ରାଜକନିକା,୨୧।୮(ସଞ୍ଜୟ କୁମାର ଦାଶ): କେନ୍ଦ୍ରାପଡ଼ା ଜିଲାର ରାଜକନିକା ବ୍ଲକରେ ଥିବା କଟକ ସେଣ୍ଟ୍ରାଲ କ୍ରେଡିଟ୍ କୋ-ଅପରେଟିଭ୍ ବ୍ୟାଙ୍କ ଲିଃ ଶାଖା ଅଧୀନରେ ୧୬ଟି ପ୍ରାଥମିକ କୃଷି ସମବାୟ ସମିତି ଲିଃ (ପାକ୍ସ) ଅବସ୍ଥାପିତ। ସମସ୍ତ ସମବାୟ ସମିତିରେ ଚାଷୀଙ୍କ ଟଙ୍କା ହେର୍ଫେର ହେଉଥିବା ନେଇ ଅନେକ ଚାଷୀ ଅଭିଯୋଗ କରୁଥିବା ବେଳେ କାର୍ଯ୍ୟାନୁଷ୍ଠାନ ନିଆଯାଉନାହିଁ। ସେହିପରି ବରୁଣା ସମବାୟ ସମିତିରେ ମାତ୍ରାଧିକ ଟଙ୍କା ହେରଫେର ନେଇ ୧୦ଜଣ ଚାଷୀ ନିକଟରେ ଥାନାର ଦ୍ୱାରସ୍ଥ ହୋଇଥିଲେ। ଚାପରେ ପଡ଼ି ପୋଲିସ ଏକ ସପ୍ତାହ ପରେ ନଂ.୩୨୪/୨୪ରେ ଏକ ମାମଲା ରୁଜୁକରି ଚୁପ୍ ବସିବା ଚାଷୀଙ୍କୁ ବ୍ୟଥିତ କରିଛି। ପାଖାପାଖି ଏକମାସ ହେବ ସମ୍ପୃକ୍ତ ସମ୍ପାଦକ ଓ ଶାଖା ପରିଚାଳକଙ୍କ ନାମରେ ଚାଷୀମାନେ ଲିଖିତ ଅଭିଯୋଗ କରିଥିଲେ ମଧ୍ୟ ପୋଲିସ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବା ଚାଷୀମାନେ ଅଭିଯୋଗ କରିଛନ୍ତି। ଏହି କ୍ରମରେ ମଙ୍ଗଳବାର ଏଆର୍ସିଏସ୍ ଯୋଗେନ୍ଦ୍ର ବିଶ୍ୱାଳ ଓ ଡିଆର୍ସିଏସ୍ ସନ୍ତୋଷ ଦାସ ସମ୍ପୃକ୍ତ ସମ୍ପାଦକଙ୍କ ଘରକୁ ଭୋଜି ଖାଇବା ପାଇଁ ଆସିଥିଲେ। ଖବରପାଇ ଚାଷୀ ଏଆର୍ସିଏସ୍ ବିଶ୍ୱାଳଙ୍କୁ ଭେଟି ଗୁହାରି କରିଥିଲେ କି, ବରୁଣା ସମବାୟ ସମିତିର ସମ୍ପାଦକ ଆମ ଅଜାଣତରେ ଟଙ୍କା ଉଠାଇ ନେଇଛନ୍ତି। ପାସ୍ ବହି ଆମକୁ ଦେଉନାହାନ୍ତି। ଚେକ୍ରେ ଦସ୍ତଖତ କରାଇ ନେଇଛନ୍ତି। କାହିଁକି ବିଭାଗୀୟ ତଦନ୍ତ ହେଉନାହିଁ ବୋଲି ଚାଷୀ ସୂର୍ଯ୍ୟମଣି ସାହୁ, ଅଲେଖ ଚନ୍ଦ୍ର ସାହୁ, ଅଜାମିଳ ମଲ୍ଲିକ, ମିନତି ମଲ୍ଲିକ, ଅଭିନମ ମଲ୍ଲିକ, ଉଦେକର ମଲ୍ଲିକ, ଧରଣୀ ମଲ୍ଲିକ, ଜଳଧର ମଲ୍ଲିକ, ପୀତାମ୍ବର ମଲ୍ଲିକ, ପ୍ରିୟରଞ୍ଜନ ପରିଡା, ଅଞ୍ଜନ ସାହୁ, ଗୌତମ ରଣା, ମହେଶ୍ୱର ପରିଡା ଏବଂ ସଂଗ୍ରାମ ମଲ୍ଲିକଙ୍କ ସହିତ ପେଗରପଡ଼ା ସମିତି ସଭ୍ୟ ପ୍ରବେଶନ ମଲ୍ଲିକ ପ୍ରମୁଖ ଅଭିଯୋଗ କରିଥିଲେ। ତେବେ ଖୁବ୍ଶୀଘ୍ର ଚାଷୀମାନଙ୍କ ସମସ୍ୟା ସମାଧାନ ହେବା ସହ ଦୋଷୀଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଏଆର୍ସିଏସ୍ ବିଶ୍ୱାଳ ଚାଷୀମାନଙ୍କୁ ଆଶ୍ୱାସନା ଦେଇଥିବା ଜଣାପଡ଼ିଛି।
