ୍ତ କୃଷକ ସଂଗଠନର ଉପଦେଷ୍ଟା ମହାପାତ୍ରଙ୍କ ନେତୃତ୍ୱରେ ଚାଷୀ ପ୍ରତିନିଧି ପ୍ରଶାନ୍ତ ସାହୁ, ସୁରେଶ ନେକାଣ୍ଟି, ନିରଞ୍ଜନ ପ୍ରଧାନ ପ୍ରମୁଖ ସମବାୟ ଉପନିବନ୍ଧକ ଏବଂ ଯୋଗାଣ ଅଧିକାରୀଙ୍କ କାର୍ଯ୍ୟାଳୟକୁ ଆସିଥିଲେ।
Dharitri – Odisha’s No.1 Odia Daily
