କଣ୍ଟାପଡା,୧୮।୯(ଡି.ଏନ.ଏ.): ଲଘୁଚାପ ବର୍ଷାରେ ହୋଇଥିବା ଫସଲହାନୀ ଜନିତ କ୍ଷତିପୂରଣ ଦାବିରେ କଣ୍ଟାପଡା ବ୍ଲକ ଅଞ୍ଚଳର କେତେଜଣ ଚାଷୀ ସ୍ଥାନୀୟ ତହସିଲ କାର୍ଯ୍ୟାଳୟ ସମ୍ମୁଖରେ ଶୁକ୍ରବାର ଧାରଣାରେ ବସିଥିଲେ। କଟକ ସଦର ଉପଜିଲାପାଳ ପ୍ରତାପ ବେଉରା ଅପରାହ୍ନରେ ପହଞ୍ଚି ଧାରଣାରତ ଚାଷୀଙ୍କ ସହ ଆଲୋଚନା କରିଥିଲେ। ସରକାରୀ ନିୟମ ଅନୁସାରେ କୃଷି ବିଭାଗ ଦ୍ୱାରା କ୍ଷୟକ୍ଷତିର ଆକଳନ କରାଯାଇ ପ୍ରକୃତ ଚାଷୀମାନଙ୍କୁ କ୍ଷତିପୂରଣ ପ୍ରଦାନ ପାଇଁ ବେଉରା ପ୍ରତିଶ୍ରୁତି ଦେବା ପରେ ଧାରଣା ପ୍ରତ୍ୟାହୃତ ହୋଇଥିଲା। ମିଳିଥିବା ସୂଚନା ଅନୁଯାୟୀ, ଗତ ୧୨ ରୁ ୧୪ତାରିଖ ପର୍ଯ୍ୟନ୍ତ ହୋଇଥିବା ଲଗାଣ ବର୍ଷା ଯୋଗୁ ଉକ୍ତ ବ୍ଲକ ଅଞ୍ଚଳର ଅନେକ ଚାଷଜମି ପାଣି ଜମି ରହିଛି। ଏଥିସହ ଅନେକ ଘର ମଧ୍ୟ ଭାଙ୍ଗିଯାଇଛି। ଫଳରେ କୃଷିବିଭାଗ ପକ୍ଷରୁ କ୍ଷୟକ୍ଷତିର ସମ୍ପୂର୍ଣ୍ଣ ଆକଳନ କରାଯାଇପାରିନାହିଁ। ସରକାରୀଭାବେ କଣ୍ଟାପଡା ବ୍ଲକ ଏଥିରୁ ବାଦପଡିବା ପ୍ରତିବାଦରେ ଚାଷୀମାନେ ଧାରଣା ଦେଇଥିଲେ। ଏ ସମ୍ପର୍କରେ ତହସିଲଦାର ଆର୍ତ୍ତତ୍ରାଣ ମଲ୍ଲିକ କହିଛନ୍ତି, ଫସଲ କ୍ଷୟକ୍ଷତି ତଦନ୍ତ କାମ କୃଷି ବିଭାଗର। ଉକ୍ତ ଅଞ୍ଚଳରେ ବୁଡି ରହିଥିବା ଚାଷଜମି ଓ ଭାଙ୍ଗି ଯାଇଥିବା ଘରର ତଦନ୍ତ ରିପୋର୍ଟ କୃଷି ବିଭାଗ ପ୍ରସ୍ତୁତ କରି ଜିଲାପାଳଙ୍କ ନିକଟକୁ ପଠାଇଛି। କେତେଜଣ ପ୍ରଭାବଶାଳୀ ବ୍ୟକ୍ତି ଆଦୌ ଚାଷ ନ କରି ଫସଲହାନୀ ସହାୟତା ନେବାକୁ ଉଦ୍ୟମ କରି ବିଫଳ ହେଉଥିବାରୁ ଏଭଳି କାର୍ଯ୍ୟକୁ ପ୍ରୋତ୍ସାହନ ଦେଉଛନ୍ତି।
